10 ವಾರಗಳಲ್ಲಿ 1,00,00,00,00,000 ಸಾರ್ವಕಾಲಿಕ ದಾಖಲೆಯ ನಷ್ಟ: ದೇಶದ ಇಂಧನ ಭದ್ರತೆಗೆ ಎದುರಾಗಿದೆ ಸಂಕಷ್ಟ! India Energy Shock

India Energy Shock : ಜಾಗತಿಕ ಇಂಧನ ಬೆಲೆ ಏರಿಕೆಯ ನಡುವೆಯೂ ಭಾರತೀಯ ಗ್ರಾಹಕರಿಗೆ ಹೊರೆಯಾಗದಂತೆ ರಕ್ಷಿಸಲು ಸರ್ಕಾರಿ ಸ್ವಾಮ್ಯದ ತೈಲ ಕಂಪನಿಗಳು ಪ್ರತಿದಿನ ಅಂದಾಜು 1,600 ರಿಂದ 1,700 ಕೋಟಿ ರೂಪಾಯಿ ನಷ್ಟವನ್ನು ಅನುಭವಿಸುತ್ತಿವೆ. ಕಳೆದ ಹತ್ತು ವಾರಗಳಲ್ಲಿ ಈ ಒಟ್ಟು ನಷ್ಟದ ಮೊತ್ತವು 1 ಲಕ್ಷ ಕೋಟಿ ರೂ. ದಾಟಿದ್ದು, ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲ ಬೆಲೆ ಹೆಚ್ಚಿದ್ದರೂ ದೇಶೀಯವಾಗಿ ಬೆಲೆ ಏರಿಕೆ ಮಾಡದಿರುವುದು ಕಂಪನಿಗಳ ಮೇಲೆ ಭಾರೀ ಆರ್ಥಿಕ ಒತ್ತಡ ಹೇರುತ್ತಿದೆ. ಈ ರೀತಿ ನಿರಂತರವಾಗಿ ನಷ್ಟ ಅನುಭವಿಸುತ್ತಾ ಹೋದರೆ, ಈ ಕಂಪನಿಗಳು ಆರ್ಥಿಕವಾಗಿ ಎಷ್ಟು ದಿನಗಳ ಕಾಲ ಸುಧಾರಿಸಿಕೊಳ್ಳಲು ಸಾಧ್ಯ ಎಂಬ ಆತಂಕಕಾರಿ ಪ್ರಶ್ನೆ ಈಗ ಎದುರಾಗಿದೆ.

ಕಳೆದ ಹತ್ತು ವಾರಗಳ ಹಿಂದೆ ಮಧ್ಯಪ್ರಾಚ್ಯದಲ್ಲಿ ಯುದ್ಧ ಆರಂಭವಾದಾಗಿನಿಂದ, ವಿಶ್ವದ ಅನೇಕ ರಾಷ್ಟ್ರಗಳು ತೈಲ ಪೂರೈಕೆಯಲ್ಲಿ ವ್ಯತ್ಯಯ ಅಥವಾ ಭಾರೀ ಬೆಲೆ ಏರಿಕೆಯನ್ನು ಅನುಭವಿಸುತ್ತಿದ್ದರೂ, ಭಾರತದ ಸರ್ಕಾರಿ ಸ್ವಾಮ್ಯದ ತೈಲ ಕಂಪನಿಗಳು ಮಾತ್ರ ದೇಶೀಯ ಗ್ರಾಹಕರಿಗೆ ನಿರಂತರವಾಗಿ ಪೆಟ್ರೋಲ್, ಡೀಸೆಲ್ ಮತ್ತು ಅಡುಗೆ ಅನಿಲವನ್ನು (LPG) ಪೂರೈಸುತ್ತಿವೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಗಗನಕ್ಕೇರಿದ್ದರೂ, ಜನಸಾಮಾನ್ಯರಿಗೆ ಹೊರೆಯಾಗದಂತೆ ಈ ಕಂಪನಿಗಳು ತಮ್ಮ ಮೂಲ ವೆಚ್ಚಕ್ಕಿಂತಲೂ ಅತ್ಯಂತ ಕಡಿಮೆ ದರದಲ್ಲಿ ಇಂಧನವನ್ನು ಮಾರಾಟ ಮಾಡುತ್ತಿವೆ. ಜಾಗತಿಕ ಇಂಧನ ಬಿಕ್ಕಟ್ಟಿನ ನಡುವೆಯೂ ಬೆಲೆ ಏರಿಕೆ ಮಾಡದೆ ಅಥವಾ ಪೂರೈಕೆಯಲ್ಲಿ ಕಡಿತ ಮಾಡದೆ ಆರ್ಥಿಕತೆಯನ್ನು ರಕ್ಷಿಸುವ ಮಹತ್ತರ ಜವಾಬ್ದಾರಿಯನ್ನು ಇವು ನಿರ್ವಹಿಸುತ್ತಿವೆ.

