ಸೂಕ್ತ ಸಂಗಾತಿಗಾಗಿ 10 ವರ್ಷದಿಂದ ಹುಡಕಾಟ: ಕೊನೆಗೆ ಪತ್ನಿಗಾಗಿ ವಿದ್ಯುತ್ ಕಂಬಗಳ ಮೊರೆ ಹೋದ ಪ್ರೊಫೆಸರ್! Nursing Professor

Nursing Professor : ಐದು ಸ್ನಾತಕೋತ್ತರ ಪದವಿಗಳು, ಸಹ ಪ್ರಾಧ್ಯಾಪಕರಾಗಿ ಉದ್ಯೋಗ ಭದ್ರತೆ ಮತ್ತು ಉತ್ತಮ ಕುಟುಂಬದ ಹಿನ್ನೆಲೆ ಇದ್ದರೂ, 43 ವರ್ಷದ ಕೆ.ಕೆ. ಅಜಿತ್ ಕುಮಾರ್ ಮಾತ್ರ ತಮ್ಮ ಬಾಳಿನ ಸಂಗಾತಿಗಾಗಿ ಹುಡುಕಾಡುವುದು ಇನ್ನೂ ನಿಂತಿಲ್ಲ. ಸೂಕ್ತ ಹೆಂಡತಿಗಾಗಿ ಅವರು ಮಾಡುತ್ತಿರುವ ಪ್ರಯತ್ನವು ದಶಕಗಳ ಸುದೀರ್ಘ ಹಾಗೂ ಹೈರಾಣಾಗಿಸುವ ಕಥೆಯಾಗಿ ಮಾರ್ಪಟ್ಟಿದೆ.

ಕಾಸರಗೋಡಿನ ಪೆರಿಯಾ ನರ್ಸಿಂಗ್ ಕಾಲೇಜಿನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಮತ್ತು ಚೆರುಪುಳ ಮೂಲದ ಅಜಿತ್ ಕುಮಾರ್, ತಮ್ಮ ಸಾಂಪ್ರದಾಯಿಕ ಮದುವೆ ಪ್ರಯತ್ನಗಳೆಲ್ಲ ವಿಫಲವಾದ ಹಿನ್ನೆಲೆಯಲ್ಲಿ ವಿಭಿನ್ನ ದಾರಿಯನ್ನು ಹಿಡಿದಿದ್ದಾರೆ. ತಾಳ್ಮೆ ಕಳೆದುಕೊಂಡ ಅವರು ಡಿಜಿಟಲ್ ಮ್ಯಾಟ್ರಿಮೋನಿ ಆ್ಯಪ್‌ಗಳನ್ನು ಸಂಪೂರ್ಣವಾಗಿ ಬದಿಗಿಟ್ಟು, ಸ್ಥಳೀಯ ವಿದ್ಯುತ್ ಕಂಬಗಳನ್ನೇ ತಮ್ಮ ವಿವಾಹದ ಜಾಹೀರಾತು ಫಲಕಗಳನ್ನಾಗಿ ಬದಲಾಯಿಸಿಕೊಂಡಿದ್ದಾರೆ.

ಮಲಯಾಳಂ, ಇಂಗ್ಲಿಷ್, ಹಿಂದಿ, ಬಂಗಾಳಿ, ಅಸ್ಸಾಮಿ, ನೇಪಾಳಿ, ಒಡಿಯಾ, ಪಂಜಾಬಿ ಮತ್ತು ಮರಾಠಿ ಸೇರಿದಂತೆ ಒಟ್ಟು ಒಂಬತ್ತು ಭಾಷೆಗಳಲ್ಲಿ ಈ ಪೋಸ್ಟರ್‌ಗಳನ್ನು ಮುದ್ರಿಸಲಾಗಿದ್ದು, ವ್ಯಾಪಕವಾಗಿ ವಧುವನ್ನು ಹುಡುಕುವ ಸಲುವಾಗಿ ವಲಸೆ ಕಾರ್ಮಿಕರ ನಡುವೆಯೂ ಇವುಗಳನ್ನು ಹಂಚಲಾಗಿದೆ. ವಿಶೇಷವೆಂದರೆ, ತಮಗೆ ಸೂಕ್ತ ವಧುವನ್ನು ಹುಡುಕಿಸಿಕೊಡುವವರಿಗೆ ಅವರು 20,000 ರೂಪಾಯಿ ನಗದು ಬಹುಮಾನವನ್ನೂ ಘೋಷಿಸಿದ್ದಾರೆ.

