ಎಎಪಿಯಿಂದ ರಾಘವ್ ಚಡ್ಡಾಗೆ ಬಿಗ್ ಶಾಕ್; ರಾಜ್ಯಸಭೆ ಡೆಪ್ಯೂಟಿ ನಾಯಕ ಸ್ಥಾನದಿಂದ ವಜಾ, ಕಾರಣ ಏನು?..Raghav Chadha

ರಾಘವ್​ ಚಡ್ಡಾ ಅವರು, ನಾನಾ ವಿಚಾರಗಳನ್ನು ಸೋಶಿಯಲ್​ ಮೀಡಿಯಾದಲ್ಲಿ ಹಂಚಿಕೊಳ್ಳುತ್ತಾ ಸದಾ ಆಕ್ಟಿವ್​ ಆಗಿರುತ್ತಾರೆ. ಗಿಗ್​ ಕಾರ್ಮಿಕರು ಹಾಗೂ ವಿಮಾನ ನಿಲ್ದಾಣದಲ್ಲಿ ಕೆಲಸ ಮಾಡುವವರ ಬಗ್ಗೆ, ಅಲ್ಲಿ ಕೈಗೆಟುಕುವ ದರಕ್ಕೆ ಏನೆಲ್ಲ ಸಿಗುತ್ತದೆ ಎನ್ನುವುದನ್ನು ಪ್ರಸ್ತಾಪಿಸಿ ವೈರಲ್​ ಆಗಿದ್ದರು. ಈ ಮಧ್ಯೆ ಪಕ್ಷದ ಇಂತಹ ನಡೆ ಸದ್ಯ ಹಲವರಲ್ಲಿ ಕುತೂಹಲ ಕೆರಳಿಸುವಂತೆ ಮಾಡಿದೆ.

ಹೌದು, Aam Aadmi Party (ಎಎಪಿ) ತನ್ನ ಸಂಸದೀಯ ನಾಯಕತ್ವದಲ್ಲಿ ಬದಲಾವಣೆ ಮಾಡಿದ್ದು, ಪಂಜಾಬ್​ನ ಯುವ ಸಂಸದ ರಾಘವ್​ ಚಡ್ಡಾರನ್ನು ಉಪನಾಯಕನ ಸ್ಥಾನದಿಂದ ಕೆಳಗಿಳಿಸಿದೆ. ಇನ್ನು ಅವರ ಸ್ಥಾನಕ್ಕೆ ಸಂಸದ ಅಶೋಕ್ ಮಿತ್ತಲ್ ಅವರನ್ನು ನೂತನವಾಗಿ ನೇಮಕ ಮಾಡಿಕೊಂಡಿದೆ. ಈ ಬಗ್ಗೆ ರಾಜ್ಯಸಭಾ ಕಾರ್ಯದರ್ಶಿಗೆ ಪತ್ರ ಬರೆದಿದೆ ಎನ್ನಲಾಗಿದೆ.

ಉಪನಾಯಕನ ಸ್ಥಾನದಿಂದ ಅವರನ್ನು ವಜಾಗೊಳಿಸಿದ್ದಲ್ಲದೆ, ಸಂಸತ್​ನಲ್ಲಿ ಅವರು ಹೆಚ್ಚು ಮಾತನಾಡಲು ಅವಕಾಶ ನೀಡದಿರಲು ಎಎಪಿ ರಾಜ್ಯಸಭಾ ಕಾರ್ಯದರ್ಶಿಗೆ ಪತ್ರ ಬರೆದಿದೆ ಎನ್ನಲಾಗಿದೆ. ಪಿತೃತ್ವ ರಜೆಯ ಬಗ್ಗೆ ಮಾತನಾಡಿ ಎಲ್ಲರ ಗಮನ ಸೆಳೆದಿದ್ದ ಈ ಸಂದರ್ಭದಲ್ಲೇ ಪಕ್ಷ ಈ ನಿರ್ಧಾರ ಮಾಡಿರುವುದು ಹಲವು ಅನುಮಾನಗಳಿಗೆ ಎಡೆ ಮಾಡಿಕೊಟ್ಟಂತಾಗಿದೆ.

ಇತ್ತೀಚೆಗೆ ದೆಹಲಿ ಅಬಕಾರಿ ನೀತಿ ಪ್ರಕರಣದಲ್ಲಿ ಮಾಜಿ ಸಿಎಂ ಅರವಿಂದ್​ ಕೇಜ್ರಿವಾಲ್​ ಮತ್ತು ಮನೀಶ್​ ಸಿಸೋಡಿಯಾ ಅವರಿಗೆ ಕ್ಲೀನ್​ ಚಿಟ್​​ ಸಿಕ್ಕಿತ್ತು. ಈ ಸಂದರ್ಭದಲ್ಲಿ ಯಾವುದೇ ಪ್ರತಿಕ್ರಿಯೆ ಕೊಟ್ಟಿರಲಿಲ್ಲ. ಪಕ್ಷದ ಪ್ರಮುಖ ಕಾರ್ಯಕ್ರಮದಲ್ಲಿ, ಕೇಜ್ರಿವಾಲ್​ರ ಸುದ್ದಿಗೋಷ್ಠಿಗಳಿಂದ ಅವರು ದೂರ ಉಳಿದಿದ್ದರು. ಇದು ಪಕ್ಷದೊಳಗೆ ಸಾಕಷ್ಟು ಅಸಮಾಧಾನವನ್ನು ಸೃಷ್ಟಿಸಿತ್ತು.

ಚಾರ್ಟೆಡ್​ ಅಕೌಂಟೆಂಟ್​ ಆಗಿರುವ ರಾಘವ್​ ಚಡ್ಡಾ ಅವರು 2012ರಿಂದ ಎಎಪಿಯಲ್ಲಿದ್ದಾರೆ. ಅರವಿಂದ್​ ಕೇಜ್ರಿವಾಲ್​ ಇವರಿಗೆ ಆಪ್ತರು ಪರಿಗಣಿಸಲಾಗಿದೆ.ಎಎಪಿಯ ಖಜಾಂಚಿಯಾಗಿ ಸೇವೆ ಸಲ್ಲಿಸಿದ್ದಾರೆ.2023ರಿಂದ ಎಎಪಿಯ ರಾಜ್ಯಸಭಾ ಉಪನಾಯಕನಾಗಿ ಅವರು ಸೇವೆಯಲ್ಲಿದ್ದರು, (ಏಜೆನ್ಸೀಸ್)