ಇದರ ಪರಿಣಾಮವಾಗಿ, ದೇಶದ ಪ್ರಮುಖ ಮೂರು ಸರ್ಕಾರಿ ತೈಲ ಕಂಪನಿಗಳಾದ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ (IOC), ಭಾರತ್ ಪೆಟ್ರೋಲಿಯಂ (BPCL) ಮತ್ತು ಹಿಂದೂಸ್ತಾನ್ ಪೆಟ್ರೋಲಿಯಂ (HPCL) ಈಗ ಸಾರ್ವಕಾಲಿಕ ದಾಖಲೆಯ ಮಟ್ಟದ 'ಅಂಡರ್-ರಿಕವರಿ' ನಷ್ಟವನ್ನು ಎದುರಿಸುತ್ತಿವೆ. ಅಂದರೆ, ಅಂತಾರಾಷ್ಟ್ರೀಯ ಮಾರುಕಟ್ಟೆಯಿಂದ ಇಂಧನವನ್ನು ಖರೀದಿಸಲು ತಗಲುವ ನೈಜ ವೆಚ್ಚಕ್ಕೂ ಮತ್ತು ಭಾರತದಲ್ಲಿ ಜನಸಾಮಾನ್ಯರಿಗೆ ಮಾರಾಟ ಮಾಡುತ್ತಿರುವ ಚಿಲ್ಲರೆ ದರಕ್ಕೂ ನಡುವೆ ಭಾರಿ ವ್ಯತ್ಯಾಸವಿದ್ದು, ಈ ಕಂದಕವು ಕಂಪನಿಗಳ ಆರ್ಥಿಕ ಸ್ಥಿತಿಯನ್ನು ಹದಗೆಡಿಸುತ್ತಿದೆ ಎಂದು ಈ ವಿಷಯದ ಬಗ್ಗೆ ನೇರ ಜ್ಞಾನವಿರುವ ಮೂಲಗಳನ್ನು ಉಲ್ಲೇಖಿಸಿ ಪಿಟಿಐ (PTI) ವರದಿ ಮಾಡಿದೆ.

ಪೆಟ್ರೋಲ್, ಡೀಸೆಲ್ ಮತ್ತು ಅಡುಗೆ ಅನಿಲದ (LPG) ಮಾರಾಟದಿಂದ ತೈಲ ಕಂಪನಿಗಳಿಗೆ ಪ್ರತಿದಿನ ಸುಮಾರು 1,600 ರಿಂದ 1,700 ಕೋಟಿ ರೂ. ನಷ್ಟವಾಗುತ್ತಿದ್ದು, ಕಳೆದ 10 ವಾರಗಳಲ್ಲಿ ಈ ಒಟ್ಟು ಮೊತ್ತವು 1 ಲಕ್ಷ ಕೋಟಿ ರೂ. ದಾಟಿದೆ. ಕಚ್ಚಾ ತೈಲದ ಬೆಲೆಯಲ್ಲಿ ಶೇ. 50 ರಷ್ಟು ಏರಿಕೆಯಾಗಿದ್ದರೂ ಸಹ, ದೇಶದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳನ್ನು ಕಳೆದ ಎರಡು ವರ್ಷಗಳಿಂದ ಕ್ರಮವಾಗಿ 94.77 ಮತ್ತು 87.67ಕ್ಕೇ ಸ್ಥಿರವಾಗಿಡಲಾಗಿದೆ. ಮಾರ್ಚ್ ತಿಂಗಳಲ್ಲಿ ಸಿಲಿಂಡರ್ ದರವನ್ನು 60 ರೂ. ಹೆಚ್ಚಿಸಲಾಗಿದ್ದರೂ, ಅಡುಗೆ ಅನಿಲದ ಪ್ರಸ್ತುತ ಬೆಲೆಯು ಅದರ ನೈಜ ವೆಚ್ಚಕ್ಕಿಂತ ಇಂದಿಗೂ ಅತ್ಯಂತ ಕಡಿಮೆಯಿದೆ ಎಂದು ವರದಿಯಾಗಿದೆ.

