Punjab Family Twist: 25 ವರ್ಷಗಳ ಬಳಿಕ ಮನೆಗೆ ಬಂದ ಗಂಡ: ಅತ್ತಿಗೆಯನ್ನೇ ಮದುವೆಯಾಗಿದ್ದ ತಮ್ಮ! ಈಗ ಹೆಂಡತಿ ಯಾರಿಗೆ ಸ್ವಂತ?

ಕಪೂರ್ತಲಾ ಜಿಲ್ಲೆಯ ಹಂಸಾ ಸಿಂಗ್ ಎಂಬ ವ್ಯಕ್ತಿ 25 ವರ್ಷಗಳ ಹಿಂದೆ ಇದ್ದಕ್ಕಿದ್ದಂತೆ ನಾಪತ್ತೆಯಾಗಿದ್ದರು. ಕುಟುಂಬಸ್ಥರು ಎಲ್ಲೆಡೆ ಹುಡುಕಾಡಿದರೂ ಪತ್ತೆಯಾಗಿರಲಿಲ್ಲ. ಮೂರು ವರ್ಷಗಳ ಕಾಲ ಕಾದ ಕುಟುಂಬಸ್ಥರು, ಹಂಸಾ ಸಿಂಗ್ ಸತ್ತಿರಬಹುದು ಎಂದು ನಿರ್ಧರಿಸಿದರು. ಸಾಮಾಜಿಕ ಸಂಪ್ರದಾಯದಂತೆ ಹಂಸಾ ಸಿಂಗ್ ಅವರ ಪತ್ನಿ ವಿಮಲಾ ದೇವಿಯನ್ನು, ಹಂಸಾ ಸಿಂಗ್ ಅವರ ಕಿರಿಯ ಸಹೋದರ ಸುಖ್ ಸಿಂಗ್‌ಗೆ ಮದುವೆ ಮಾಡಿಕೊಡಲಾಯಿತು.

ಸುಖ್ ಸಿಂಗ್ ಮತ್ತು ವಿಮಲಾ ದೇವಿ ದಂಪತಿಗೆ ಈಗ ಮೂವರು ಮಕ್ಕಳಿದ್ದಾರೆ. ಕಳೆದ 22 ವರ್ಷಗಳಿಂದ ಈ ದಂಪತಿ ಸುಖವಾಗಿ ಸಂಸಾರ ನಡೆಸುತ್ತಿದ್ದರು. ಆದರೆ ಈಗ ಹಂಸಾ ಸಿಂಗ್ ಅವರ ದಿಢೀರ್ ಎಂಟ್ರಿ ಇಡೀ ಸಂಸಾರವನ್ನು ಅಸ್ತವ್ಯಸ್ತಗೊಳಿಸಿದೆ.

ಉತ್ತರ ಪ್ರದೇಶದ ನಾರ್ಥೌರ್‌ನ ಬಜಾರ್‌ನಲ್ಲಿ ಹರಿದ ಬಟ್ಟೆ ಧರಿಸಿ, ಗಡ್ಡ ಬಿಟ್ಟುಕೊಂಡು ಭಿಕ್ಷುಕನಂತೆ ಅಲೆಯುತ್ತಿದ್ದ ವ್ಯಕ್ತಿಯನ್ನು ಕಂಡು ಪೊಲೀಸರು ವಿಚಾರಣೆ ನಡೆಸಿದ್ದರು. ಆರಂಭದಲ್ಲಿ ಏನೂ ಹೇಳದ ಆತ, ಮೆಲ್ಲನೆ ತನ್ನ ಹೆಸರು ಹಂಸಾ ಸಿಂಗ್ ಎಂದು ಬಾಯಿಬಿಟ್ಟಿದ್ದ. ನಾರ್ಥೌರ್ ಪೊಲೀಸರು ಕೂಡಲೇ ಪಂಜಾಬ್ ಪೊಲೀಸರನ್ನು ಸಂಪರ್ಕಿಸಿ ಕುಟುಂಬಕ್ಕೆ ಮಾಹಿತಿ ನೀಡಿದರು. 72 ಗಂಟೆಗಳ ಒಳಗಾಗಿ ಹಂಸಾ ಸಿಂಗ್ ಕುಟುಂಬಸ್ಥರು ಅಲ್ಲಿಗೆ ಧಾವಿಸಿದರು. ಬಾಲ್ಯದ ನೆನಪುಗಳನ್ನು ಕೇಳಿದಾಗ ಹಂಸಾ ಸಿಂಗ್ ಕಣ್ಣೀರು ಹಾಕಿದ್ದು, ಆತನೇ ತಮ್ಮ ಹಳೆಯ ಹಂಸಾ ಸಿಂಗ್ ಎಂದು ಕುಟುಂಬಸ್ಥರು ಗುರುತಿಸಿದರು.

ಹಂಸಾ ಸಿಂಗ್ ಮರಳಿದ್ದರಿಂದ ಕುಟುಂಬಕ್ಕೇನೋ ಖುಷಿಯಾಗಿದೆ. ಆದರೆ ವಿಮಲಾ ದೇವಿಯ ಪರಿಸ್ಥಿತಿ ಈಗ 'ಇತ್ತ ದರಿ ಅತ್ತ ಪುಲಿ' ಎಂಬಂತಾಗಿದೆ. ಕಾನೂನುಬದ್ಧವಾಗಿ ಮೊದಲ ಪತಿ ಬದುಕಿರುವಾಗ ಎರಡನೇ ಮದುವೆ ಅಸಿಂಧು ಎಂದರೂ, ಸಾಮಾಜಿಕವಾಗಿ ಮತ್ತು ಮಾನವೀಯ ದೃಷ್ಟಿಯಿಂದ 22 ವರ್ಷಗಳ ಸಂಸಾರವನ್ನು ಮುರಿಯುವುದು ಹೇಗೆ ಎಂಬ ಪ್ರಶ್ನೆ ಎದುರಾಗಿದೆ. ಈ ವಿಚಿತ್ರ ಪ್ರಕರಣ ಈಗ ಇಡೀ ಪಂಜಾಬ್‌ನಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ,(ಏಜೆನ್ಸೀಸ್​).