Maharashtra Politics | ಶರದ್ ಬಣ ಎನ್ಡಿಎ ಸೇರ್ಪಡೆಯಾಗೋದು ಪಕ್ಕಾನಾ..? ಏಕನಾಥ್ ಶಿಂಧೆ ಭೇಟಿಯಾದ ಜಯಂತ್ ಪಾಟೀಲ್, ಆವ್ಹಾದ್; ಅಧಿಕಾರ ಹಂಚಿಕೆಯೂ ಫೈನಲ್..?
ಮುಂಬೈ: ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷದ (ಶರದ್ ಪವಾರ್ ಬಣ) ಹಿರಿಯ ನಾಯಕರಾದ ಜಿತೇಂದ್ರ ಆವ್ಹಾದ್ ಮತ್ತು ಜಯಂತ್ ಪಾಟೀಲ್ ಅವರು ಗುರುವಾರ ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ಏಕನಾಥ್ ಶಿಂಧೆ ಅವರನ್ನು ಭೇಟಿಯಾಗಿದ್ದಾರೆ. ಈ ಭೇಟಿಯು ಎನ್ಸಿಪಿ (ಎಸ್ಪಿ) ಪಕ್ಷವು ಎನ್ಡಿಎ ಮೈತ್ರಿಕೂಟಕ್ಕೆ ಸೇರ್ಪಡೆಯಾಗಲಿದೆ ಎಂಬ ವದಂತಿಗಳ ನಡುವೆಯೇ ನಡೆದಿದೆ ಎಂದು ಮೂಲಗಳು ತಿಳಿಸಿವೆ. ಮುಂಬೈನಲ್ಲಿರುವ ಶಿಂಧೆ ಅಧಿಕೃತ ನಿವಾಸ ನಂದನವನ್ ಬಂಗಲೆಯಲ್ಲಿ ನಡೆದ ಈ ಸಭೆಯು ಸುಮಾರು ಒಂದು ಗಂಟೆಯ ಕಾಲ ನಡೆದಿದೆ.
ಬಿಜೆಪಿ, ಶಿವಸೇನೆ ಮತ್ತು ಸುನೇತ್ರಾ ಪವಾರ್ ಅವರ ಎನ್ಸಿಪಿ ಒಳಗೊಂಡಿರುವ ಎನ್ಡಿಎ ಒಕ್ಕೂಟಕ್ಕೆ ಎನ್ಸಿಪಿ (ಎಸ್ಪಿ) ಸೇರಿದರೆ ಅಧಿಕಾರ ಹಂಚಿಕೆ ವ್ಯವಸ್ಥೆ ಹೇಗಿರಬೇಕು ಎಂಬ ಬಗ್ಗೆ ಈ ಮೂವರು ನಾಯಕರು ಚರ್ಚಿಸಿದ್ದಾರೆ ಎನ್ನಲಾಗಿದೆ. ಇದರೊಂದಿಗೆ ಖಾತೆ ಹಂಚಿಕೆಯ ಬಗ್ಗೆಯೂ ಮಾತುಕತೆ ನಡೆದಿದೆ ಎಂದು ಮೂಲಗಳು ತಿಳಿಸಿವೆ.
ವದಂತಿಗಳನ್ನು ತಳ್ಳಿಹಾಕಿದ ನಾಯಕರು
ಆದರೆ, ಜಯಂತ್ ಪಾಟೀಲ್ ಮತ್ತು ಜಿತೇಂದ್ರ ಆವ್ಹಾದ್ ಇಬ್ಬರೂ ಎನ್ಸಿಪಿ (ಎಸ್ಪಿ) ಪಕ್ಷವು ಎನ್ಸಿಪಿ ಜೊತೆ ವಿಲೀನವಾಗುತ್ತದೆ ಮತ್ತು ಎನ್ಡಿಎ ಸೇರುತ್ತದೆ ಎಂಬ ವದಂತಿಗಳನ್ನು ಸಂಪೂರ್ಣವಾಗಿ ತಳ್ಳಿಹಾಕಿದ್ದಾರೆ. ತಾವು ಕೇವಲ ತಮ್ಮ ತಮ್ಮ ವಿಧಾನಸಭಾ ಕ್ಷೇತ್ರಗಳಿಗೆ ಸಂಬಂಧಿಸಿದ ಸಮಸ್ಯೆಗಳ ಬಗ್ಗೆ ಚರ್ಚಿಸಲು ಮಾತ್ರ ಶಿಂಧೆ ಅವರನ್ನು ಭೇಟಿ ಮಾಡಿದ್ದಾಗಿ ಅವರು ಸ್ಪಷ್ಟಪಡಿಸಿದ್ದಾರೆ. ಅಲ್ಲದೆ, ಮುನ್ಸಿಪಲ್ ಕೌನ್ಸಿಲ್ ಅಧ್ಯಕ್ಷರೊಬ್ಬರ ಅನರ್ಹತೆಗೆ ಸಂಬಂಧಿಸಿದಂತೆ ತಾವು ಈ ಹಿಂದೆ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್ ಅವರನ್ನೂ ಭೇಟಿಯಾಗಿದ್ದಾಗಿ ತಿಳಿಸಿದ್ದಾರೆ.
