ನೆರೆಮನೆಯವರ ಜಗಳಕ್ಕೆ ಬಲಿಯಾದ ಮುಗ್ಧ ಜೀವಿಗಳು: ನಾಯಿಮರಿಗಳನ್ನು ಗೋಡೆಗೆ ಅಪ್ಪಳಿಸಿ ಕೊಂದ ಪಾಪಿ ಮಹಿಳೆ; ಸಿಸಿಟಿವಿಯಲ್ಲಿ ಸೆರೆಯಾದ ಭಯಾನಕ ದೃಶ್ಯ! Woman Kills Puppies

ತಮಿಳುನಾಡು: ಸಾಮಾನ್ಯವಾಗಿ ನೆರೆಹೊರೆಯವರ ನಡುವೆ ಸಣ್ಣಪುಟ್ಟ ಜಗಳಗಳು ನಡೆಯುವುದು ಸಹಜ. ಆದರೆ, ಈ ಸಣ್ಣ ಜಗಳವೊಂದು ಇಬ್ಬರು ಮಹಿಳೆಯರ ದ್ವೇಷಕ್ಕೆ ಕಾರಣವಾಗಿ, ಕೊನೆಗೆ ಎರಡು ಮುಗ್ಧ ನಾಯಿಮರಿಗಳ ಪ್ರಾಣವನ್ನು ಬಲಿ ಪಡೆದ (Woman Kills Puppies) ಘಟನೆ ತಮಿಳುನಾಡಿನ ತಿರುಚ್ಚಿಯ ಕಂಬರಸಂಪೆಟ್ಟೈನಲ್ಲಿ ನಡೆದಿದೆ.

ಕಂಬರಸಂಪೆಟ್ಟೈ ನಿವಾಸಿಗಳಾದ ಜೆ. ಮೀನಾಕ್ಷಿ ಮಿಶ್ರಾ ಮತ್ತು ಜಿ. ಭುವನೇಶ್ವರಿ ಎಂಬ ಇಬ್ಬರು ಮಹಿಳೆಯರ ನಡುವೆ ಕಳೆದ ಒಂದು ವರ್ಷದಿಂದ ಯಾವುದೋ ವಿಚಾರಕ್ಕೆ ಆಗಾಗ ಜಗಳ ನಡೆಯುತ್ತಲೇ ಇತ್ತು. ಮಾರ್ಚ್ 4ರ ಬೆಳಿಗ್ಗೆ ಈ ದ್ವೇಷ ತಾರಕಕ್ಕೇರಿತು. ಮಾತಿನ ಚಕಮಕಿ ಜೋರಾಗಿ, ಒಂದು ಹಂತದಲ್ಲಿ ಭುವನೇಶ್ವರಿ ಸಿಟ್ಟಿನ ಭರದಲ್ಲಿ ಕಲ್ಲು ಎಸೆದಿದ್ದಾರೆ. ಆ ಕಲ್ಲು ಮೀನಾಕ್ಷಿಯವರ ಮೂರು ವರ್ಷದ ಪುಟ್ಟ ಮಗನಿಗೆ ತಗುಲಿ ಗಾಯವಾಗಿದೆ.

ತನ್ನ ಮಗನಿಗೆ ಪೆಟ್ಟಾದ ತಕ್ಷಣ ಆತಂಕಗೊಂಡ ಮೀನಾಕ್ಷಿ, ಮಗುವನ್ನು ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ಆಸ್ಪತ್ರೆಯಿಂದ ಮನೆಗೆ ಮರಳಿದಾಗ, ನೆರೆಮನೆಯವರಾದ ಭುವನೇಶ್ವರಿ ತಮ್ಮ ಮನೆಯ ಮುಂದೆ ಇರುವ ನಾಯಿಮರಿಗಳನ್ನು ನೋಡಿಕೊಳ್ಳುತ್ತಿರುವುದು ಕಂಡಿದೆ. ಈಗಾಗಲೇ ಮಗನಿಗೆ ಪೆಟ್ಟಾದ ಕೋಪದಲ್ಲಿದ್ದ ಮೀನಾಕ್ಷಿಗೆ, ಆ ನಾಯಿಮರಿಗಳನ್ನು ನೋಡಿದಾಗ ದ್ವೇಷ ಇನ್ನಷ್ಟು ಉಲ್ಬಣಿಸಿದೆ.

