NEET ಮರುಪರೀಕ್ಷೆ ಎಡವಟ್ಟು: ನಾಗ್ಪುರ ವಿದ್ಯಾರ್ಥಿಗೆ ಅಬುಧಾಬಿಯಲ್ಲಿ ಪರೀಕ್ಷಾ ಕೇಂದ್ರ; NTA ಹೇಳಿದ್ದಿಷ್ಟು!

ವಿದ್ಯಾರ್ಥಿಯ ಸಮಸ್ಯೆಯನ್ನು ಪರಿಹರಿಸಲಾಗಿದೆ. ಅಗತ್ಯ ಪರಿಶೀಲನೆಗಳ ನಂತರ ಮುಂಬರುವ ಕೆಲವು ಗಂಟೆಗಳಲ್ಲಿ ವಿದ್ಯಾರ್ಥಿಗೆ ನಾಗ್ಪುರದಲ್ಲೇ ಪರೀಕ್ಷಾ ಕೇಂದ್ರವನ್ನು ಮರು-ನಿಯೋಜಿಸಲಾಗುವುದು ಮತ್ತು ಶನಿವಾರ ಸಂಜೆ 4 ಗಂಟೆಯೊಳಗೆ ಹೊಸ ಪ್ರವೇಶ ಪತ್ರವನ್ನು ವಿತರಿಸಲಾಗುವುದು ಎಂದು ನ್ಯಾಷನಲ್ ಟೆಸ್ಟಿಂಗ್ ಏಜೆನ್ಸಿ (ಎನ್​​ಟಿಎ) ಎಕ್ಸ್​ನಲ್ಲಿ ಪೋಸ್ಟ್​ ಹಂಚಿಕೊಂಡಿದೆ.

ನೀಟ್​ ಆಕಾಂಕ್ಷಿ ಅಬ್ದುಲ್ಲಾ ಮೊಹ್ಮದ್​ ತಾಲಿಬ್​ ಅವರ ತಂದೆ ಎಎನ್​ಐಗೆ ಜೊತೆ ಮಾತನಾಡಿದರು. ನೀಟ್ ಆಕಾಂಕ್ಷಿ ಅಬ್ದುಲ್ಲಾ ಮೊಹಮ್ಮದ್ ತಾಲಿಬ್ ಜೂನ್ 19 ರ ಶುಕ್ರವಾರ ಸಂಜೆ 4 ಗಂಟೆಗೆ ತನ್ನ ಅಡ್ಮಿಟ್ ಕಾರ್ಡ್ ಡೌನ್‌ಲೋಡ್ ಮಾಡಿಕೊಂಡಾಗ, ಅದರಲ್ಲಿ ಪರೀಕ್ಷಾ ಕೇಂದ್ರದ ವಿಳಾಸ "ಸಲಾಮಾ ಬಿಂತ್ ಬುಟ್ಟಿ ಸ್ಟ್ರೀಟ್, 23 ನೇ ಮುರೂರ್ ರೋಡ್, ಅಬುಧಾಬಿ, ಯುಎಇ" ಎಂದು ನಮೂದಿಸಲಾಗಿತ್ತು. ಇದನ್ನು ಕಂಡು ನಾನು ಆತಂಕಕ್ಕೆ ಒಳಗಾದೆ. ಮಗನಿಗೆ ಪರೀಕ್ಷೆ ಬರೆಯಲು ಸಾಧ್ಯವಾಗೋದಿಲ್ಲ ಎಂದುಕೊಂಡೆ. ಪರೀಕ್ಷಾ ಕೇಂದ್ರದ ಆಯ್ಕೆ ನಾವು ನೀಡಿರಲಿಲ್ಲ ಎಂದರು.

ಮುಂದುವರೆದು, ಎನ್​ಟಿಎ ಸಹಾಯವಾಣಿಗೆ ಕರೆ ಮಾಡಿ ಈ ಗೊಂದಲದ ಬಗ್ಗೆ ಹಂಚಿಕೊಂಡೆವು. ಇಮೇಲ್​ ಕೂಡ ಕಳಿಸಿದ್ದೇವೆ. ತಕ್ಷಣವೇ ಕರೆ ಮಾಡಿ ಶನಿವಾರ ಸಂಜೆ 4ಜ್ಜೆ ಪ್ರವೇಶ ಪತ್ರ ಖುದ್ದಾಗಿ ಕಳಿಸೋದಾಗಿ ಮಾಹಿತಿ ಹಂಚಿಕೊಂಡಿದ್ದಾರೆ ಎಂದು ಮಾತನಾಡಿದರು. ಅವರ ಈ ವಿಡಿಯೋಗೆ ಎನ್​ಟಿಎ ಅಧಿಕೃತವಾಗಿ ಟ್ವೀಟ್ ಮಾಡಿದೆ.

ನಾವು ನಮ್ಮ ಆಯ್ಕೆಗಳಲ್ಲಿ ಎಲ್ಲೂ ವಿದೇಶಿ ಕೇಂದ್ರವನ್ನು ಕೇಳಿರಲಿಲ್ಲ. ನಾಗ್ಪುರ ಸೇರಿದಂತೆ ದೇಶದ ಮೂರು ಜಿಲ್ಲೆಗಳನ್ನು ಮಾತ್ರ ಆಯ್ಕೆ ಮಾಡಿದ್ದೆವು. ನನ್ನ ಮಗನ ಬಳಿ ಪಾಸ್‌ಪೋರ್ಟ್ ಕೂಡ ಇಲ್ಲ. ಇನ್ನು ಕೇವಲ ಒಂದೆರಡು ದಿನ ಬಾಕಿ ಇರುವಾಗ ಆತನನ್ನು ಅಬುಧಾಬಿಗೆ ಪರೀಕ್ಷೆ ಬರೆಯಲು ಕಳುಹಿಸುವುದಾದರೂ ಹೇಗೆ? ಎಂದು ನೊಂದುಕೊಂಡರು.

ನೀಟ್​​ ಆಕಾಂಕ್ಷಿಗೆ ನಾಗ್ಪುರದಲ್ಲೇ ಪರೀಕ್ಷಾ ಕೇಂದ್ರವನ್ನು ಹಂಚಿಕೆ ಮಾಡಲಾಗಿದೆ ಎನ್‌ಟಿಎ ಮಹಾನಿರ್ದೇಶಕ ಅಭಿಷೇಕ್ ಸಿಂಗ್ ಅವರು ಮಾಧ್ಯಮಗಳ ಪ್ರಶ್ನೆಗೆ ಉತ್ತರ ಕೊಟ್ಟಿದ್ದಾರೆ, (ಏಜೆನ್ಸೀಸ್).