ಭಾರತ-ನೇಪಾಳ ಗಡಿ ವಿವಾದ: 3ನೇ ದೇಶಕ್ಕೆ ಇಲ್ಲಿ ಜಾಗವಿಲ್ಲ, ಶೇ. ೯೮ ರಷ್ಟು ಗಡಿ ಈಗಾಗಲೇ ಫೈನಲ್! ಬಾಲೆನ್ ಶಾ ಹೇಳಿಕೆಗೆ MEA ಖಡಕ್ ವಾರ್ನಿಂಗ್! India-Nepal Border Issue

ನೇಪಾಳದ ಪ್ರಧಾನಿ ಬಾಲೆನ್ ಶಾ ಮತ್ತು ಅಲ್ಲಿನ ವಿದೇಶಾಂಗ ಸಚಿವಾಲಯ ಇತ್ತೀಚೆಗೆ ಗಡಿ ವಿಷಯವಾಗಿ ನೀಡಿರುವ ಅಧಿಕೃತ ಹೇಳಿಕೆಗಳನ್ನು ಭಾರತ ಗಂಭೀರವಾಗಿ ಪರಿಗಣಿಸಿದೆ. ಅಲ್ಲದೆ, ಈ ಕುರಿತು ಪ್ರಕಟಣೆ ಹೊರಡಿಸಿರುವ ಭಾರತದ ವಿದೇಶಾಂಗ ಸಚಿವಾಲಯ, ಭಾರತ ಮತ್ತು ನೇಪಾಳ ನಡುವಿನ ಗಡಿಯ ಸುಮಾರು ಶೇ. ೯೮ ರಷ್ಟು ಭಾಗವನ್ನು ಈಗಾಗಲೇ ಸಂಪೂರ್ಣವಾಗಿ ಗುರುತಿಸಿ, ಗಡಿ ರೇಖೆ ಎಳೆಯಲಾಗಿದೆ. ಕೇವಲ ಕೆಲವು ಸಣ್ಣ ಪ್ರದೇಶಗಳು ಮಾತ್ರ ಇತ್ಯರ್ಥವಾಗಬೇಕಿದೆ. ಗಂಡಕ ನದಿಯ ಹರಿವಿನ ದಿಕ್ಕು ಸತತವಾಗಿ ಬದಲಾಗುತ್ತಿರುವುದರಿಂದ ಈ ಗಡಿ ಗೊಂದಲ ಸೃಷ್ಟಿಯಾಗಿದೆಯೇ ಹೊರತು ಇದರಲ್ಲಿ ಯಾವುದೇ ರಾಜಕೀಯ ವಿವಾದವಿಲ್ಲ ಎಂದು ಕಠಿಣವಾಗಿ ಹೇಳಿದೆ.

ಇನ್ನೊಂದೆಡೆ, ನೇಪಾಳದ ಪ್ರಧಾನಿ ಬಾಲೆನ್ ಶಾ ಅವರು ಪ್ರಧಾನಿಯಾದ ನಂತರ ಮೊದಲ ಬಾರಿಗೆ ಅಲ್ಲಿನ ಸಂಸತ್ ಅಧಿವೇಶನದಲ್ಲಿ ಭಾಗವಹಿಸಿ ಗಡಿ ವಿವಾದದ ಬಗ್ಗೆ ಮಾತನಾಡುತ್ತಾ ಸ್ಫೋಟಕ ಸತ್ಯವೊಂದನ್ನು ಒಪ್ಪಿಕೊಂಡಿದ್ದಾರೆ. ನಾನು ಪ್ರಧಾನಿಯಾದ ನಂತರವಷ್ಟೇ ನನಗೆ ಒಂದು ಆಘಾತಕಾರಿ ಸತ್ಯ ತಿಳಿದುಬಂದಿದೆ. ಕೇವಲ ಭಾರತ ಮಾತ್ರ ನೇಪಾಳದ ಭೂಮಿಯನ್ನು ಆಕ್ರಮಿಸಿಕೊಂಡಿಲ್ಲ, ಬದಲಿಗೆ ನೇಪಾಳ ಕೂಡ ಭಾರತದ ಹಲವು ಪ್ರದೇಶಗಳನ್ನು ಅತಿಕ್ರಮಣ ಮಾಡಿದೆ. ಈಗ ಉಭಯ ದೇಶಗಳು ಸತ್ಯಾಂಶಗಳನ್ನು ಅಧ್ಯಯನ ಮಾಡಿ, ಸೌಹಾರ್ದಯುತವಾಗಿ ಕುಳಿತು ಇದನ್ನು ಬಗೆಹರಿಸಿಕೊಳ್ಳಬೇಕಿದೆ ಎಂದು ಸಂಸತ್ತಿನಲ್ಲಿ ಸಂಸದರ ಪ್ರಶ್ನೆಗೆ ಉತ್ತರಿಸಿದ್ದಾರೆ.

ಆದರೆ, ಇದೇ ವೇಳೆ ವಿವಾದವನ್ನು ಜಾಗತೀಕರಣಗೊಳಿಸಲು ಯತ್ನಿಸಿದ ಬಾಲೆನ್ ಶಾ, ಇತಿಹಾಸಕಾರರು, ಸರ್ವೇಯರ್‌ಗಳು ಮತ್ತು ತಜ್ಞರ ಸಹಾಯದಿಂದ ಪರಿಹಾರ ಕಂಡುಕೊಳ್ಳಲು ಭಾರತ ಮತ್ತು ನೇಪಾಳ ಒಪ್ಪಿಕೊಂಡಿವೆ ಎಂದು ಹೇಳುತ್ತಲೇ, ಈ ಗಡಿ ವಿಷಯವನ್ನು ತಾವು ಈಗಾಗಲೇ ಚೀನಾ ಮತ್ತು ಬ್ರಿಟನ್ ಸರ್ಕಾರದ ಮುಂದೆಯೂ ಪ್ರಸ್ತಾಪಿಸಿದ್ದಾಗಿ ಹೇಳಿಕೆ ನೀಡಿ ಭಾರತದ ಆಕ್ರೋಶಕ್ಕೆ ಕಾರಣರಾಗಿದ್ದಾರೆ.

ನೇಪಾಳದಲ್ಲಿ ಚೀನಾದ ಪ್ರಭಾವ ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗುತ್ತಿರುವುದನ್ನು ಸೂಕ್ಷ್ಮವಾಗಿ ಗಮನಿಸುತ್ತಿರುವ ಭಾರತದ ರಕ್ಷಣಾ ವಲಯ, ಗಡಿ ವಿಷಯದಲ್ಲಿ ಯಾವುದೇ ಹೊರಗಿನ ಶಕ್ತಿಗಳು ಹಸ್ತಕ್ಷೇಪ ಮಾಡುವುದನ್ನು ಸಹಿಸುವುದಿಲ್ಲ ಎಂದು ಸ್ಪಷ್ಟವಾಗಿ ಸಂದೇಶ ರವಾನಿಸಿದೆ,(ಏಜೆನ್ಸೀಸ್​).