ಪ್ರಾಣದ ಹಂಗು ತೊರೆದು ಪ್ರಯಾಣಿಕನನ್ನು ರಕ್ಷಿಸಿದ ಕೊಂಕಣ ರೈಲ್ವೆ ಸಿಬ್ಬಂದಿ; ವಿಡಿಯೋ ವೈರಲ್ ಬೆನ್ನಲ್ಲೇ ಇಲಾಖೆ ನೀಡಿದ ಬಿಗ್ ಗಿಫ್ಟ್ ಏನು ಗೊತ್ತಾ? Konkan Railway

ಕೊಂಕಣ ರೈಲ್ವೆಯಲ್ಲಿ ಪಾಯಿಂಟ್‌ಮನ್ ಆಗಿರುವ ಗಣಪತಿ ನಾಯಕ್, ರೈಲು ಸಂಖ್ಯೆ 16312 ಚಲಿಸುತ್ತಿರುವಾಗಲೇ ಪ್ರಯಾಣಿಕರೊಬ್ಬರು ಇಳಿಯಲು ಪ್ರಯತ್ನಿಸುತ್ತಿರುವುದನ್ನು ಗಮನಿಸಿದರು. ಕೇರಳದ ಕೊಚುವೇಲಿಯಿಂದ ರಾಜಸ್ಥಾನದ ಶ್ರೀ ಗಂಗಾನಗರಕ್ಕೆ ಪ್ರಯಾಣಿಸುತ್ತಿದ್ದ ಪ್ರಯಾಣಿಕ ಚಲಿಸುವ ರೈಲಿನಿಂದ ಇಳಿಯಲು ಪ್ರಯತ್ನಿಸುವಾಗ ಸಮತೋಲನ ಕಳೆದುಕೊಂಡು ಹಳಿಗಳ ಮೇಲೆ ಬೀಳುವ ಅಪಾಯವಿತ್ತು.

ಈ ಘಟನೆಯನ್ನು ಗಮನಿಸಿದ ನಾಯಕ್​, ಕೆಲವೇ ಕ್ಷಣಗಳಲ್ಲಿ ಪ್ರಯಾಣಿಕನ ಕಡೆಗೆ ಧಾವಿಸಿದ್ದು, ಅವನನ್ನು ಹಿಡಿದು ರೈಲು ಮತ್ತು ಪ್ಲಾಟ್​ಫಾರ್ಮ್​ ನಡುವಿನ ಅಂತರದಿಂದ ದೂರ ಎಳೆದರು. ಆದಾಗ್ಯೂ, ಈ ದೃಶ್ಯಾವಳಿಗಳು ಯುವಕನ ಜೀವವನ್ನು ಉಳಿಸಿದ ಕ್ಷಿಪ್ರ ಹಸ್ತಕ್ಷೇಪವನ್ನು ತೋರಿಸುತ್ತದೆ.

ಅವರ ಆ ಕ್ಷಣದ ಧೈರ್ಯ ಮತ್ತು ತ್ವರಿತ ಕ್ರಮವನ್ನು ಗುರುತಿಸಿದ ರೈಲ್ವೆ ಪ್ರಾಧಿಕಾರವು ಕೊಂಕಣ ರೈಲ್ವೆ ಕಾರ್ಪೊರೇಷನ್​ ಲಿಮಿಟೆಡ್​ ಅಧ್ಯಕ್ಷರು ಮತ್ತು ವ್ಯವಸ್ಥಾಪಕ ನಿರ್ದೆಶಕರು 10,000 ನಗದು ಬಹುಮಾನವನ್ನು ಸಹ ನೀಡಿ ಗೌರವಿಸಿತು.

ಈ ವೀಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿದ್ದಂತೆಯೇ ಅನೇಕ ಬಳಕೆದಾರರ ಗಮನ ಸೆಳೆಯಿತು. ಅನೇಕರು ನಾಯಕ್​ ಅವರ ಧೈರ್ಯಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದರು. ಇನ್ನು ಕೆಲವರು ವೈಯಕ್ತಿಕ ಸುರಕ್ಷತೆಗಿಂತ ಕರ್ತವ್ಯಕ್ಕೆ ಆದ್ಯತೆ ನೀಡಿದ ನಿಜವಾದ ನಾಯಕ ಎಂದು ಬಣ್ಣಿಸಿದರು.

ಅದೇ ಸಮಯದಲ್ಲಿ, ರೈಲ್ವೆ ಪ್ರತಿಸಲ ಎಚ್ಚರಿಕೆ ನೀಡಿದ್ದರೂ ಚಲಿಸುವ ರೈಲಿನಿಂದ ಇಳಿಯಲು ಪ್ರಯತ್ನಿಸಿದ ಪ್ರಯಾಣಿಕನನ್ನು ಬಳಕೆದಾರರೊಬ್ಬರು ಟೀಕಿಸಿದ್ದು, ಇಂತಹ ಪ್ರಾಣಾಂತಿಕ ಕೃತ್ಯಗಳನ್ನು ಕೇವಲ ಎಚ್ಚರಿಕೆಗಳಿಂದ ತಡೆಯಲು ಸಾಧ್ಯವಿಲ್ಲ. ಚಲಿಸುವ ರೈಲುಗಳನ್ನು ಹತ್ತುವ ಅಥವಾ ಇಳಿಯುವ ಇಂತಹ ಅಪಾಯಕಾರಿ ಸಾಹಸಗಳನ್ನು ಸಂಪೂರ್ಣವಾಗಿ ನಿರುತ್ಸಾಹಗೊಳಿಸಲು ಇಲಾಖೆಯು ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕು ಮತ್ತು ಇಂತಹ ಪ್ರಯಾಣಿಕರ ವಿರುದ್ಧ ಭಾರಿ ಮೊತ್ತದ ದಂಡವನ್ನು ವಿಧಿಸಬೇಕು ಎಂದು ಕಟುವಾಗಿ ಸಲಹೆ ನೀಡಿದ್ದಾರೆ (ಏಜೆನ್ಸೀಸ್​).