IPS ಅಧಿಕಾರಿ 'ಸಿಂಘಂ' ಆದ್ರೆ, ನಾವಿಲ್ಲಿ 'ಪುಷ್ಪ'... ಫ್ಲವರ್ ಅಂದುಕೊಂಡ್ರಾ ಎಂದ ಟಿಎಂಸಿ! ವಿಡಿಯೋ ವೈರಲ್​

ಹೌದು, ಪಶ್ಚಿಮ ಬಂಗಾಳದಲ್ಲಿ ಮುಕ್ತ ಮತ್ತು ನ್ಯಾಯಸಮ್ಮತ ಚುನಾವಣೆ ನಡೆಸುವ ಜವಾಬ್ದಾರಿ ಹೊತ್ತಿರುವ ಚುನಾವಣಾ ಆಯೋಗವು, ಯುಪಿ ಕೇಡರ್‌ನ ಖಡಕ್ ಐಪಿಎಸ್ ಅಧಿಕಾರಿ ಅಜಯ್ ಪಾಲ್ ಶರ್ಮಾ ಅವರನ್ನು ವಿಶೇಷ ವೀಕ್ಷಕರನ್ನಾಗಿ ನೇಮಿಸಿದೆ. ಇತ್ತೀಚೆಗೆ ಮತದಾನದ ವೇಳೆ ಮತದಾರರನ್ನು ಹೆದರಿಸುವ ಅಥವಾ ಪ್ರಭಾವ ಬೀರಲು ಯತ್ನಿಸುವ ಗೂಂಡಾಗಳಿಗೆ ಶರ್ಮಾ ಅವರು ಕಠಿಣ ಎಚ್ಚರಿಕೆ ನೀಡಿದ್ದರು. "ಯಾರೇ ಕಾನೂನು ಕೈಗೆತ್ತಿಕೊಂಡರೂ ಸುಮ್ಮನೆ ಬಿಡುವುದಿಲ್ಲ" ಎಂಬ ಅವರ ಮಾತುಗಳು ಬಂಗಾಳದ ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿತ್ತು.

ಅಧಿಕಾರಿಯ ಈ ಎಚ್ಚರಿಕೆಯನ್ನು ಟಿಎಂಸಿ ನಾಯಕರು ತೀವ್ರವಾಗಿ ಖಂಡಿಸಿದ್ದಾರೆ. ಟಿಎಂಸಿಯ ಸ್ಥಳೀಯ ನಾಯಕರೊಬ್ಬರು ಬಹಿರಂಗ ಸಭೆಯಲ್ಲಿ ಮಾತನಾಡುತ್ತಾ, "ಕೆಲವರು ಇಲ್ಲಿಗೆ ಬಂದು ಸಿಂಘಮ್ ರೀತಿ ವರ್ತಿಸುತ್ತಿದ್ದಾರೆ. ಅವರು ಸಿಂಘಮ್ ಆಗಿದ್ದರೆ, ನಾನು ಪುಷ್ಪ. ಪುಷ್ಪ ಅಂದ್ರೆ ಫ್ಲವರ್ ಅಂದುಕೊಂಡ್ರಾ? ಫೈರ್ ಇದು! ನಾವು ಯಾರಿಗೂ ಹೆದರುವುದಿಲ್ಲ" ಎಂದು 'ಪುಷ್ಪ' ಚಿತ್ರದ ಖ್ಯಾತ ಸಂಭಾಷಣೆಯನ್ನು ನೆನಪಿಸಿದ್ದಾರೆ.

ಈ ಹೇಳಿಕೆಯ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ಚುನಾವಣಾ ಕಣದಲ್ಲಿ ಅಧಿಕಾರಿಗಳು ಮತ್ತು ರಾಜಕಾರಣಿಗಳ ನಡುವಿನ ಶೀತಲ ಸಮರವನ್ನು ಅನಾವರಣಗೊಳಿಸಿದೆ.

ಐಪಿಎಸ್ ಅಧಿಕಾರಿ ಅಜಯ್ ಪಾಲ್ ಶರ್ಮಾ ಅವರ ವರ್ತನೆಯು ಪಕ್ಷಪಾತದಿಂದ ಕೂಡಿದೆ ಮತ್ತು ಅವರು ರಾಜ್ಯದ ಆಡಳಿತ ಪಕ್ಷದ ಕಾರ್ಯಕರ್ತರನ್ನು ಗುರಿಯಾಗಿಸಿಕೊಂಡು ಬೆದರಿಕೆ ಹಾಕುತ್ತಿದ್ದಾರೆ ಎಂದು ಆರೋಪಿಸಿ ಟಿಎಂಸಿ ಚುನಾವಣಾ ಆಯೋಗಕ್ಕೆ ದೂರು ನೀಡಿದೆ. ಕೇಂದ್ರದ ಏಜೆಂಟ್‌ಗಳಂತೆ ಕೆಲವು ಅಧಿಕಾರಿಗಳು ವರ್ತಿಸುತ್ತಿದ್ದಾರೆ ಎಂದು ಮಮತಾ ಬ್ಯಾನರ್ಜಿ ನೇತೃತ್ವದ ಪಕ್ಷ ಆಕ್ರೋಶ ಹೊರಹಾಕಿದೆ.

ಅಂದಹಾಗೆ, ಐಪಿಎಸ್ ಅಧಿಕಾರಿ ಅಜಯ್ ಪಾಲ್ ಶರ್ಮಾ ಅವರನ್ನು ಉತ್ತರ ಪ್ರದೇಶದಲ್ಲಿ 'ಎನ್ಕೌಂಟರ್ ಸ್ಪೆಷಲಿಸ್ಟ್' ಎಂದೇ ಕರೆಯಲಾಗುತ್ತದೆ. ಅಜಯ್ ಪಾಲ್ ಶರ್ಮಾ ಅವರ ಖಡಕ್ ಶೈಲಿಗೆ ಅಲ್ಲಿನ ಜನರು 'ರಿಯಲ್ ಸಿಂಘಮ್' ಎಂಬ ಬಿರುದು ನೀಡಿದ್ದಾರೆ. ಈಗ ಇದೇ ಶೈಲಿಯನ್ನು ಅವರು ಬಂಗಾಳದಲ್ಲೂ ತೋರುತ್ತಿರುವುದು ಟಿಎಂಸಿ ನಾಯಕರ ನಿದ್ದೆ ಕೆಡಿಸಿದೆ.

ಒಟ್ಟಾರೆಯಾಗಿ, ಬಂಗಾಳದ ಚುನಾವಣಾ ಕಣ ಈಗ ಸಿನಿಮಾ ಡೈಲಾಗ್‌ಗಳು ಮತ್ತು ಖಡಕ್ ಅಧಿಕಾರಿಗಳ ನಡುವಿನ ಜಿದ್ದಾಜಿದ್ದಿಗೆ ಸಾಕ್ಷಿಯಾಗುತ್ತಿದ್ದು, ಮುಂದಿನ ದಿನಗಳಲ್ಲಿ ಈ ಸಮರ ಯಾವ ತಿರುವು ಪಡೆಯುತ್ತದೆ ಎಂಬುದು ಕುತೂಹಲ ಮೂಡಿಸಿದೆ,(ಏಜೆನ್ಸೀಸ್​).