ಕೋಪದ ಪರಮಾವಧಿಯಲ್ಲಿ, ಯಾವುದೇ ಕರುಣೆಯಿಲ್ಲದೆ ಮೀನಾಕ್ಷಿ ಎರಡು ಪುಟ್ಟ ನಾಯಿಮರಿಗಳನ್ನು ಎತ್ತಿಕೊಂಡು ರಸ್ತೆಬದಿಯ ಗೋಡೆಗೆ ಬಲವಾಗಿ ಎಸೆದಿದ್ದಾರೆ. ಆ ಮುಗ್ಧ ಜೀವಿಗಳು ಸ್ಥಳದಲ್ಲೇ ಸಾವನ್ನಪ್ಪಿವೆ. ಈ ಕ್ರೂರ ದೃಶ್ಯ ಅಲ್ಲಿನ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದಂತೆ ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದರು.

ವಿಡಿಯೋ ವೈರಲ್ ಆಗುತ್ತಿದ್ದಂತೆ ಪೀಪಲ್ ಫಾರ್ ಅನಿಮಲ್ಸ್ ಸಂಘಟನೆಯವರು ದೂರು ನೀಡಿದರು. ತಕ್ಷಣ ಎಚ್ಚೆತ್ತ ಜೀಯಪುರಂ ಪೊಲೀಸರು ಮೀನಾಕ್ಷಿ ಮಿಶ್ರಾಳನ್ನು ಬಂಧಿಸಿದರು. ಆಕೆಯ ಮೇಲೆ ಪ್ರಾಣಿ ಹಿಂಸೆ ತಡೆ ಕಾಯ್ದೆ ಮತ್ತು ಭಾರತೀಯ ನ್ಯಾಯ ಸಂಹಿತೆಯಡಿ ಪ್ರಕರಣ ದಾಖಲಾಗಿದೆ.

ಇತ್ತ, ಮೀನಾಕ್ಷಿಯ ಪತಿ ಜೈ ಗಣೇಶ್ ಅವರು, ತಮ್ಮ ಮಗನಿಗೆ ಕಲ್ಲಿನಿಂದ ಗಾಯಗೊಳಿಸಿದ ಆರೋಪದ ಮೇಲೆ ಭುವನೇಶ್ವರಿ ವಿರುದ್ಧ ದೂರು ದಾಖಲಿಸಿದ್ದಾರೆ. ಈ ದೂರಿನ ಆಧಾರದ ಮೇಲೆ ಪೊಲೀಸರು ಭುವನೇಶ್ವರಿಗೂ ಸಂಕೋಲೆ ತೊಡಿಸಿದ್ದಾರೆ. ಸದ್ಯ ನೆರೆಹೊರೆಯವರ ಜಗಳದಿಂದ ಇಬ್ಬರೂ ಮಹಿಳೆಯರು ಈಗ ಜೈಲು ಪಾಲಾಗಿದ್ದಾರೆ.

ನೆರೆಹೊರೆಯವರ ಜಗಳಗಳು ಎಷ್ಟು ದೂರ ಹೋಗಬಾರದು ಎಂಬುದಕ್ಕೆ ಈ ಘಟನೆ ಒಂದು ಕರಾಳ ಉದಾಹರಣೆ. ಮನುಷ್ಯರ ನಡುವಿನ ದ್ವೇಷಕ್ಕೆ ಅಸಹಾಯಕ ಪ್ರಾಣಿಗಳು ಬಲಿಯಾಗಿದ್ದು ನಿಜಕ್ಕೂ ದುರಂತ. ಇಂತಹ ಘಟನೆಗಳು ನಮ್ಮ ಸಮಾಜದಲ್ಲಿನ ಅಮಾನವೀಯತೆಯನ್ನು ಎತ್ತಿ ತೋರಿಸುತ್ತವೆ. ಕಾನೂನು ಕೈಗೆ ತೆಗೆದುಕೊಳ್ಳುವ ಬದಲು ಶಾಂತಿಯುತವಾಗಿ ಸಮಸ್ಯೆಗಳನ್ನು ಬಗೆಹರಿಸಿಕೊಳ್ಳುವ ಸಂಸ್ಕೃತಿ ಬೆಳೆಯಬೇಕಿದೆ ಎನ್ನುವುದು ನೆಟ್ಟಿಗರ ಅಭಿಮತವಾಗಿದೆ,(ಏಜನ್ಸೀಸ್​).