ತೈಲ ಕಂಪನಿಗಳು ಇಂಧನ ಮಾರಾಟದಿಂದ ಬರುವ ಆದಾಯವನ್ನೇ ಕಚ್ಚಾ ತೈಲ ಖರೀದಿ, ಸಂಸ್ಕರಣಾ ಮೂಲಸೌಕರ್ಯ ಮತ್ತು ವಿತರಣಾ ಜಾಲದ ನಿರ್ವಹಣೆಗಾಗಿ ಅವಲಂಬಿಸಿವೆ ಎಂದು ಪಿಟಿಐ ವರದಿ ಮಾಡಿದೆ. ಕಳೆದ 10 ವಾರಗಳಿಂದ ಭಾರತೀಯ ಮಾರುಕಟ್ಟೆಯನ್ನು ಜಾಗತಿಕ ಬೆಲೆ ಏರಿಕೆಯಿಂದ ರಕ್ಷಿಸಿರುವ ಈ ಕಂಪನಿಗಳು, ಈಗ ಆರ್ಥಿಕ ಒತ್ತಡಕ್ಕೆ ಸಿಲುಕಿದ್ದು ಕಚ್ಚಾ ತೈಲ ಖರೀದಿಸಲು ಹೆಚ್ಚಿನ ಸಾಲ ಮಾಡಬೇಕಾದ ಅನಿವಾರ್ಯತೆ ಎದುರಿಸುತ್ತಿವೆ.

ಕಚ್ಚಾ ತೈಲದ ಬೆಲೆ ಹೀಗೆಯೇ ಮುಂದುವರಿದರೆ, ಕಂಪನಿಗಳು ತಮ್ಮ ಕಾರ್ಯವಾಹಿ ಬಂಡವಾಳಕ್ಕಾಗಿ ಹೆಚ್ಚಿನ ಸಾಲ ಪಡೆಯಬೇಕಾಗಬಹುದು ಮತ್ತು ಕೆಲವು ಬಂಡವಾಳ ಹೂಡಿಕೆಗಳ ಆದ್ಯತೆಗಳನ್ನು ಬದಲಾಯಿಸಬೇಕಾಗಬಹುದು; ಆದಾಗ್ಯೂ, ತೈಲ ಸಂಸ್ಕರಣಾ ವಿಸ್ತರಣೆ, ಇಂಧನ ಭದ್ರತೆ ಮತ್ತು ಎಥೆನಾಲ್ ಮಿಶ್ರಣದಂತಹ ರಾಷ್ಟ್ರೀಯ ಆದ್ಯತೆಯ ಯೋಜನೆಗಳು ಸರ್ಕಾರದ ಬೆಂಬಲದೊಂದಿಗೆ ಮುಂದುವರಿಯಲಿವೆ ಎಂದು ಮೂಲಗಳು ತಿಳಿಸಿವೆ.

ತೈಲ ಕಂಪನಿಗಳು ತೀವ್ರ ಆರ್ಥಿಕ ಒತ್ತಡದಲ್ಲಿ ಕಾರ್ಯನಿರ್ವಹಿಸುತ್ತಿವೆ ಎಂದು ತಿಳಿಸಿರುವ ಮತ್ತೊಂದು ಮೂಲವು, ಭಾರತದ ಇಂಧನ ಭದ್ರತೆ, ನಿರಂತರ ಪೂರೈಕೆ ಮತ್ತು ಆರ್ಥಿಕ ಸ್ಥಿರತೆಗೆ ಈ ಕಂಪನಿಗಳ ಆರ್ಥಿಕ ಸದೃಢತೆ ಅತ್ಯಗತ್ಯ ಎಂದು ಒತ್ತಿಹೇಳಿದೆ. ಕಂಪನಿಗಳ ಬ್ಯಾಲೆನ್ಸ್ ಶೀಟ್ ಮೇಲೆ ಹೀಗೆಯೇ ಒತ್ತಡ ಮುಂದುವರಿದರೆ ತೈಲ ಸಂಸ್ಕರಣೆ, ಪೈಪ್‌ಲೈನ್ ಮತ್ತು ಸ್ವಚ್ಛ ಇಂಧನ ಯೋಜನೆಗಳ ಮೇಲಿನ ಭವಿಷ್ಯದ ಹೂಡಿಕೆಯ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು. ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಏರಿಕೆ ಮಾಡುವುದು ಈಗ ಸರ್ಕಾರದ ರಾಜಕೀಯ ನಿರ್ಧಾರವಾಗಿದೆ ಎಂದು ಹೇಳಿರುವ ಮೂಲಗಳು, ಇಂಧನ ಬೆಲೆ ಏರಿಕೆ ಅನಿವಾರ್ಯವಾಗಿದ್ದರೂ ಅದರ ಸಮಯ ಮತ್ತು ಪ್ರಮಾಣವನ್ನು ಸರ್ಕಾರವೇ ನಿರ್ಧರಿಸಬೇಕಿದೆ ಎಂದು ಸ್ಪಷ್ಟಪಡಿಸಿವೆ.

