ಮೋದಿಯ ಆ 'ಕಿಕ್​' ಕೋಲ್ಕತ್ತಾದಲ್ಲಿ ಗೋಲ್ ಆಗುತ್ತಾ..? ಸಿಕ್ಕಿಂನಲ್ಲಿ ನಿಂತು ಬಂಗಾಳಿ ಶೈಲಿಯ ರಾಜಕೀಯ ತಂತ್ರಗಾರಿಕೆ ಹೆಣೆದ ನಮೋ Narendra Modi

ಸಾಮಾನ್ಯವಾಗಿ ಕುರ್ತಾ ಮತ್ತು ಜಾಕೆಟ್​ನಲ್ಲಿ ಕಾಣಿಸಿಕೊಳ್ಳುವ ಪ್ರಧಾನಿ ಮೋದಿ, ಗ್ಯಾಂಗ್ಟಾಕ್​ನಲ್ಲಿ ಪೂರ್ಣ ಪ್ರಮಾಣದ ಸ್ಪೋರ್ಟ್ಸ್​ ಡ್ರೆಸ್​ ಕೋಡ್​​ನಲ್ಲಿ ಮಿಂಚಿದರು. ಟ್ರ್ಯಾಕ್ ಪ್ಯಾಂಟ್, ಟಿ-ಶರ್ಟ್ ಮತ್ತು ಕಾಲಿಗೆ ಫುಟ್ಬಾಲ್ ಸ್ಪೈಕ್ಸ್ ಧರಿಸಿದ್ದ ಮೋದಿಯವರನ್ನು ಕಂಡು ಸ್ಥಳೀಯರು ಮತ್ತು ಯುವ ಕ್ರೀಡಾಪಟುಗಳು ಆಶ್ಚರ್ಯಚಕಿತರಾದರು.

ತಮ್ಮ ಎಕ್ಸ್​ ಖಾತೆಯಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಪ್ರಧಾನಿ ನರೇಂದ್ರ ಮೋದಿ, ಸುಂದರವಾದ ಗ್ಯಾಂಗ್ಟಾಕ್ ಬೆಳಿಗ್ಗೆ ಸಿಕ್ಕಿಂನಲ್ಲಿರುವ ನನ್ನ ಯುವ ಸ್ನೇಹಿತರೊಂದಿಗೆ ಫುಟ್‌ಬಾಲ್ ಆಡುವುದಕ್ಕಿಂತ ಮಿಗಿಲಾದದ್ದು ಯಾವುದೂ ಇಲ್ಲ! ಎಂದು ಬರೆದು ತಮ್ಮ ಸಂತೋಷವನ್ನು ವ್ಯಕ್ತಪಡಿಸಿದ್ದಾರೆ.

ಈ ಸಮಯವನ್ನು ಗಮನಿಸಿದರೆ ಇದರ ಹಿಂದೆ ದೊಡ್ಡ ಮಟ್ಟದ ತಂತ್ರಗಾರಿಕೆ ಇರುವುದು ಸ್ಪಷ್ಟವಾಗುತ್ತದೆ. ಸಿಕ್ಕಿಂನ ನೆರೆಯ ರಾಜ್ಯವಾದ ಪಶ್ಚಿಮ ಬಂಗಾಳದಲ್ಲಿ ಸದ್ಯ ಚುನಾವಣಾ ಕಾವು ಜೋರಾಗಿದ್ದು, ಅಲ್ಲಿ ಫುಟ್ಬಾಲ್ ಕೇವಲ ಒಂದು ಕ್ರೀಡೆಯಲ್ಲ, ಅದು ಅಲ್ಲಿನ ಜನರ ಸಾಂಸ್ಕೃತಿಕ ಅಸ್ಮಿತೆ ಮತ್ತು ಭಾವನೆಯ ಭಾಗವಾಗಿದೆ.

ಬಂಗಾಳ ಮತದಾರರ ಮನಗೆಲ್ಲಲು ಪ್ರಧಾನಿಯವರು ಈ ಸಮಯವನ್ನು ಅತ್ಯಂತ ಚತುರತೆಯಿಂದ ಬಳಸಿಕೊಂಡಿದ್ದಾರೆ ಎಂಬ ವಿಶ್ಲೇಷಣೆಗಳು ಕೇಳಿಬರುತ್ತಿದ್ದು, ಕ್ರೀಡೆ ಮತ್ತು ಸಂಸ್ಕೃತಿಯ ಮೇಲಿನ ಪ್ರೀತಿ ರಕ್ತದಲ್ಲೇ ಹರಿಯುವ ಬಂಗಾಳಿ ಜನತೆಗೆ ಸಿಕ್ಕಿಂನ ಈ ಕಾರ್ಯಕ್ರಮದ ಮೂಲಕ ಒಂದು ಸೂಕ್ಷ್ಮ ಹಾಗೂ ಸಕಾಲಿಕ ಸಂದೇಶವನ್ನು ರವಾನಿಸಲಾಗಿದೆ. ಅಭಿವೃದ್ಧಿಯ ಮಂತ್ರದ ಜೊತೆಗೆ ಭಾವನಾತ್ಮಕ ಅಸ್ತ್ರ ಹೂಡುವ ಈ ಪ್ರಯತ್ನ, ಪ್ರಧಾನಿಯವರು ನಡೆಸಿದ ಮಾಸ್ಟರ್ ಸ್ಟ್ರೋಕ್ ಎಂದೇ ವಿಶ್ಲೇಷಿಸಲಾಗುತ್ತಿದೆ.

2021 ರ ವಿಧಾನಸಭಾ ಚುನಾವಣೆಯ ಸಮಯದಲ್ಲಿ ಬಂಗಾಳದಲ್ಲಿ ನಡೆದ ರ‍್ಯಾಲಿಯಲ್ಲಿ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ವೀಲ್​ಚೇರ್​ನಲ್ಲಿ ಕುಳಿತು ಖೇಲಾ ಹೋಬೆ ಎಂಬ ಘೋಷಣೆಗಳ ನಡುವೆ ಫುಟ್‌ಬಾಲ್ ಎಸೆಯುತ್ತಿರುವ ಚಿತ್ರವು ಎಲ್ಲೆಡೆ ವೈರಲ್ ಆಗಿತ್ತು. ಆದಾಗ್ಯೂ, ಆ ಚಿತ್ರ ಮತದಾರರೊಂದಿಗೆ ಬಲವಾಗಿ ಸಂಪರ್ಕ ಹೊಂದಿರುವುದರಿಂದ ಪ್ರಚಾರದ ರಾಜಕೀಯ ಮನಸ್ಥಿತಿಯನ್ನು ರೂಪಿಸಲು ಸಹಾಯ ಮಾಡಿತು (ಏಜೆನ್ಸೀಸ್​).