ಧೋನಿ ನಾಯಕತ್ವದ ಹಿಂದೆ ಅಡಗಿದೆಯೇ ಕಹಿ ಸತ್ಯ? ಯುವಿ ಬಿಚ್ಚಿಟ್ಟ ಆ ಒಂದು ಸೀಕ್ರೆಟ್ ಈಗ ವೈರಲ್!
ನವದೆಹಲಿ: ಟೀಮ್ ಇಂಡಿಯಾದ ಸಾರ್ವಕಾಲಿಕ ಶ್ರೇಷ್ಠ ಆಲ್-ರೌಂಡರ್ಗಳಲ್ಲಿ ಒಬ್ಬರಾದ ಯುವರಾಜ್ ಸಿಂಗ್(Yuvraj Singh), 2007ರಲ್ಲಿ ಎಂ.ಎಸ್. ಧೋನಿ ಅವರಿಗೆ ನಾಯಕತ್ವ ನೀಡಿದ ನಿರ್ಧಾರದ ಬಗ್ಗೆ ತಮ್ಮ ಮನದಾಳದ ಮಾತುಗಳನ್ನು ಹಂಚಿಕೊಂಡಿದ್ದಾರೆ. ಹಿರಿಯ ಆಟಗಾರರಿದ್ದರೂ ಧೋನಿಯನ್ನು ನಾಯಕನನ್ನಾಗಿ ಮಾಡಿದ್ದು ಅನಿರೀಕ್ಷಿತವಾಗಿತ್ತು ಎಂದು ಅಭಿಪ್ರಾಯಪಟ್ಟಿದ್ದಾರೆ.
ನಾಯಕತ್ವದ ರೇಸ್ ಮತ್ತು ಯುವಿ ನಿರಾಸೆ
ಸಂದರ್ಶನವೊಂದರಲ್ಲಿ ಮಾತನಾಡಿದ ಯುವರಾಜ್ ಸಿಂಗ್, ನಾನು ತಂಡದಲ್ಲಿದ್ದಾಗ ಹರ್ಭಜನ್ ಸಿಂಗ್ ಮತ್ತು ವೀರೇಂದ್ರ ಸೆಹ್ವಾಗ್ ಅವರಂತಹ ಹಿರಿಯ ಆಟಗಾರರಿದ್ದರು. ಶ್ರೇಣಿಯ ಪ್ರಕಾರ ನಾನು ಅವರನ್ನು ಅನುಸರಿಸುತ್ತಿದ್ದೆ. ಒಂದು ಹಂತದಲ್ಲಿ ನಾನು ತಂಡದ ಉಪನಾಯಕನೂ ಆಗಿದ್ದೆ. ಆದರೆ ಹಠಾತ್ತನೆ, ಎಲ್ಲಿಂದಲೋ ಬಂದ ಎಂ.ಎಸ್. ಧೋನಿಯನ್ನು ನಾಯಕನನ್ನಾಗಿ ನೇಮಿಸಲಾಯಿತು ಎಂದು ನೆನಪಿಸಿಕೊಂಡಿದ್ದಾರೆ.
ತಾನು ತಂಡಕ್ಕೆ ಸುದೀರ್ಘ ಕಾಲ ಕೊಡುಗೆ ನೀಡಿದ್ದರೂ, ನಾಯಕತ್ವದ ವಿಷಯದಲ್ಲಿ ತನ್ನನ್ನು ಕಡೆಗಣಿಸಿದ್ದು ಆ ಸಮಯದಲ್ಲಿ ಸ್ವಲ್ಪ ಮಟ್ಟಿಗೆ ನಿರಾಸೆ ಮೂಡಿಸಿತ್ತು ಎಂದು ಯುವಿ ಒಪ್ಪಿಕೊಂಡಿದ್ದಾರೆ.
