- ಹೊಸ ಆಧಾರ್ ಕಾರ್ಡ್ಗಳನ್ನು ಪರಿಚಯಿಸಲಿರುವ ಸರ್ಕಾರ
- ಕಾರ್ಡ್ದಾರರ ಫೋಟೋ ಮತ್ತು QR ಕೋಡ್ ಅನ್ನು ಮಾತ್ರ ಪ್ರಿಂಟ್
ನವದೆಹಲಿ: ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರ (UIDAI) ಹೊಸ ಆಧಾರ್ ಕಾರ್ಡ್ಗಳನ್ನು ಪರಿಚಯಿಸಲಿದೆ. ಹೌದು, ಹೊಸ ಪ್ರಸ್ತಾವನೆಯಡಿಯಲ್ಲಿ, ಆಧಾರ್ ಕಾರ್ಡ್ಗಳು ಕಾರ್ಡ್ದಾರರ ಫೋಟೋ ಮತ್ತು QR ಕೋಡ್ ಅನ್ನು ಮಾತ್ರ ಪ್ರದರ್ಶಿಸುತ್ತವೆ. ಆದರೆ ಹೆಸರು, ವಿಳಾಸ ಮತ್ತು ಆಧಾರ್ ಸಂಖ್ಯೆಯನ್ನು ಕಾಣುವುದಿಲ್ಲ. ಆಧಾರ್ ಕಾರ್ಡ್ಗಳ ಸುರಕ್ಷತೆಯನ್ನು ಹೆಚ್ಚಿಸಲು ಭಾರತ ಸರ್ಕಾರ ಮಹತ್ವದ ಬದಲಾವಣೆಯನ್ನು ಯೋಜಿಸಿದೆ.
ವೈಯಕ್ತಿಕ ಮಾಹಿತಿಯ ದುರುಪಯೋಗವನ್ನು ತಡೆಗಟ್ಟಲು ಮತ್ತು ಆಫ್ಲೈನ್ ಪರಿಶೀಲನೆಯನ್ನು ನಿರುತ್ಸಾಹಗೊಳಿಸಲು ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರ (UIDAI) ಈ ಬದಲಾವಣೆಯನ್ನು ಪರಿಗಣಿಸುತ್ತಿದೆ ಎಂದು ವರದಿಯಾಗಿದೆ.
ಆಧಾರ್ ಸಮ್ಮೇಳನದಲ್ಲಿ, ಯುಐಡಿಎಐ ಸಿಇಒ ಭವೇಶ್ ಕುಮಾರ್ ಅವರು ಡಿಸೆಂಬರ್ 2025 ರಲ್ಲಿ ಈ ನಿಯಮವನ್ನು ಪರಿಚಯಿಸುವ ಗುರಿಯನ್ನು ಹೊಂದಿದ್ದಾರೆ ಎಂದು ಘೋಷಿಸಿದರು.
ಹೊಸ ಆಧಾರ್ ಕಾರ್ಡ್ ಹೇಗಿರುತ್ತದೆ?
ಕೇವಲ ಒಂದು ಫೋಟೋ ಮತ್ತು QR ಕೋಡ್ ಹೊಂದಿರುವ ಈ ಹೊಸ ಕಾರ್ಡ್ಗಳು ಎಲ್ಲಾ ಅಗತ್ಯ ಮಾಹಿತಿಯನ್ನು ಸುರಕ್ಷಿತವಾಗಿ ಸಂಗ್ರಹಿಸುತ್ತವೆ. ಹೀಗಾಗಿ ಗೌಪ್ಯತೆಯನ್ನು ಹೆಚ್ಚಿಸುತ್ತವೆ ಮತ್ತು ವಯಸ್ಸಿನ ಪರಿಶೀಲನೆಯನ್ನು ಸರಳಗೊಳಿಸುತ್ತವೆ. ಕಾರ್ಡ್ನಲ್ಲಿ ಬೇರೆ ಯಾವುದೇ ವಿವರಗಳ ಅಗತ್ಯವನ್ನು ನಾವು ಪ್ರಶ್ನಿಸುತ್ತಿದ್ದೇವೆ. ಹೆಚ್ಚಿನ ಮಾಹಿತಿಯನ್ನು ಮುದ್ರಿಸಿದರೆ, ದುರುಪಯೋಗವಾಗುವ ಸಾಧ್ಯತೆ ಹೆಚ್ಚು ಎಂದು ಕುಮಾರ್ ತಿಳಸಿದ್ದಾರೆ.
ಯಾರಾದರೂ ನಿಮ್ಮ ಆಧಾರ್ ಕಾರ್ಡ್ ಅನ್ನು ನೋಡಿದರೂ ಅಥವಾ ಅದರ ಛಾಯಾಚಿತ್ರವನ್ನು ತೆಗೆದುಕೊಂಡರೂ ಸಹ, ಯಾವುದೇ ವ್ಯಕ್ತಿ, ಸಂಸ್ಥೆ, ಕಚೇರಿ ಅಥವಾ ಕಂಪನಿಯು ನಿಮ್ಮ ವೈಯಕ್ತಿಕ ಮಾಹಿತಿಯನ್ನು ಪ್ರವೇಶಿಸಲು ಸಾಧ್ಯವಾಗುವುದಿಲ್ಲ. ವಿಶೇಷವಾಗಿ ಹೋಟೆಲ್ಗಳು, ಟೆಲಿಕಾಂ ಸಿಮ್ ಮಾರಾಟಗಾರರು, ಸಮ್ಮೇಳನ ಅಥವಾ ಸೆಮಿನಾರ್ ಆಯೋಜಕರು ಇನ್ನು ಮುಂದೆ ನಿಮ್ಮ ಆಧಾರ್ನ ಛಾಯಾಚಿತ್ರಗಳನ್ನು ದುರುಪಯೋಗಪಡಿಸಿಕೊಳ್ಳಲು ಸಾಧ್ಯವಾಗುವುದಿಲ್ಲ.
ಆಧಾರ್ ಪರಿಶೀಲನೆಗೆ ನಿಯಮ ಏನು?
ಭಾರತದಲ್ಲಿ ಆಧಾರ್ ಪರಿಶೀಲನೆಗೆ ಆಧಾರ್ ಹೊಂದಿರುವವರ ಒಪ್ಪಿಗೆಯ ಅಗತ್ಯವಿರುತ್ತದೆ ಮತ್ತು ಒಪ್ಪಿಗೆಯಿಲ್ಲದೆ ಪರಿಶೀಲನೆ ನಡೆಸುವ ಯಾವುದೇ ಸಂಸ್ಥೆಯು 1 ಕೋಟಿ ರೂ.ಗಳವರೆಗೆ ದಂಡವನ್ನು ಎದುರಿಸಬೇಕಾಗುತ್ತದೆ. ಒಪ್ಪಿಗೆಯನ್ನು ಬಯೋಮೆಟ್ರಿಕ್ ಅಥವಾ ಎಲೆಕ್ಟ್ರಾನಿಕ್ ರೂಪದಲ್ಲಿ ನೀಡಬೇಕು, ಉದಾಹರಣೆಗೆ OTP, ಫಿಂಗರ್ಪ್ರಿಂಟ್ ಅಥವಾ ಐರಿಸ್ ಸ್ಕ್ಯಾನ್ ಮೂಲಕ ಮಾತ್ರ ನೀಡಬೇಕು. ಇಲ್ಲವಾದರೆ ದಂಡ ಖಚಿತವಾಗಲಿದೆ(ಏಜೆನ್ಸೀಸ್).