Missing Railway Coach: ರೈಲು ಹೊರಡುವ ಮುನ್ನವೇ ನಾಪತ್ತೆಯಾದ ಕೋಚ್! ರೈಲ್ವೆ ನಿಲ್ದಾಣದಲ್ಲಿ ಪ್ರಯಾಣಿಕರ ತೀವ್ರ ಆಕ್ರೋಶ..

ಹೌದು, ಸಂಬಲ್ಪುರ-ನಾಂದೇಡ್ ಎಕ್ಸ್‌ಪ್ರೆಸ್ (ರೈಲು ಸಂಖ್ಯೆ: 20809) ರೈಲಿನ ಮೀಸಲು ಎಸಿ 3-ಟೈರ್ ಕೋಚ್ ಪತ್ತೆಯಿಲ್ಲದ ಕಾರಣ ನೂರಾರು ಪ್ರಯಾಣಿಕರು ಕಂಗಾಲಾಗಿ, ರೈಲ್ವೆ ಸಿಬ್ಬಂದಿಯ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ ಘಟನೆ ವರದಿಯಾಗಿದೆ.

ಸಾಮಾನ್ಯವಾಗಿ ರೈಲು ಬರುವ ಮೊದಲೇ ಪ್ರಯಾಣಿಕರು ತಮ್ಮ ಕೋಚ್ ಸಂಖ್ಯೆಯತ್ತ ಕಾದು ನಿಂತಿರುತ್ತಾರೆ. ಆದರೆ, ಈ ರೈಲು ಪ್ಲಾಟ್‌ಫಾರ್ಮ್‌ಗೆ ಬಂದಾಗ, ಟಿಕೆಟ್ ಬುಕ್ ಆಗಿದ್ದ 'BE2' ಎಂಬ ಎಸಿ ಕೋಚ್ ಇರಲೇ ಇಲ್ಲ. 57ಕ್ಕೂ ಹೆಚ್ಚು ಪ್ರಯಾಣಿಕರು ತಮ್ಮ ಮೀಸಲು ಕೋಚ್ ಹುಡುಕುತ್ತಾ ಪ್ಲಾಟ್‌ಫಾರ್ಮ್‌ನ ಒಂದು ತುದಿಯಿಂದ ಇನ್ನೊಂದು ತುದಿಗೆ ಓಡಾಡಿದರು.

ರೈಲು ಹೊರಡಲು ಸಮಯ ಹತ್ತಿರವಾಗುತ್ತಿದ್ದಂತೆ, ತಮ್ಮ ಸೀಟುಗಳು ಎಲ್ಲಿ ಹೋದವು ಎಂದು ತಿಳಿಯದೆ ಪ್ರಯಾಣಿಕರು ಕಂಗಾಲಾದರು. ಇದರಿಂದ ಆಕ್ರೋಶಗೊಂಡ ಪ್ರಯಾಣಿಕರು ನಿಲ್ದಾಣದ ಅಧಿಕಾರಿಗಳ ಮೇಲೆ ಮುಗಿಬಿದ್ದಿದ್ದು, ಪ್ಲಾಟ್‌ಫಾರ್ಮ್‌ನಲ್ಲಿ ಕೆಲಕಾಲ ಗೊಂದಲ ಮತ್ತು ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿತ್ತು.

ಈ ಅಚಾತುರ್ಯದ ಬಗ್ಗೆ ಸ್ಪಷ್ಟನೆ ನೀಡಿರುವ ಪೂರ್ವ ಕರಾವಳಿ ರೈಲ್ವೆ (ECOR), "ತಾಂತ್ರಿಕ ಕಾರಣಗಳಿಂದಾಗಿ BE2 ಕೋಚ್ ಅನ್ನು ರೈಲಿಗೆ ಜೋಡಿಸಲು ಸಾಧ್ಯವಾಗಿಲ್ಲ" ಎಂದು ಒಪ್ಪಿಕೊಂಡಿದೆ.

"ತಾಂತ್ರಿಕ ಸಮಸ್ಯೆಯಿಂದಾಗಿ ರೈಲು ಸಂಖ್ಯೆ 20809 ಕ್ಕೆ ನಿಗದಿತ ಕೋಚ್ ಅಳವಡಿಸಲು ಸಾಧ್ಯವಾಗಲಿಲ್ಲ. ಇದರಿಂದ ತೊಂದರೆಗೊಳಗಾದ 57 ಪ್ರಯಾಣಿಕರಿಗೆ ಬೇರೆ ಕೋಚ್‌ಗಳಲ್ಲಿ ಲಭ್ಯವಿದ್ದ ಖಾಲಿ ಸೀಟುಗಳನ್ನು ಟಿಟಿಇ (TTE) ಮೂಲಕ ಹಂಚಿಕೆ ಮಾಡಿ ಪ್ರಯಾಣಕ್ಕೆ ಅನುವು ಮಾಡಿಕೊಡಲಾಗಿದೆ." ಎಂದು ರೈಲ್ವೆ ಇಲಾಖೆ ಅಧಿಕೃತ ಹೇಳಿಕೆ ಹೊರಡಿಸಿದೆ.

ರೈಲ್ವೆ ಇಲಾಖೆ ಪರ್ಯಾಯ ವ್ಯವಸ್ಥೆ ಮಾಡಿದ್ದೇವೆ ಎಂದು ಹೇಳಿದರೂ, ಪ್ರಯಾಣಿಕರ ಆಕ್ರೋಶ ಮಾತ್ರ ಕಡಿಮೆಯಾಗಿಲ್ಲ. "ನಾವು ಎಸಿ ಕೋಚ್‌ನಲ್ಲಿ ನೆಮ್ಮದಿಯಾಗಿ ಹೋಗಲು ಹಣ ಪಾವತಿಸಿ ಟಿಕೆಟ್ ಬುಕ್ ಮಾಡಿದ್ದೇವೆ. ಆದರೆ ಈಗ ಬೇರೆ ಬೇರೆ ಕೋಚ್‌ಗಳಲ್ಲಿ ಹರಿದು ಹಂಚಿ ಹೋಗಬೇಕಾಗಿದೆ. ರೈಲ್ವೆಯ ಇಂತಹ ಬೇಜವಾಬ್ದಾರಿತನ ಒಪ್ಪಲು ಸಾಧ್ಯವಿಲ್ಲ" ಎಂದು ಪ್ರಯಾಣಿಕರೊಬ್ಬರು ಕಿಡಿಕಾರಿದ್ದಾರೆ.

ಈ ಘಟನೆಯು ಭಾರತೀಯ ರೈಲ್ವೆಯ ನಿರ್ವಹಣಾ ದಕ್ಷತೆಯ ಬಗ್ಗೆ ದೊಡ್ಡ ಪ್ರಶ್ನೆಯನ್ನು ಎತ್ತಿದೆ. ರೈಲು ನಿಲ್ದಾಣಕ್ಕೆ ಬರುವ ಮುನ್ನವೇ ಇಂತಹ ತಾಂತ್ರಿಕ ದೋಷಗಳನ್ನು ಸರಿಪಡಿಸಲು ಸಾಧ್ಯವಿರಲಿಲ್ಲವೇ ಎಂಬ ಪ್ರಶ್ನೆ ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿದೆ,(ಏಜೆನ್ಸೀಸ್).