Ishan Kishan | ಬ್ಯಾಟ್ ಹಿಡಿಯುತ್ತಿದ್ದ ಕೈಯಲ್ಲಿ ಫೈಲ್!...ಕ್ರಿಕೆಟ್ಗೆ ಗ್ಯಾಪ್ ಕೊಟ್ಟು ಆರ್ಬಿಐ ಡ್ಯೂಟಿಗೆ ಹಾಜರಾಗಿದ್ದೇಕೆ ಇಶಾನ್ ಕಿಶನ್..?
: ಭಾರತ ತಂಡದ ಸ್ಪೋಟಕ ಆಟಗಾರ ಇಶಾನ್ ಕಿಶನ್ ಮತ್ತೆ ಸುದ್ದಿಯಲ್ಲಿದ್ದಾರೆ. ಆದರೆ, ಈ ಬಾರಿ ಅವರು ಸದ್ದು ಮಾಡುತ್ತಿರುವುದು ಮೈದಾನದಲ್ಲಿ ಬ್ಯಾಟಿಂಗ್ ಧಮಾಕ ಮಾಡಿದ್ದಕ್ಕಲ್ಲ, ಬದಲಿಗೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದ ಅಧಿಕಾರಿಯಾಗಿ ತಮ್ಮ ಕಚೇರಿಯ ಕರ್ತವ್ಯಕ್ಕೆ ಮರಳಿರುವುದಕ್ಕೆ.
ಸ್ಪರ್ಧಾತ್ಮಕ ಕ್ರಿಕೆಟ್ನಿಂದ ಸಿಕ್ಕಿರುವ ಈ ವಿರಾಮದ ಸಮಯವನ್ನು ವ್ಯರ್ಥ ಮಾಡದ ಇಶಾನ್, ಬಿಹಾರದ ಪಟನಾದಲ್ಲಿರುವ ಆರ್ಬಿಐ ಕಚೇರಿಗೆ ತೆರಳಿ ಅಸಿಸ್ಟೆಂಟ್ ಮ್ಯಾನೇಜರ್ ಆಗಿ ತಮ್ಮ ಅಧಿಕೃತ ಜವಾಬ್ದಾರಿಗಳನ್ನು ಪುನರಾರಂಭಿಸಿದ್ದಾರೆ. ಕ್ರೀಡಾ ಕೋಟಾದಡಿಯಲ್ಲಿ ಆರ್ಬಿಐಗೆ ಆಯ್ಕೆಯಾಗಿದ್ದ ಕಿಶನ್, ಕ್ರಿಕೆಟ್ನಿಂದ ಬಿಡುವು ಸಿಕ್ಕಾಗಲೆಲ್ಲಾ ಬ್ಯಾಂಕ್ ಕರ್ತವ್ಯದಲ್ಲಿ ನಿರತರಾಗುತ್ತಾರೆ.
ಮೈದಾನದಲ್ಲಿ ವಿಕೆಟ್ಕೀಪಿಂಗ್ ಮತ್ತು ಬಿರುಸಿನ ಬ್ಯಾಟಿಂಗ್ ಮೂಲಕ ಅಭಿಮಾನಿಗಳನ್ನು ರಂಜಿಸುತ್ತಿದ್ದ ಇಶಾನ್ ಕಿಶನ್, ಈಗ ಫೈಲ್ಗಳನ್ನು ಪರಿಶೀಲಿಸುತ್ತಾ ಆಫೀಸ್ ಕೆಲಸದಲ್ಲಿ ಮುಳುಗಿದ್ದಾರೆ. ದೇಶೀಯ ಹಾಗೂ ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದ ಸಿಕ್ಕಿರುವ ಈ ವಿರಾಮದ ಸಮಯದಲ್ಲಿ ಅವರು ಪಟನಾದಲ್ಲಿರುವ ಆರ್ಬಿಐ ಕಚೇರಿಯಲ್ಲಿ ಸಹಾಯಕ ವ್ಯವಸ್ಥಾಪಕರಾಗಿ ತಾತ್ಕಾಲಿಕವಾಗಿ ತಮ್ಮ ಕರ್ತವ್ಯವನ್ನು ಪುನರಾರಂಭಿಸಿದ್ದಾರೆ. ಮೈದಾನದಿಂದ ಹೊರಗುಳಿದು ಬ್ಯಾಂಕ್ ಅಧಿಕಾರಿಯಾಗಿ ಕಾರ್ಯನಿರ್ವಹಿಸುತ್ತಿರುವ ಅವರ ಹೊಸ ಅವತಾರವನ್ನು ಕಂಡು ಅಭಿಮಾನಿಗಳು ಹಾಗೂ ಬ್ಯಾಂಕ್ ಸಿಬ್ಬಂದಿ ಅಚ್ಚರಿಯ ಜೊತೆಗೆ ಸಂತಸ ವ್ಯಕ್ತಪಡಿಸಿದ್ದಾರೆ.
