ಬಟಿಂಡಾ: ಮಾದಕ ವಸ್ತುಗಳ ವಿರುದ್ಧ ನಿರಂತರವಾಗಿ ಹೋರಾಟ ನಡೆಸಿಕೊಂಡು ಬಂದಿದ್ದ ಪಂಜಾಬ್ನ ಪರ್ವಿಂದರ್ ಸಿಂಗ್ ಝೋಟಾ (Parwinder Singh Jhota), ಮಂಗಳವಾರ (ಅ.13) ಮೆಡಿಕಲ್ ಸ್ಟೋರ್ನಲ್ಲಿ ನಡೆಸುತ್ತಿದ್ದ ಸ್ಟಿಂಗ್ ಆಪರೇಷನ್ ವೇಳೆ ಕಿಡಿಗೇಡಿಗಳ ಗುಂಡಿಗೆ ಬಲಿಯಾಗಿದ್ದಾರೆ.
ಮಾನ್ಸಾ ನಗರದಲ್ಲಿರುವ ಮೆಡಿಕಲ್ ಸ್ಟೋರ್ನಲ್ಲಿ ಡ್ರಗ್ಸ್ ಮಾರಾಟವಾಗುತ್ತಿರುವ ಬಗ್ಗೆ ಮಾಹಿತಿ ಪಡೆದಿದ್ದ ಪರ್ವಿಂದರ್, ಇದನ್ನು ಹೇಗಾದರೂ ಮಾಡಿ ಬಟಾಬಯಲು ಮಾಡಬೇಕು ಮತ್ತು ಆರೋಪಿಗಳಿಗೆ ತಕ್ಕ ಶಿಕ್ಷೆ ಕೊಡಿಸಬೇಕು ಎಂಬ ಮಹತ್ವದ ಉದ್ದೇಶದಲ್ಲಿ ಕೈಗೊಂಡ ಸ್ಟಿಂಗ್ ಆಪರೇಷನ್ ಇದೀಗ ಅವರ ಜೀವವನ್ನೇ ಬಲಿ ಪಡೆದಿದೆ.
ಮಂಗಳವಾರ ಬೆಳಗ್ಗೆ ಮೆಡಿಕಲ್ ಸ್ಟೋರ್ ಒಂದರಿಂದ ಸಿಂಥೆಟಿಕ್ ಡ್ರಗ್ಸ್ ಖರೀದಿಸಿದ್ದ ವ್ಯಕ್ತಿಯೊಬ್ಬರನ್ನು ಝೋಟಾ ಭೇಟಿಯಾಗಿದ್ದರು. ಕೂಡಲೇ ಆ ವ್ಯಕ್ತಿಯನ್ನು ಕರೆದುಕೊಂಡು ನೇರವಾಗಿ ಆ ಮೆಡಿಕಲ್ ಸ್ಟೋರ್‌ಗೆ ಹೋದ ಝೋಟಾ, ನಿಷೇಧಿತ ವಸ್ತುಗಳನ್ನು ಯಾಕೆ ಮಾರಾಟ ಮಾಡುತ್ತಿದ್ದೀರಿ ಎಂದು ಅಂಗಡಿಯ ಮಾಲೀಕನನ್ನು ನೇರವಾಗಿ (ಅಂದರೆ ಆನ್ ದಿ ಕ್ಯಾಮರಾ) ಪ್ರಶ್ನಿಸಿದರು.
ಈ ವೇಳೆ, ಅಂಗಡಿ ಮಾಲೀಕ ಮತ್ತು ಸಿಂಗ್ ನಡುವೆ ತೀವ್ರ ಮಾತಿನ ಚಕಮಕಿ ನಡೆಯಿತು. ಮಾತಿಗೆ ಮಾತು ಬೆಳೆದಾಗ, ಎಲ್ಲಿ ತಮ್ಮ ಬಂಡವಾಳ ಬಯಲಾಗಿ ಬಿಡುತ್ತೋ ಎಂಬ ಭಯದಿಂದ ಕೆಮಿಸ್ಟ್ ಅಶ್ವನಿ ಕುಮಾರ್ ಎಂಬಾತ ಬಂದೂಕಿನಿಂದ ಪರ್ವಿಂದರ್ ಅವರಿಗೆ ಗುಂಡು ಹಾರಿಸಿದ್ದಾನೆ. ಗುಂಡೇಟು ಬಿದ್ದ ಕೂಡಲೇ ಸ್ಥಳದಿಂದ ಪ್ರಾಣ ಉಳಿಸಿಕೊಳ್ಳಲು ಓಡಿದ್ದೇ ಆದರೂ ಕುಸಿದು ಬಿದ್ದು ಸಾವನ್ನಪ್ಪಿದ್ದಾಗಿ ವರದಿಗಳು ಉಲ್ಲೇಖಿಸಿವೆ.
