ತಂದೆಯ ನೆನಪಿಗಾಗಿ ನೀತಾ ಅಂಬಾನಿ ಅವರಿಂದ 'ಜೀವನ್' ವೈದ್ಯಕೀಯ ಕೇಂದ್ರ ಲೋಕಾರ್ಪಣೆ

ಈ ನೂತನ ಕೇಂದ್ರವು ಕ್ಯಾನ್ಸರ್ ಚಿಕಿತ್ಸೆ ಮತ್ತು ಡಯಾಲಿಸಿಸ್‌ಗಾಗಿ ಮೀಸಲಾದ ವಿಶೇಷ ವಿಭಾಗವಾಗಿದೆ. ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ನೀತಾ ಅಂಬಾನಿ, "ಸೇವೆಯೇ ಪರಮ ಧರ್ಮ ಎಂದು ನನ್ನ ತಂದೆ ಕಲಿಸಿದ್ದರು. ಒಬ್ಬ ಮಗಳಾಗಿ ತಂದೆಗೆ ಸಲ್ಲಿಸುತ್ತಿರುವ ಗೌರವ ಈ 'ಜೀವನ್' ಕೇಂದ್ರ" ಎಂದು ಭಾವುಕರಾಗಿ ನುಡಿದರು.

ಅತ್ಯಾಧುನಿಕ ಚಿಕಿತ್ಸೆ: ಇಲ್ಲಿ ಸುಧಾರಿತ ಕೀಮೋಥೆರಪಿ, ಇಮ್ಯುನೊಥೆರಪಿ ಮತ್ತು ಡಯಾಲಿಸಿಸ್ ಸೇರಿದಂತೆ ಹಲವು ಸಂಕೀರ್ಣ ವೈದ್ಯಕೀಯ ಸೇವೆಗಳು ಒಂದೇ ಸೂರಿನಡಿ ಲಭ್ಯವಿವೆ.

ಮಕ್ಕಳ ಕೀಮೋಥೆರಪಿ ವಾರ್ಡ್: ಈ ಕೇಂದ್ರದ ವಿಶೇಷ ಆಕರ್ಷಣೆ ಎಂದರೆ ಮಕ್ಕಳಿಗಾಗಿ ರೂಪಿಸಲಾದ ಕೀಮೋಥೆರಪಿ ವಿಭಾಗ. ಮಕ್ಕಳಲ್ಲಿನ ಆತಂಕವನ್ನು ದೂರ ಮಾಡಲು ಪ್ರಾಣಿ ಮತ್ತು ಪ್ರಕೃತಿಯ ವರ್ಣರಂಜಿತ ಚಿತ್ರಗಳೊಂದಿಗೆ ಈ ವಾರ್ಡ್ ಅನ್ನು ವಿನ್ಯಾಸಗೊಳಿಸಲಾಗಿದೆ.

ಸೇವಾ ಇತಿಹಾಸ: ಕಳೆದ ಹತ್ತು ವರ್ಷಗಳಲ್ಲಿ ರಿಲಯನ್ಸ್ ಫೌಂಡೇಶನ್ ಆಸ್ಪತ್ರೆಯು 33 ಲಕ್ಷಕ್ಕೂ ಹೆಚ್ಚು ರೋಗಿಗಳಿಗೆ ಚಿಕಿತ್ಸೆ ನೀಡಿದ್ದು, ಅದರಲ್ಲಿ 16 ಲಕ್ಷಕ್ಕೂ ಹೆಚ್ಚು ಮಕ್ಕಳು ಸೇರಿದ್ದಾರೆ ಎಂಬ ಮಹತ್ವದ ಮಾಹಿತಿಯನ್ನು ಅವರು ಹಂಚಿಕೊಂಡರು.

ಈ ಸಮಾರಂಭದಲ್ಲಿ ರಿಲಯನ್ಸ್ ಇಂಡಸ್ಟ್ರೀಸ್ ಮುಖ್ಯಸ್ಥ ಮುಖೇಶ್ ಅಂಬಾನಿ, ನೀತಾ ಅಂಬಾನಿ ಅವರ ತಾಯಿ ಪೂರ್ಣಿಮಾ ದಲಾಲ್, ಸಹೋದರಿ ಮಮತಾ ದಲಾಲ್ ಸೇರಿದಂತೆ ಅಂಬಾನಿ ಕುಟುಂಬದ ಸದಸ್ಯರು ಭಾಗವಹಿಸಿದ್ದರು.

ಬಡ ಮತ್ತು ಮಧ್ಯಮ ವರ್ಗದ ಜನರಿಗೆ ವಿಶ್ವದರ್ಜೆಯ ಆರೋಗ್ಯ ಸೌಲಭ್ಯಗಳನ್ನು ಕೈಗೆಟುಕುವ ದರದಲ್ಲಿ ಒದಗಿಸುವುದು ಈ ಕೇಂದ್ರದ ಮುಖ್ಯ ಉದ್ದೇಶವಾಗಿದೆ. ಪ್ರತಿ ಮಗುವೂ ಒಬ್ಬ ಧೈರ್ಯಶಾಲಿ ಯೋಧನಂತೆ ರೋಗದ ವಿರುದ್ಧ ಹೋರಾಡಿ ಗುಣಮುಖರಾಗಲಿ ಎಂದು ನೀತಾ ಅಂಬಾನಿ ಹಾರೈಸಿದರು,(ಏಜೆನ್ಸೀಸ್​).