ಇಶಾನ್ ಕಿಶನ್ ಆರ್ಬಿಐಗೆ ಸೇರಿದ್ದು ಯಾಕೆ..?
ಇಶಾನ್ ಕಿಶನ್ ಕ್ರೀಡಾ ಕೋಟಾದಡಿಯಲ್ಲಿ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದಲ್ಲಿ ಸಹಾಯಕ ವ್ಯವಸ್ಥಾಪಕರಾಗಿ ನೇಮಕಗೊಂಡಿದ್ದಾರೆ. ಸರ್ಕಾರಿ ಹಾಗೂ ಸಾರ್ವಜನಿಕ ವಲಯದ ಸಂಸ್ಥೆಗಳಲ್ಲಿ ಉದ್ಯೋಗದಲ್ಲಿರುವ ಹಲವು ಭಾರತೀಯ ಕ್ರೀಡಾಪಟುಗಳಂತೆ, ಇಶಾನ್ ಕೂಡ ಕ್ರಿಕೆಟ್ನಿಂದ ಬಿಡುವು ಸಿಕ್ಕಾಗಲೆಲ್ಲಾ ತಮ್ಮ ಬ್ಯಾಂಕ್ ಕರ್ತವ್ಯವನ್ನು ನಿರ್ವಹಿಸುತ್ತಾರೆ. ಪ್ರಸ್ತುತ ಕ್ರಿಕೆಟ್ ಪಂದ್ಯಗಳಿಲ್ಲದ ಕಾರಣ, ತಮ್ಮ ತವರೂರಿಗೆ ಹತ್ತಿರವಿರುವ ಬಿಹಾರದ ಪಾಟ್ನಾ ಆರ್ಬಿಐ ಕಚೇರಿಯಲ್ಲಿ ಕರ್ತವ್ಯಕ್ಕೆ ಹಾಜರಾಗುವ ಮೂಲಕ ಕ್ರೀಡೇತರ ವೃತ್ತಿಪರ ಜವಾಬ್ದಾರಿಯನ್ನು ಪೂರೈಸುತ್ತಿದ್ದಾರೆ.
ಕ್ರಿಕೆಟ್ ವೃತ್ತಿಜೀವನದ ಮೇಲೆ ಪರಿಣಾಮ ಬೀರುತ್ತಾ..?
ಅಭಿಮಾನಿಗಳು ಇಶಾನ್ ಕಿಶನ್ ಅವರನ್ನು ವಿಕೆಟ್ ಕೀಪಿಂಗ್ ಮಾಡುತ್ತಾ ಅಥವಾ ಆರಂಭಿಕ ಬ್ಯಾಟರ್ ಆಗಿ ಮೈದಾನದಲ್ಲಿ ನೋಡಿ ಅಭ್ಯಾಸ ಮಾಡಿಕೊಂಡಿದ್ದಾರೆ. ಆದರೆ, ಅವರೀಗ ಕಚೇರಿ ಕೆಲಸಕ್ಕೆ ಮರಳಿರುವುದು ಅವರ ಜೀವನದ ಮತ್ತೊಂದು ಮಗ್ಗಲನ್ನು ಪರಿಚಯಿಸಿದೆ. ಸದ್ಯಕ್ಕೆ, ಈ ಯುವ ಕ್ರಿಕೆಟಿಗ ತಮ್ಮ ಮುಂದಿನ ಕ್ರಿಕೆಟ್ ಸರಣಿಗಳಿಗೆ ಸಿದ್ಧರಾಗುತ್ತಲೇ, ಮೈದಾನದಿಂದ ಹೊರಗಿನ ವೃತ್ತಿಪರ ಜವಾಬ್ದಾರಿಯನ್ನೂ ಸಮರ್ಥವಾಗಿ ನಿರ್ವಹಿಸುತ್ತಿದ್ದಾರೆ