7,200 ಮತಗಳ ಅಂತರದಿಂದ ಗೆದ್ದ ಕೌನ್ಸಿಲರ್ ವಿಷಯಕ್ಕೆ ಸಂಬಂಧಿಸಿದಂತೆ ಯಾರೋ ಒಬ್ಬರು ಅರ್ಜಿ ಸಲ್ಲಿಸಿದ್ದರು ಮತ್ತು ಸಾಂಗ್ಲಿ ಜಿಲ್ಲಾಧಿಕಾರಿಗಳು ಅವರನ್ನು ಅನರ್ಹಗೊಳಿಸಿದ್ದರು. ಈಗ ಅವರು ಮೇಲ್ಮನವಿ ಸಲ್ಲಿಸಿದ್ದಾರೆ. ಅವರ ವಿರುದ್ಧ ಕೈಗೊಂಡ ಕ್ರಮವು ಸರಿಯಾದ ರೀತಿಯಲ್ಲಿ ನಿರ್ವಹಿಸಲ್ಪಟ್ಟಿಲ್ಲ ಎಂದು ನಮಗೆ ಅನಿಸುತ್ತದೆ, ಆದ್ದರಿಂದ ಈ ವಿಷಯವನ್ನು ಸಿಎಂ,ಡಿಸಿಎಂ ಗಮನಕ್ಕೆ ತರುವುದು ಅನಿವಾರ್ಯವಾಗಿತ್ತು ಎಂದು
ಕ್ಷೇತ್ರ ಪುನರ್ವಿಂಗಡಣೆ ಮಸೂದೆಗೆ ಬೆಂಬಲ..?
ಶರದ್ ಪವಾರ್ ಬಣ ಎನ್ಸಿಪಿ ಜೊತೆ ವಿಲೀನಗೊಂಡು ಎನ್ಡಿಎ ಸೇರಬಹುದು ಎಂಬ ಚರ್ಚೆಗಳು ನಡೆಯುತ್ತಿವೆ. ಮುಂಬರುವ ಸಂಸತ್ತಿನ ಮುಂಗಾರು ಅಧಿವೇಶನದಲ್ಲಿ ಸರ್ಕಾರವು ಕ್ಷೇತ್ರ ಪುನರ್ವಿಂಗಡಣೆ (ಡಿಲಿಮಿಟೇಶನ್) ಮಸೂದೆಯನ್ನು ಮಂಡಿಸಲು ನಿರ್ಧರಿಸಿದರೆ, ಎನ್ಸಿಪಿ (ಎಸ್ಪಿ) ಅದನ್ನು ಬೆಂಬಲಿಸಬಹುದು ಎಂಬ ವದಂತಿಗಳೂ ಕೂಡ ಹರಿದಾಡುತ್ತಿವೆ. ಪಕ್ಷದ ಹಲವು ನಾಯಕರು ದೇವೇಂದ್ರ ಫಡ್ನವಿಸ್ ಅವರನ್ನೂ ಭೇಟಿಯಾಗಿದ್ದು ಈ ವದಂತಿಗಳಿಗೆ ಮತ್ತಷ್ಟು ರೆಕ್ಕೆಪುಕ್ಕೆ ನೀಡುವಂತೆ ಮಾಡಿತ್ತು. ಆದರೆ, ಸಂಸದೆ ಸುಪ್ರಿಯಾ ಸುಳೆ ಈ ಎಲ್ಲಾ ವದಂತಿಗಳನ್ನು ಸುಳ್ಳು ಎಂದು ತಳ್ಳಿಹಾಕಿದ್ದಾರೆ. ಪ್ರಸ್ತಾವಿತ ಮಸೂದೆಯು ಎಲ್ಲಾ ರಾಜ್ಯಗಳಾದ್ಯಂತ ಸೀಟುಗಳಲ್ಲಿ ಶೇಕಡಾ 50 ರಷ್ಟು ಸಮಾನ ಹೆಚ್ಚಳವನ್ನು ಆಧರಿಸಿದ್ದರೆ, ಅದನ್ನು ವಿರೋಧಿಸಲು ಯಾವುದೇ ಬಲವಾದ ಕಾರಣವಿರುವುದಿಲ್ಲ ಎಂದು ಅವರು ಹೇಳಿದ್ದಾರೆ.
ಸಂಸದೆ ಸುಪ್ರಿಯಾ ಸುಳೆ ಹೇಳಿದ್ದೇನು..?
ಎನ್ಸಿಪಿ (ಎಸ್ಪಿ) ಈ ಕಾನೂನನ್ನು ಬೆಂಬಲಿಸಲಿದೆ ಎಂದು ಸೂಚಿಸುವ ಮಾಧ್ಯಮ ವರದಿಗಳು ಹೆಸರಿಸದ ಮೂಲಗಳನ್ನು ಆಧರಿಸಿದ್ದವು ಮತ್ತು ಅವು ಗೊಂದಲಕ್ಕೆ ಕಾರಣವಾಗಿದ್ದವು. ಪಕ್ಷದ ಕಾರ್ಯಕರ್ತರಲ್ಲಿ ಮತ್ತು ಮಹಾ ವಿಕಾಸ್ ಅಘಾಡಿ ಮೈತ್ರಿಕೂಟದಲ್ಲಿ ಯಾವುದೇ ತಪ್ಪು ಸಂದೇಶ ಹೋಗಬಾರದು ಎಂಬ ನಿಟ್ಟಿನಲ್ಲಿ, ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಶರದ್ ಪವಾರ್ ಮತ್ತು ಹಿರಿಯ ನಾಯಕ ಜಯಂತ್ ಪಾಟೀಲ್ ಸೇರಿದಂತೆ ಎನ್ಸಿಪಿ (ಎಸ್ಪಿ) ಉನ್ನತ ನಾಯಕರೊಂದಿಗೆ ಸಮಾಲೋಚನೆ ನಡೆಸಿದ ನಂತರವೇ ನಾನು ಈ ವಿಷಯವನ್ನು ಸ್ಪಷ್ಟಪಡಿಸುತ್ತಿದ್ದೇನೆ ಎಂದು ತಿಳಿಸಿದರು(ಏಜೆನ್ಸೀಸ್).