ಮಳೆಗಾಲದಲ್ಲಿ ಸೋಲೋ ಟ್ರಿಪ್​ ಪ್ಲ್ಯಾನ್​ ಮಾಡಿದ್ದೀರಾ?; ಈ ಪ್ರವಾಸಿ ತಾಣಕ್ಕೆ ಹೋಗೋದು ಅವಾಯ್ಡ್ ಮಾಡಿ..Solo Ride

Landslides Flash Floods Road Closures: ಭಾರತದಲ್ಲಿ ಮಳೆಗಾಲ, ಚಳಿಗಾಲ ಹಾಗೂ ಬೇಸಿಗೆಯಲ್ಲಿ ಪ್ರಯಾಣ ಬೆಳೆಸಲು ಕೆಲವು ಪ್ರತ್ಯೇಕ ಪ್ರದೇಶಗಳಿವೆ. ಸದ್ಯ ಮಳೆಗಾಲದಲ್ಲಿ ಹಲವರು ವಯನಾಡು, ಹಿಮಾಚಲ ಪ್ರದೇಶ ಸೇರಿದಂತೆ ಹಸಿರು ತುಂಬಿದ ವಾತಾವರಣಕ್ಕೆ ತೆರಳಲು ಆಶಿಸುತ್ತಾರೆ. ಆದರೆ, ಗಮನಿಸಿ ನಿರಂತರ ಮಳೆಯು ದೇಶದ ಹಲವು ಭಾಗಗಳಲ್ಲಿ ಭೂಕುಸಿತ, ದಿಢೀರ್ ಪ್ರವಾಹ ಸಂಭವಿಸುತ್ತಿರುವುದರಿಂದ ಸಾವು-ನೋವು, ಆಸ್ತಿ-ಪಾಸ್ತಿ ನಾಶವಾಗುತ್ತಿದೆ.

ಮಳೆಗಾಲದಲ್ಲಿ ಸೋಲೋ ಟ್ರಿಪ್​​​​, ಕುಟುಂಬದೊಂದಿಗೆ ಪ್ರವಾಸ ಕೈಗೊಂಡಿದ್ದರೆ. ಕೆಲವು ಅಪಾಯಕಾರಿ ಪ್ರದೇಶಕ್ಕೆ ಭೇಟಿ ನೀಡೋದನ್ನು ಬಿಟ್ಟುಬಿಡಿ. ಆ ಡೇಂಜರ್​ ಪ್ಲೇಸ್ ಯಾವುದು ಎನ್ನುವ ಬಗ್ಗೆ ಮಾಹಿತಿ ಈ ಲೇಖನದಲ್ಲಿ ಇದೆ.

2024ರಲ್ಲಿಯೂ ಕೇರಳದ ವಯನಾಡಿನಲ್ಲಿ ಭೂಕುಸಿತ ಸಂಭವಿಸಿ 200 ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದರು. ಈ ಬಾರಿಯೂ ನಿರಂತರ ಮಳೆಗೆ ಚೂರಲ್ಮಾಲಾ ಸಮೀಪದ ಮೀನಾಕ್ಷಿ ಪ್ರದೇಶದಲ್ಲಿ ಹೊಸದಾಗಿ ಭೂಕುಸಿತ ಸಂಭವಿಸಿದ್ದು, ನಿರ್ಮಾಣ ಹಂತದ ಸ್ಥಳದಲ್ಲಿ ಸಿಲುಕಿಕೊಂಡಿದ್ದ ಕಾರ್ಮಿಕರನ್ನು ರಕ್ಷಿಸಲು ಭಾರಿ ಮಳೆಯ ನಡುವೆಯೇ ರಕ್ಷಣಾ ಕಾರ್ಯಾಚರಣೆ ನಡೆಸಲಾಗಿದೆ.ಮೂವರು ಮೃತಪಟ್ಟಿದ್ದಾರೆ. ಏಳಕ್ಕೂ ಹೆಚ್ಚು ಮಂದಿ ನಾಪತ್ತೆಯಾಗಿದ್ದಾರೆ ಎನ್ನಲಾಗಿದೆ

