Male Psychology: ಪುರುಷರು ನಿಜವಾಗಿಯೂ ಏನನ್ನು ಇಷ್ಟಪಡುತ್ತಾರೆ? ತಜ್ಞರು ಹೇಳುವ ಸತ್ಯ ಸಂಗತಿಗಳು ಇಲ್ಲಿವೆ!

ಹೆಚ್ಚಿನವರು ಪುರುಷರಿಗೆ ಕೇವಲ ಗ್ಯಾಜೆಟ್‌ಗಳು, ಗಾಡಿಗಳು ಅಥವಾ ಕ್ರೀಡೆ ಎಂದರೆ ಇಷ್ಟ ಎಂದು ಭಾವಿಸುತ್ತಾರೆ. ಆದರೆ, ಭಾವನಾತ್ಮಕವಾಗಿ ಪುರುಷರು ಈ ಕೆಳಗಿನ ಅಂಶಗಳಿಗೆ ಹೆಚ್ಚು ಪ್ರಾಮುಖ್ಯತೆ ನೀಡುತ್ತಾರೆ ಎಂದು ಮನೋವಿಜ್ಞಾನ ಹೇಳುತ್ತದೆ.

ಮನೋವಿಜ್ಞಾನದ ಪ್ರಕಾರ, ಪುರುಷರಿಗೆ 'ಪ್ರೀತಿ'ಗಿಂತ 'ಗೌರವ' ಸಿಕ್ಕಾಗ ಹೆಚ್ಚು ಸಂತೋಷವಾಗುತ್ತದೆ. ತಾವು ಮಾಡುವ ಕೆಲಸವನ್ನು ಯಾರಾದರೂ ಗುರುತಿಸಿ, "ನೀನು ಇದನ್ನು ಚೆನ್ನಾಗಿ ಮಾಡಿದೆ" ಎಂದು ಒಂದು ಸಣ್ಣ ಮೆಚ್ಚುಗೆಯ ಮಾತು ಹೇಳಿದರೆ ಅವರು ಅದಕ್ಕಾಗಿ ಏನು ಬೇಕಾದರೂ ಮಾಡಲು ಸಿದ್ಧರಿರುತ್ತಾರೆ. ಅವರ ಸಾಮರ್ಥ್ಯವನ್ನು ನಂಬುವ ವ್ಯಕ್ತಿ ಎಂದರೆ ಅವರಿಗೆ ಪಂಚಪ್ರಾಣ.

ಪುರುಷರು ಸಾಮಾನ್ಯವಾಗಿ ತಮ್ಮ ನೋವನ್ನು ಹೊರಹಾಕುವುದಿಲ್ಲ. "ಗಂಡಸರು ಅಳಬಾರದು" ಎಂಬ ಸಾಮಾಜಿಕ ಒತ್ತಡ ಅವರ ಮೇಲಿರುತ್ತದೆ. ಹೀಗಾಗಿ, ತಮ್ಮ ದುರ್ಬಲ ಕ್ಷಣಗಳಲ್ಲಿ ತೀರ್ಪು ನೀಡದೆ (Non-judgmental), ತಮ್ಮ ಮಾತನ್ನು ಶಾಂತವಾಗಿ ಕೇಳಿಸಿಕೊಳ್ಳುವ ಸಂಗಾತಿಯನ್ನು ಅವರು ಬಯಸುತ್ತಾರೆ. ಅವರು ತಮ್ಮ ಮನಸ್ಸನ್ನು ಬಿಚ್ಚಿಡಲು ಸುರಕ್ಷಿತವಾದ ವೇದಿಕೆಯನ್ನು ಇಷ್ಟಪಡುತ್ತಾರೆ.