ಅಜಿತ್ ಅವರ ಈ ವಿನೂತನ ಅಭಿಯಾನಕ್ಕೆ ವಾಣಿಜ್ಯ ಮ್ಯಾಟ್ರಿಮೋನಿ ಸಂಸ್ಥೆಗಳ ಮೋಸ ಮತ್ತು ಅತಿಯಾದ ನಿರಾಶೆಯೇ ಪ್ರಮುಖ ಕಾರಣ. ಅವರ ಈ ಹುಡುಕಾಟವು 2009ರಲ್ಲಿ ಕೋಳಿಕ್ಕೋಡಿನ ಮ್ಯಾಟ್ರಿಮೋನಿ ಸಂಸ್ಥೆಯೊಂದರಲ್ಲಿ 2,000 ರೂ. ನೀಡಿ ನೋಂದಣಿ ಮಾಡಿಕೊಳ್ಳುವುದರೊಂದಿಗೆ ಪ್ರಾರಂಭವಾಯಿತು. ಆದರೆ ಸೂಕ್ತ ವಧುವಿನ ಪ್ರಸ್ತಾಪಗಳನ್ನು ನೀಡುವ ಬದಲು, "ಮದುವೆ ಎನ್ನುವುದು ದೈವಿಕ ಇಚ್ಛೆ, ಸ್ವಲ್ಪ ಕಾಯಿರಿ" ಎಂಬ ತತ್ವಜ್ಞಾನದ ಮಾತುಗಳು ಮಾತ್ರ ಅವರಿಗೆ ಸಿಕ್ಕವು.

ಎದೆಗುಂದದ ಅವರು ಸುಮಾರು ಹತ್ತು ವಿವಾಹ ದಲ್ಲಾಳಿ ಕಚೇರಿಗಳಲ್ಲಿ (ಮ್ಯಾರೇಜ್ ಬ್ಯೂರೋ) ನೋಂದಾಯಿಸಿಕೊಂಡು, ಶುಲ್ಕ ಪಾವತಿಸಿ ತಾಳ್ಮೆಯಿಂದ ಕಾದರು. ಆದರೂ ಯಾವುದೇ ಪ್ರಯೋಜನವಾಗದಿದ್ದಾಗ ಅಜಿತ್ ಯಾರೂ ಊಹಿಸದ ಕಠಿಣ ಹಾದಿಯನ್ನು ಹಿಡಿದರು. ಹಣ ಪಡೆದು ಯಾವುದೇ ಸೇವೆ ನೀಡದ ಹತ್ತಕ್ಕೂ ಹೆಚ್ಚು ಮ್ಯಾಟ್ರಿಮೋನಿ ಸಂಸ್ಥೆಗಳ ವಿರುದ್ಧ ಅವರು ನ್ಯಾಯಾಲಯದ ಮೊರೆ ಹೋದರು. ಈ ಕಾನೂನು ಹೋರಾಟಕ್ಕಾಗಿ ಅವರು 2 ಲಕ್ಷ ರೂ.ಗಳಿಗೂ ಹೆಚ್ಚು ಖರ್ಚು ಮಾಡಿದರು. ಅಂತಿಮವಾಗಿ 5 ಸಂಸ್ಥೆಗಳಿಂದ ಪರಿಹಾರವನ್ನು ಪಡೆದುಕೊಳ್ಳುವಲ್ಲಿ ಯಶಸ್ವಿಯಾದರೂ, ಕಾನೂನು ಹೋರಾಟದ ಗೆಲುವು ಮನೆಯಲ್ಲಿ ಒಬ್ಬ ಸಂಗಾತಿಯಿಲ್ಲದ ಖಾಲಿತನವನ್ನು ನೀಗಿಸಲಾರದು.

