ಪಾಕ್​ನಲ್ಲಿ ಮುಗಿಯದ ಭಯೋತ್ಪಾದಕರ ಸಫಾಯಿ: ಅಪರಿಚಿನ ಗುಂಡಿಗೆ ಬಲಿಯಾದ ಹಿಜ್ಬುಲ್ ಕಮಾಂಡರ್​ ಅಹ್ಮದ್​ ಸಜಾದ್! Ahmed Sajad

ಇಸ್ಲಾಮಾಬಾದ್​: ಜಾಗತಿಕ ಭಯೋತ್ಪಾದನಾ ಸಂಘಟನೆ ಹಿಜ್ಬುಲ್​ ಮುಜಾಹಿದ್ದೀನ್​ ಜೊತೆ ಸಂಪರ್ಕ ಹೊಂದಿದೆ ಉಗ್ರ ಅಹ್ಮದ್​ ಸಜಾದ್​ (Ahmed Sajad) ನನ್ನು ಪಾಕಿಸ್ತಾನದಲ್ಲಿ ಅಪರಿಚಿತ ಬಂದೂಕುದಾರಿಗಳು ಗುಂಡಿಕ್ಕಿ ಕೊಂದಿರುವ ಬಗ್ಗೆ ವರದಿಯಾಗಿದೆ.

ಮೃತ ಭಯೋತ್ಪಾದಕ ಅಹ್ಮದ್​ ಸಜಾದ್, ಹಿಜ್ಬುಲ್​ ಮುಜಾಹಿದ್ದೀನ್​ ಸಂಘಟನೆಯಲ್ಲಿ ಟಾಪ್​ ಕಮಾಂಡರ್​ನಾಗಿ ಗುರುತಿಸಿಕೊಂಡಿದ್ದು, ಕಾಶ್ಮೀರದಲ್ಲಿ ಭಯೋತ್ಪಾದನೆಯನ್ನು ಹೆಚ್ಚಿಸುವಲ್ಲಿ ಇತನ ಪಾತ್ರ ಅಧಿಕವಿರುತ್ತಿತ್ತು ಎಂದು ತಿಳಿದು ಬಂದಿದೆ.

ಈ ಅಹ್ಮದ್​ ಸಜಾದ್​ ಮೂಲತಃ ಕಾಶ್ಮೀರ್ ಬಾರಾಮುಲ್ಲಾ ನಿವಾಸಿಯಾಗಿದ್ದು, ಚಿಕ್ಕ ವಯಸ್ಸಿನಲ್ಲಿ ಜಿಹಾದ್​ನ ಅಮಲೇರಿ ಬಂದೂಕನ್ನು ಹಿಡಿದು ಭಯೋತ್ಪಾದಕನಾದನು.

ಪಾಕಿಸ್ತಾನದಲ್ಲಿ ಅವಿತು ಕುಳಿತು ಭಾರತದ ಕೇಡನ್ನು ಬಯಸುತ್ತಿದ್ದ ಭಯೋತ್ಪಾದಕರು ಸದ್ಯ ತಮ್ಮ ಬಿಲದಲ್ಲಿ ಸಹ ಸುರಕ್ಷಿತವಾಗಿಲ್ಲ ಎಂದರೆ ಸುಳ್ಳಲ್ಲ. ನಿನ್ನೆ (ಏ.30) ಜೈಶ್​- ಎ- ಮೊಹಮ್ಮದ್ ಕಮಾಂಡರ್ ಸಲ್ಮಾನ್​ ಅಜರ್​ನನ್ನು ಅಪರಿಚಿತರು ಎಕೆ-47 ನಿಂದ ಕೊಂದರೆ, ಇಂದು (ಮೇ.1) ಹಿಜ್ಬುಲ್​ ಕಮಾಂಡರ್​​ ಅಹ್ಮದ್​ ಸಜಾದ್​ನನ್ನು ಸದೆ ಬಡಿದಿದ್ದಾರೆ.

ಕಳೆದೊಂದು ವರ್ಷದಲ್ಲಿ ಈ ಕಾರ್ಯಾಚರಣೆ ವೇಗದಿಂದ ಸಾಗುತ್ತಿದ್ದು, 2026 ರಲ್ಲಿ ಸುಮಾರು 30 ಭಯೋತ್ಪಾದಕರು ಸತ್ತಿದ್ದಾರೆ. ಸಾವನ್ನಪ್ಪಿರುವ ಬಹುತೇಕರು ಲಷ್ಕರ್​-ಎ-ತೊಯ್ಬಾ, ಜೈಶ್​-ಎ-ಮೊಹಮ್ಮದ್​ ಮತ್ತು ಹಿಜ್ಬುಲ್​ ಮುಜಾಹಿದ್ದಿನ್​ ಸಂಘಟನೆಗೆ ಸೇರಿದವರಾಗಿದ್ದಾರೆ. ಈ ದಾಳಿಯ ಹಿಂದೆ ಭಾರತದ ಕೈವಾಡವಿದೆ ಎಂದು ಪಾಕಿಸ್ತಾನದ ಮಾಧ್ಯಮಗಳು ಅನುಮಾನ ವ್ಯಕ್ತ ಪಡಿಸುತ್ತಿವೆ. ಆದರೆ ಭಾರತ ಈ ಕುರಿತು ಯಾವುದೇ ಅಧಿಕೃತ ಹೇಳಿಕೆಗಳನ್ನು ಇಲ್ಲಿವರೆಗೆ ನೀಡಿಲ್ಲ, (ಏಜನ್ಸೀಸ್).