ಪುರುಷರು ತಮ್ಮದೇ ಆದ 'ಗುಹೆ'ಯನ್ನು (Man Cave) ಇಷ್ಟಪಡುತ್ತಾರೆ. ಅಂದರೆ, ಕೆಲಸದ ಒತ್ತಡದ ನಂತರ ಸ್ವಲ್ಪ ಸಮಯ ಯಾರಿಗೂ ಉತ್ತರ ನೀಡದೆ ಸುಮ್ಮನೆ ಕುಳಿತುಕೊಳ್ಳುವುದು, ಸ್ನೇಹಿತರೊಂದಿಗೆ ಕಾಲ ಕಳೆಯುವುದು ಅಥವಾ ತಮ್ಮ ಹವ್ಯಾಸಗಳಲ್ಲಿ ತೊಡಗಿಕೊಳ್ಳುವುದು ಅವರಿಗೆ ಮಾನಸಿಕ ಶಾಂತಿ ನೀಡುತ್ತದೆ. ಈ ಸ್ವಾತಂತ್ರ್ಯವನ್ನು ಗೌರವಿಸುವವರನ್ನು ಅವರು ಹೆಚ್ಚು ಪ್ರೀತಿಸುತ್ತಾರೆ.

ಪುರುಷರಿಗೆ ದೈಹಿಕ ಸ್ಪರ್ಶವು ಪ್ರೀತಿಯನ್ನು ವ್ಯಕ್ತಪಡಿಸುವ ಪ್ರಮುಖ ಮಾರ್ಗವಾಗಿದೆ. ಇದು ಕೇವಲ ಲೈಂಗಿಕತೆ ಮಾತ್ರವಲ್ಲ, ಅಕಸ್ಮಾತ್ ಕೈ ಹಿಡಿಯುವುದು, ಬೆನ್ನು ತಟ್ಟುವುದು ಅಥವಾ ಅಪ್ಪಿಕೊಳ್ಳುವುದು ಅವರಿಗೆ "ನಾನು ಸುರಕ್ಷಿತವಾಗಿದ್ದೇನೆ ಮತ್ತು ಪ್ರೀತಿಸಲ್ಪಡುತ್ತಿದ್ದೇನೆ" ಎಂಬ ಭಾವನೆ ನೀಡುತ್ತದೆ.

ನೈಸರ್ಗಿಕವಾಗಿ ಪುರುಷರಲ್ಲಿ ತಮ್ಮ ಕುಟುಂಬವನ್ನು ರಕ್ಷಿಸುವ ಮತ್ತು ಪೂರೈಸುವ ಹಂಬಲವಿರುತ್ತದೆ. ಮನೆಯವರು ಅಥವಾ ಸಂಗಾತಿ ಅವರ ಮೇಲೆ ಅವಲಂಬಿತರಾಗಿದ್ದಾರೆ ಮತ್ತು ಅವರ ಅವಶ್ಯಕತೆ ತಮಗಿದೆ ಎಂದು ತೋರಿಸಿದಾಗ ಪುರುಷರು ಹೆಚ್ಚು ಜವಾಬ್ದಾರಿಯುತವಾಗಿ ಮತ್ತು ಸಂತೋಷವಾಗಿ ಇರುತ್ತಾರೆ. 'ಹೀರೋ ಇನ್ಸ್ಟಿಂಕ್ಟ್' (Hero Instinct) ಎಂದು ಕರೆಯಲಾಗುವ ಈ ಗುಣ ಪುರುಷರಲ್ಲಿ ಬಲವಾಗಿರುತ್ತದೆ.

ಮನೋವಿಜ್ಞಾನದ ಪ್ರಕಾರ, ಪುರುಷರು 'ಸುಳಿವು'ಗಳನ್ನು (Hints) ಅರ್ಥಮಾಡಿಕೊಳ್ಳುವುದರಲ್ಲಿ ಸ್ವಲ್ಪ ಹಿಂದೆ ಇರುತ್ತಾರೆ. ಅವರಿಗೆ ವಿಷಯಗಳನ್ನು ನೇರವಾಗಿ ಮತ್ತು ಸ್ಪಷ್ಟವಾಗಿ ಹೇಳುವುದು ಇಷ್ಟ. ಗೊಂದಲವಿಲ್ಲದ ಮಾತುಕತೆ ಬಾಂಧವ್ಯವನ್ನು ಗಟ್ಟಿಗೊಳಿಸುತ್ತದೆ ಎಂದು ಅವರು ನಂಬುತ್ತಾರೆ,(ಏಜೆನ್ಸೀಸ್).