ಗಂಗೋತ್ರಿ ಕಡೆಗೆ ತೆರಳುವ ಪ್ರವಾಸಿಗವರು ಜಾಗೃತಿವಹಿಸಬೇಕು. ತೀವ್ರ ಮಳೆಯಾಗುತ್ತಿರುವ ಹಿನ್ನೆಲೆ, ಗಂಗೋತ್ರಿಗೆ ತಲುಪುವ ಹೆದ್ದಾರಿಯಲ್ಲಿ ಭೂಕುಸಿತ ಸಂಭವಿಸಿದ್ದು, ಚಾರ್ ಧಾಮ್ ಕ್ಷೇತ್ರಗಳಲ್ಲಿ ಒಂದಾದ ಗಂಗೋತ್ರಿಗೆ ಹೋಗುವ ಸಂಪರ್ಕ ಕಡಿತಗೊಂಡಿದೆ. ಮಳೆಗೆ ಉಕ್ಕಿ ಹರಿಯುತ್ತಿರುವ ನದಿಗಳು ಮತ್ತು ಕುಸಿಯುತ್ತಿರುವ ಪರ್ವತದ ಇಳಿಜಾರುಗಳು ಪ್ರಯಾಣವನ್ನು ದುಸ್ತರಗೊಳಿಸಿವೆ. ಹೀಗಾಗಿ ಗಂಗೋತ್ರಿ ಸುತ್ತಮುತ್ತಲಿನ ಪ್ರದೇಶಗಳಿಗೆ ಪ್ರಯಾಣಿಸುವುದನ್ನು ಮುಂದೂಡಲು ಪ್ರವಾಸಿಗರಿಗೆ ಸೂಚಿಸಲಾಗಿದೆ.

ನೀವೇನಾದರೂ ಮಹಾರಾಷ್ಟ್ರದ ಲೋನಾವಾಲಾ ಮತ್ತು ಖಂಡಾಲಾ ಕಡೆಗೆ ತೆರಳು ಪ್ಲ್ಯಾನ್​ ಮಾಡುತ್ತಿದ್ದರೆ ಅದನ್ನು ಮುಂದೂಡುವುದು ಸೂಕ್ತ. ನಿರಂತರ ಮಳೆಯಿಂದಾಗಿ ಪಶ್ಚಿಮ ಘಟ್ಟಗಳಲ್ಲಿ ಕುಸಿತ ಕಂಡಿದೆ. ಕರ್ಜತ್-ಲೋನಾವಾಲಾ ಮಾರ್ಗ ಮತ್ತು ಮುಂಬೈ-ಪುಣೆ ಎಕ್ಸ್‌ಪ್ರೆಸ್‌ವೇನಲ್ಲಿ ಭೂಕುಸಿತ ಸಂಭವಿಸಿರುವ ಕಾರಣ ಚಳಿಗಾಲ ಅಥವಾ ಬೇಸಿಗೆ ವೇಳೆ ಇಲ್ಲಿಗೆ ತೆರಳಲು ಪ್ಲ್ಯಾನ್​ ಮಾಡಿಕೊಳ್ಳಿ.

ಭಾರೀ ಮಳೆಯಿಂದಾಗಿ ದಿಢೀರ್ ಪ್ರವಾಹ ಮತ್ತು ಭೂಕುಸಿತಗಳು ಸಂಭವಿಸುತ್ತಿರುವುದರಿಂದ ಹಿಮಾಚಲ ಪ್ರದೇಶದ ಅತ್ಯಂತ ಸುಂದರವಾದ ಪರ್ವತ ಪ್ರದೇಶಗಳು ಕಠಿಣ ಪರಿಸ್ಥಿತಿಯನ್ನು ಎದುರಿಸುತ್ತಿವೆ. ಲಾರ್ಜಿ-ಸೈನ್ಜ್ ರಸ್ತೆ ಮೂಲಕ ತೀರ್ಥನ್ ಕಣಿವೆಗೆ ಹೋಗುವ ಮಾರ್ಗಗಳು ಮತ್ತು ಚಂಬಾ-ತಿಸ್ಸಾ ರಸ್ತೆ ಮೂಲಕ ಚಂಬಾ ಪ್ರದೇಶದ ಕೆಲವು ಭಾಗಗಳಿಗೆ ಸಂಪರ್ಕಿಸುವ ರಸ್ತೆಗಳು ಕಲ್ಲುಗಳು, ಮಣ್ಣು ಮತ್ತು ಅವಶೇಷಗಳು ಬಿದ್ದಿದ್ದರಿಂದ ಬಂದ್ ಆಗಿವೆ. ನೀವು ಈ ಪ್ರದೇಶಗಳಲ್ಲಿ ಟ್ರೆಕ್ಕಿಂಗ್ ಅಥವಾ ಪರ್ವತ ಪ್ರವಾಸವನ್ನು ಯೋಜಿಸುತ್ತಿದ್ದರೆ, ಹವಾಮಾನ ಪರಿಸ್ಥಿತಿ ಸುಧಾರಿಸುವವರೆಗೆ ಕಾಯುವುದು ಉತ್ತಮ.