ಆ್ಯಂಟಿ-ಡ್ರಗ್ ಬ್ರಿಗೇಡ್‌ನ ಸಕ್ರಿಯ ಸದಸ್ಯರಾಗಿದ್ದ ಝೋಟಾ ಅವರ ಎದೆಗೆ ಗುಂಡು ತಗುಲಿದ ಪರಿಣಾಮ ಸ್ಥಳದಲ್ಲೇ ಸಾವಿಗೀಡಾಗಿದ್ದಾರೆ ಎಂದು ವೈದ್ಯರು ದೃಢಪಡಿಸಿದ್ದಾರೆ. ಘಟನೆಯ ಸಂಪೂರ್ಣ ದೃಶ್ಯವು ಸಿಂಗ್ ಅವರ ಬಳಿಯಿದ್ದ ಕ್ಯಾಮರಾದಲ್ಲಿ ಸೆರೆಯಾಗಿದೆ. ಇನ್ನು, ಕೃತ್ಯ ಎಸಗಿದ ಬಳಿಕ ಆರೋಪಿ ಅಶ್ವನಿ ಸ್ಥಳದಿಂದ ಪರಾರಿಯಾಗಿದ್ದಾನೆ. ತಲೆಮರಿಸಿಕೊಂಡಿರುವ ವ್ಯಕ್ತಿಯ ಪತ್ತೆಗೆ ಪೊಲೀಸ್ ತಂಡಗಳನ್ನು ರಚಿಸಲಾಗಿದೆ ಎಂದು ವರದಿಯಾಗಿದೆ.
ವರದಿಗಳ ಪ್ರಕಾರ, ಪರ್ವಿಂದರ್ ಸಿಂಗ್ ಹಲವು ವರ್ಷಗಳಿಂದ ಮಾದಕ ವಸ್ತುಗಳ ಹಾವಳಿಯ ವಿರುದ್ಧ ನಿರಂತರವಾಗಿ ಧ್ವನಿ ಎತ್ತುತ್ತಲೇ ಬಂದಿದ್ದರು. ಅಕ್ರಮ ಡ್ರಗ್ಸ್ ಮಾರಾಟಗಳಲ್ಲಿ ತೊಡಗಿದ್ದವರ ಹೆಡೆಮುರಿ ಕಟ್ಟಲು ತಮ್ಮ ಸ್ಟಿಂಗ್ ಆಪರೇಷನ್ ಮೂಲಕ ಪೊಲೀಸರಿಗೆ ದೊಡ್ಡ ಮೊಟ್ಟದಲ್ಲಿ ಸಹಾಯ ಮಾಡುತ್ತಿದ್ದರು. ಜತೆಗೆ ಈ ಮೂಲಕ ಸಾರ್ವಜನಿಕರಲ್ಲಿ ಜಾಗೃತಿ ಕೂಡ ಮೂಡಿಸುತ್ತಿದ್ದರು. ಆದರೆ, ಕೆಲವು ಮೆಡಿಕಲ್ ಸ್ಟೋರ್‌ಗಳು ನಿಷೇಧಿತ ಮಾದಕ ಮಾತ್ರೆಗಳು ಮತ್ತು ಸಿಂಥೆಟಿಕ್ ಡ್ರಗ್ಗಳನ್ನು ಅಕ್ರಮವಾಗಿ ಮಾರಾಟ ಮಾಡುತ್ತಿವೆ ಎಂದು ಆರೋಪಿಸಿ ಅವುಗಳ ವಿರುದ್ಧ ಧ್ವನಿ ಎತ್ತಲು ಮುಂದಾದಾಗ ಈ ದುರ್ಘಟನೆ ಸಂಭವಿಸಿದೆ,(ಏಜೆನ್ಸೀಸ್).