ಅಜಿತ್ ಕುಮಾರ್ ಅವರ ಶೈಕ್ಷಣಿಕ ಅರ್ಹತೆಗಳು ಅವರ ಪ್ರತಿಭೆಗೆ ಸಾಕ್ಷಿಯಾಗಿವೆ. ನರ್ಸಿಂಗ್‌ನಲ್ಲಿ ಎಂಎಸ್‌ಸಿ, ಸಮಾಜಶಾಸ್ತ್ರದಲ್ಲಿ ಎಂಎ, ಮನೋವಿಜ್ಞಾನದಲ್ಲಿ ಎಂಎಸ್‌ಸಿ, ಸಮಾಜ ಕಾರ್ಯದಲ್ಲಿ ಸ್ನಾತಕೋತ್ತರ ಪದವಿ (ಎಂಎಸ್‌ಡಬ್ಲ್ಯೂ) ಮತ್ತು ಸಾರ್ವಜನಿಕ ಆಡಳಿತದಲ್ಲಿ ಎಂಎ ಸೇರಿದಂತೆ ಅವರ ವಿದ್ಯಾರ್ಹತೆಗಳ ಪಟ್ಟಿ ದೊಡ್ಡದಿದೆ. ಇಷ್ಟೆಲ್ಲಾ ಪ್ರಭಾವಶಾಲಿ ಸಾಧನೆಗಳು ಮತ್ತು ಸ್ಥಿರವಾದ ಆದಾಯವಿದ್ದರೂ, ಅವರ ವೈಯಕ್ತಿಕ ಜೀವನ ಮಾತ್ರ ಇನ್ನೂ ನೆಲೆ ಕಂಡುಕೊಂಡಿಲ್ಲ.

ತಮ್ಮ ಮಗನಿಗೆ ಮದುವೆಯಾಗುವುದನ್ನು ನೋಡಬೇಕೆಂಬ ಆಸೆ ಈಡೇರದೆ ಕಳೆದ ನವಂಬರ್‌ನಲ್ಲಿ ಅಜಿತ್ ಅವರ ತಂದೆ ನಿಧನರಾದರು. ಇದು ಅವರ ಸಂಗಾತಿಯ ಹುಡುಕಾಟದ ತುರ್ತಿಗೆ ಇನ್ನಷ್ಟು ಭಾವನಾತ್ಮಕ ತೂಕವನ್ನು ತಂದುಕೊಟ್ಟಿದೆ. ಈಗ ವೃದ್ಧರಾದ ತಾಯಿ ಅವರನ್ನು ಅವಲಂಬಿಸಿರುವುದರಿಂದ, ಅವರ ಈ ಪ್ರಯತ್ನವು ಬಹಳ ವೈಯಕ್ತಿಕ ಹಾಗೂ ವಾಸ್ತವಿಕ ನೆಲೆಗಟ್ಟಿನಲ್ಲಿದೆ.

ಅವರ ಈ ವಿಭಿನ್ನ ಸಾರ್ವಜನಿಕ ಜಾಹೀರಾತುಗಳನ್ನು ರಸ್ತೆ ಬದಿಯ ಕಂಬಗಳಲ್ಲಿ ನೋಡಿ ಕೆಲವರು ಕುತೂಹಲದಿಂದ ಅಥವಾ ಗೇಲಿ ಮಾಡಲು ಕರೆ ಮಾಡಿದರೂ, ಅಜಿತ್ ಮಾತ್ರ ಈ ಯಾವುದಕ್ಕೂ ತಲೆಕೆಡಿಸಿಕೊಳ್ಳದೆ ಅಚಲರಾಗಿದ್ದಾರೆ. ನಂಬರ್ ನೋಡಿ ಪರಿಚಯಸ್ಥರೇ ಕೆಲವೊಮ್ಮೆ ಗೇಲಿ ಮಾಡಲು ಕರೆ ಮಾಡುತ್ತಾರೆ ಎಂದು ಅಜಿತ್ ಹೇಳುತ್ತಾರೆ. ನಾನು ಅದ್ಯಾವುದನ್ನೂ ಗಂಭೀರವಾಗಿ ಪರಿಗಣಿಸುವುದಿಲ್ಲ, ತಾಯಿ ವಯಸ್ಸಾಗುತ್ತಿದ್ದಾರೆ. ನನಗೆ ಒಬ್ಬ ಒಳ್ಳೆಯ ಸಂಗಾತಿ ಬೇಕು. ಅಷ್ಟೇ ನನ್ನ ಏಕೈಕ ಆಸೆ ಎಂದು ಅಜಿತ್​ ಹೇಳಿದ್ದಾರೆ, (ಏಜೆನ್ಸೀಸ್​).