ಹಿಮಾಲಯದ ದೋಡಾ ಮತ್ತು ಕಿಸ್ತ್ವಾರ್ ಪರ್ವತ ಜಿಲ್ಲೆಗಳು ನಿರಂತರ ಮಳೆ, ದಿಢೀರ್ ಪ್ರವಾಹ ಮತ್ತು ಭೂಕುಸಿತದಿಂದ ತತ್ತರಿಸಿವೆ. ಈ ಎರಡು ಜಿಲ್ಲೆಗಳನ್ನು ಸಂಪರ್ಕಿಸುವ ಹೆದ್ದಾರಿ ಜಖಂಗೊಂಡಿರುವುದರಿಂದ ಸಾರಿಗೆ ಅಸ್ತವ್ಯಸ್ತಗೊಂಡಿದೆ. ಅಲ್ಲದೆ, ಸೂಕ್ಷ್ಮ ಪ್ರದೇಶಗಳಲ್ಲಿ ಭಾರಿ ಮಳೆ ಮತ್ತು ಭೂಕುಸಿತ ಉಂಟಾಗಬಹುದು ಎಂದು ಅಧಿಕಾರಿಗಳು ಎಚ್ಚರಿಕೆ ನೀಡುತ್ತಲೇ ಇದ್ದಾರೆ.

ಅಸ್ಸಾಂ ಮತ್ತು ಅರುಣಾಚಲ ಪ್ರದೇಶದ ಹಲವು ಸ್ಥಳಗಳು ಮುಂಗಾರು ಮಳೆಯಿಂದಾಗಿ ತೀವ್ರವಾಗಿ ಬಾಧಿತವಾಗಿವೆ. ಅಸ್ಸಾಂನಲ್ಲಿ, ಧೇಮಾಜಿ ಪ್ರದೇಶವು ಪ್ರವಾಹ ಮತ್ತು ನದಿತೀರದ ಹಾನಿಗೆ ತುತ್ತಾಗಿದ್ದು, ರೈಲ್ವೆ ಮೂಲಸೌಕರ್ಯಗಳು ಧ್ವಂಸಗೊಂಡಿವೆ. ರಾಜ್ಯದ ಹಲವು ಗ್ರಾಮಗಳು ಸಂಪರ್ಕ ಕಳೆದುಕೊಂಡಿವೆ. ಇತ್ತ ಅರುಣಾಚಲ ಪ್ರದೇಶದಲ್ಲಿ, ಭಾರಿ ಮಳೆಯ ನಂತರ ದೂರದ ಪರ್ವತ ಪ್ರದೇಶಗಳಲ್ಲಿ ಭೂಕುಸಿತ ಮತ್ತು ದಿಢೀರ್ ಪ್ರವಾಹ ಉಂಟಾಗಿದೆ. ರಸ್ತೆಗಳು, ಸೇತುವೆಗಳು ಮತ್ತು ಸಾರಿಗೆ ಸೇವೆಗಳು ಸ್ಥಗಿತಗೊಂಡಿರುವುದರಿಂದ, ಹವಾಮಾನ ಪರಿಸ್ಥಿತಿ ಸುಧಾರಿಸುವವರೆಗೆ ಪ್ರವಾಸಿಗರು ಈ ಬಾಧಿತ ಜಿಲ್ಲೆಗಳಿಗೆ ಭೇಟಿ ನೀಡುವುದನ್ನು ಮುಂದೂಡಬೇಕು.