ಪಶ್ಚಿಮ ಏಷ್ಯಾದ ಸಂಘರ್ಷ ಆರಂಭವಾದಾಗಿನಿಂದ ಜಪಾನ್‌ನಿಂದ ಹಿಡಿದು ಯುನೈಟೆಡ್ ಕಿಂಗ್‌ಡಮ್‌ವರೆಗಿನ ಅನೇಕ ದೇಶಗಳು ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳನ್ನು ಶೇ. 30 ರಷ್ಟು ಹೆಚ್ಚಿಸಿವೆ; ಆದರೆ ಭಾರತದಲ್ಲಿ ಮಾತ್ರ ಇಂಧನ ಬೆಲೆಗಳು ಕಳೆದ ಎರಡು ವರ್ಷಗಳ ಹಿಂದಿನ ಮಟ್ಟದಲ್ಲೇ ಮುಂದುವರಿದಿವೆ ಎಂದು ಪಿಟಿಐ ವರದಿ ಮಾಡಿದೆ. ಯುದ್ಧದ ಕಾರಣದಿಂದಾಗಿ ಭಾರತದ ಶೇ. 40 ರಷ್ಟು ಕಚ್ಚಾ ತೈಲ, ಶೇ. 90 ರಷ್ಟು ಅಡುಗೆ ಅನಿಲ (LPG) ಮತ್ತು ಶೇ. 65 ರಷ್ಟು ನೈಸರ್ಗಿಕ ಅನಿಲದ ಆಮದಿನ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿದ್ದರೂ ಸಹ, ದೇಶೀಯ ಮಾರುಕಟ್ಟೆಯಲ್ಲಿ ಬೆಲೆ ಏರಿಕೆ ಮಾಡದೆ ಸ್ಥಿರತೆಯನ್ನು ಕಾಯ್ದುಕೊಳ್ಳಲಾಗಿದೆ ಎಂಬುದು ಗಮನಾರ್ಹ.

ಗ್ರಾಹಕರು ಆತಂಕದಿಂದ ಮುಗಿಬಿದ್ದು ಇಂಧನ ಖರೀದಿಸುತ್ತಿದ್ದರೂ ತೈಲ ಕಂಪನಿಗಳು ಹಗಲಿರುಳು ಶ್ರಮಿಸಿ ಪೂರೈಕೆಯಲ್ಲಿ ವ್ಯತ್ಯಯವಾಗದಂತೆ ನೋಡಿಕೊಂಡಿವೆ. ಈ ನಡುವೆ, ಬೆಲೆ ಏರಿಕೆಯ ಹೊರೆಯನ್ನು ತಗ್ಗಿಸಲು ಸರ್ಕಾರವು ಪೆಟ್ರೋಲ್ ಮೇಲಿನ ವಿಶೇಷ ಅಬಕಾರಿ ಸುಂಕವನ್ನು 13 ರಿಂದ 3 ಕ್ಕೆ ಮತ್ತು ಡೀಸೆಲ್ ಮೇಲಿನ ಸುಂಕವನ್ನು 10 ರಿಂದ ಶೂನ್ಯಕ್ಕೆ ಇಳಿಸುವ ಮೂಲಕ ಮಧ್ಯಪ್ರವೇಶಿಸಿದೆ. ಈ ಅಬಕಾರಿ ಸುಂಕ ಕಡಿತದಿಂದಾಗಿ ಸರ್ಕಾರಕ್ಕೆ ಪ್ರತಿ ತಿಂಗಳು ಸುಮಾರು 14,000 ಕೋಟಿ ರೂ. ಆದಾಯದ ನಷ್ಟವಾಗುತ್ತಿದೆ ಎಂದು ಮೂಲಗಳು ತಿಳಿಸಿವೆ, (ಏಜೆನ್ಸೀಸ್​).