ಫ್ರಾಂಚೈಸಿ ಕ್ರಿಕೆಟ್ ಮತ್ತು ರಾಷ್ಟ್ರೀಯ ತಂಡ
ಇತ್ತೀಚಿನ ಐಪಿಎಲ್ ಮತ್ತು ಫ್ರಾಂಚೈಸಿ ಕ್ರಿಕೆಟ್ನ ಪ್ರಭಾವದ ಬಗ್ಗೆಯೂ ಮಾತನಾಡಿದ ಯುವಿ, ಕೇವಲ ಫ್ರಾಂಚೈಸಿ ಕ್ರಿಕೆಟ್ನಲ್ಲಿನ ಪ್ರದರ್ಶನ ನೋಡಿ ರಾಷ್ಟ್ರೀಯ ತಂಡದ ನಾಯಕತ್ವವನ್ನು ನಿರ್ಧರಿಸಬಾರದು. ದೇಶಕ್ಕಾಗಿ ಗೆಲ್ಲುವುದು ಮುಖ್ಯ ಗುರಿಯಾಗಿದ್ದರೂ, ವರ್ಷಗಳ ಕಾಲ ತಂಡಕ್ಕಾಗಿ ದುಡಿದ ಆಟಗಾರನನ್ನು ಕಡೆಗಣಿಸಿದಾಗ ಆ ಆಟಗಾರನ ದೃಷ್ಟಿಕೋನದಿಂದ ಅದು ನೋವುಂಟು ಮಾಡುತ್ತದೆ ಎಂದು ಮಾರ್ಮಿಕವಾಗಿ ನುಡಿದಿದ್ದಾರೆ.
ತಂದೆಯ ಹೇಳಿಕೆಗೆ ಕ್ಷಮೆಯಾಚನೆ
ಇದೇ ಸಂದರ್ಭದಲ್ಲಿ ಯುವರಾಜ್ ಸಿಂಗ್ ಮತ್ತೊಂದು ಮಹತ್ವದ ಹೆಜ್ಜೆ ಇಟ್ಟಿದ್ದಾರೆ. ತಮ್ಮ ತಂದೆ ಯೋಗ್ರಾಜ್ ಸಿಂಗ್ ಅವರು ಧೋನಿ ಮತ್ತು ಕಪಿಲ್ ದೇವ್ ವಿರುದ್ಧ ನೀಡಿದ್ದ ವಿವಾದಾತ್ಮಕ ಹೇಳಿಕೆಗಳಿಗಾಗಿ ಬಹಿರಂಗವಾಗಿ ಕ್ಷಮೆಯಾಚಿಸಿದ್ದಾರೆ. ನಾನು ಧೋನಿ ಮತ್ತು ಕಪಿಲ್ ಪಾಜಿ ಅವರಲ್ಲಿ ಕ್ಷಮೆ ಕೇಳುತ್ತೇನೆ. ನನ್ನ ತಂದೆಯ ಹೇಳಿಕೆಗಳನ್ನು ನಾನು ಬೆಂಬಲಿಸುವುದಿಲ್ಲ. ಇದು ಸರಿಯಲ್ಲ ಎಂದು ನಾನು ಅವರಿಗೆ ವೈಯಕ್ತಿಕವಾಗಿಯೂ ಹೇಳಿದ್ದೇನೆ ಎಂದು ಸ್ಪಷ್ಟಪಡಿಸಿದ್ದಾರೆ.
ಯುವರಾಜ್ ಸಿಂಗ್ ಅವರ ಈ ಮಾತುಗಳು ಕೇವಲ ಧೋನಿಯ ವಿರುದ್ಧದ ಟೀಕೆಯಲ್ಲ, ಬದಲಾಗಿ ಆ ಸಮಯದಲ್ಲಿ ತಂಡದ ಒಳಗೆ ನಡೆದ ಬೆಳವಣಿಗೆಗಳ ಪ್ರಾಮಾಣಿಕ ಅನಿಸಿಕೆಯಾಗಿದೆ. ಧೋನಿ ನಾಯಕತ್ವದಲ್ಲಿ ಭಾರತ ಎರಡು ವಿಶ್ವಕಪ್ ಗೆದ್ದಿದ್ದರೂ, ಆ ಹಾದಿಯಲ್ಲಿ ಹಿರಿಯ ಆಟಗಾರರು ಅನುಭವಿಸಿದ ಮಾನಸಿಕ ಸಂಘರ್ಷವನ್ನು ಯುವಿ ಮಾತುಗಳು ಎತ್ತಿ ತೋರಿಸುತ್ತವೆ,(ಏಜೆನ್ಸೀಸ್).