ಪಾಕಿಸ್ತಾನ ಮತ್ತೆ ಭಯೋತ್ಪಾದನೆಯ ದುಸ್ಸಾಹಸಕ್ಕೆ ಕೈಹಾಕಿದರೆ ಅವರ ಮನೆಗೆ ನುಗ್ಗಿ ಹೊಡೆಯುತ್ತೇವೆ: ಪ್ರಧಾನಿ ಮೋದಿ | Narendra Modi

ದೆಹಲಿಯ ಶ್ರೀರಾಮ್ ಕಾಲೇಜ್ ಆಫ್ ಕಾಮರ್ಸ್ (SRCC) ನ ಶತಾಬ್ದಿ ಸಮಾರಂಭದಲ್ಲಿ ಭಾಗವಹಿಸಿ ಮಾತನಾಡಿದ ಪ್ರಧಾನಿ ಮೋದಿ, ಜಮ್ಮು ಮತ್ತು ಕಾಶ್ಮೀರದಿಂದ ಹಿಡಿದು ಈಶಾನ್ಯ ರಾಜ್ಯಗಳವರೆಗೆ ಶಾಂತಿ ಹೆಚ್ಚಾಗಿದೆ. ಮಾವೋವಾದಿ ಭಯೋತ್ಪಾದನೆ ಮತ್ತು ನಕ್ಸಲಿಸಂನ ಬೆನ್ನೆಲುಬು ಮುರಿಯಲಾಗಿದೆ. ಒಂದೊಮ್ಮೆ ಭಾರತದ ನೀತಿ ಪಾರ್ಶ್ವವಾಯು ಬಗ್ಗೆ ಕಳವಳ ವ್ಯಕ್ತಪಡಿಸುತ್ತಿದ್ದ ಜಗತ್ತು, ಇಂದು ಭಾರತದ ನೀತಿ ಗತಿಶೀಲತೆ ಬಗ್ಗೆ ಮಾತನಾಡುತ್ತಿದೆ ಎಂದರು.

ಇಲ್ಲಿನ ಹಳೆಯ ವಿದ್ಯಾರ್ಥಿಗಳ ಬಗ್ಗೆ ಮಾತನಾಡುತ್ತಾ, ಧುರಂಧರ್ ನಾ ಹೊ, ಲೇಕಿನ್ ಧೂಮ್ ತೋ ಮಚಾಯಿ ಹೈ (ಧುರಂಧರರಲ್ಲದಿರಬಹುದು, ಆದರೆ ಧೂಳೆಬ್ಬಿಸಿದ್ದಾರೆ) ಹಾಗೂ ಅವರು ಪ್ರತಿಯೊಂದು ಕ್ಷೇತ್ರದಲ್ಲೂ ತಮ್ಮ ಮುದ್ರೆಯನ್ನು ಒತ್ತಿದ್ದಾರೆ ಎಂದರು. ಇಂದಿನ ಸಂದರ್ಭವು ಶ್ರೀರಾಮ್ ಕಾಲೇಜ್ ಆಫ್ ಕಾಮರ್ಸ್‌ಗೆ ಅತ್ಯಂತ ಐತಿಹಾಸಿಕವಾಗಿದ್ದು, ಇದು ದೇಶದ ಶಿಕ್ಷಣ ಕ್ಷೇತ್ರಕ್ಕೂ ಅಷ್ಟೇ ಮಹತ್ವದ್ದಾಗಿದೆ. ಶ್ರೀರಾಮ್ ಕಾಲೇಜ್ ಭಾಗವಾಗಿದ್ದ ಹಲವಾರು ತಲೆಮಾರುಗಳು ಇಲ್ಲಿ ಒಂದೆಡೆ ಸೇರಿವೆ ಎಂದು ಹೇಳಿದರು.

ಎಸ್ಆರ್​ಸಿಸಿಯ ಹಳೆಯ ವಿದ್ಯಾರ್ಥಿಗಳು ಬಹಳ ವಿಶೇಷವಾದವರು. ನಿಮ್ಮ ಭಾಷೆಯಲ್ಲಿ ಹೇಳುವುದಾದರೆ, ಇಲ್ಲಿನ ಹಳೆಯ ವಿದ್ಯಾರ್ಥಿಗಳು ಒಜಿಗಳು. ಅವರು ಪ್ರಪಂಚದಾದ್ಯಂತ ಈ ಕಾಲೇಜಿನ ಹೆಸರನ್ನು ಕೊಂಡೊಯ್ದು, ವಿವಿಧ ಕ್ಷೇತ್ರಗಳಲ್ಲಿ ತಮಗಾಗಿಯೇ ಒಂದು ಗುರುತನ್ನು ಗಿಟ್ಟಿಸಿಕೊಂಡಿದ್ದಾರೆ. ನಮ್ಮ ಅರುಣ್ ಜೇಟ್ಲಿ ಜಿ ಅವರು ಸಹ ಇಲ್ಲೇ ಓದಿದ್ದರು. ಅವರೊಂದಿಗಿನ ಭೇಟಿಯಲ್ಲಿ ತಮ್ಮ ಎಸ್ಆರ್​ಸಿಸಿ ದಿನಗಳ ನೆನಪುಗಳನ್ನು ಹಂಚಿಕೊಳ್ಳದ ಯಾವುದೇ ಸಭೆ ಇರಲಿಲ್ಲ ಎಂದು ನಾನು ಹೇಳಬಲ್ಲೆ ಎಂದು ಪ್ರಧಾನಿ ಮೋದಿ ಹೇಳಿದರು.

ಕೆಲವೊಮ್ಮೆ ಅವರು ಒಂದೇ ಘಟನೆಯನ್ನು ಮತ್ತೆ ಮತ್ತೆ ಹೇಳುತ್ತಿದ್ದ ಕಾರಣ ನನಗೆ ಆಯಾಸವಾಗುತ್ತಿತ್ತು. ಇಂದಿಗೂ ನನ್ನ ತಂಡದ ಭಾಗವಾಗಿರುವ ಸಂಜೀವ್ ಸನ್ಯಾಲ್ ಅವರು ಎಸ್ಆರ್​ಸಿಸಿಯ ಹಳೆಯ ವಿದ್ಯಾರ್ಥಿ. ಇಲ್ಲಿ ಓದಿದ ಅನೇಕ ಇತರ ಸಹೋದ್ಯೋಗಿಗಳು ನಮಗಿದ್ದಾರೆ. ಮತ್ತು ಎಸ್ಆರ್​ಸಿಸಿ ಅರ್ಥಶಾಸ್ತ್ರದ ಜಗತ್ತಿನ ಜನರನ್ನು ಮಾತ್ರ ನೀಡಿದೆ ಎಂದಲ್ಲ. ಕಲಾವಿದರಿಂದ ಹಿಡಿದು ರಾಜಕಾರಣಿಗಳು, ವಕೀಲರು ಮತ್ತು ನ್ಯಾಯಾಧೀಶರವರೆಗೆ ಪ್ರತಿಯೊಂದು ಕ್ಷೇತ್ರದ ಜನರೂ ಇಲ್ಲಿಂದ ಹೊರಹೊಮ್ಮಿದ್ದಾರೆ ಎಂದು ಪ್ರಧಾನಿ ಮೋದಿ ತಿಳಿಸಿದರು(ಏಜೆನ್ಸೀಸ್).