ನೀಟ್​ ಪರೀಕ್ಷೆಗೂ ಮುನ್ನ ವಾಟ್ಸ್​ಆ್ಯಪ್​ ಬಿಟ್ಟು ಟೆಲಿಗ್ರಾಮ್‌ ಬ್ಯಾನ್​ ಏಕೆ? ಅಷ್ಟೊಂದು ಡೇಂಜರಾ? ಇಲ್ಲಿದೆ ಶಾಕಿಂಗ್ ಸಂಗತಿ...Telegram

Telegram : ಜೂನ್ 21 ರಂದು ನಡೆಯಲಿರುವ ನೀಟ್ (NEET) ಮರು-ಪರೀಕ್ಷೆಯ ಮುನ್ನಾದಿನದಂದು, ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಯ (NTA) ಶಿಫಾರಸಿನ ಮೇರೆಗೆ ಕೇಂದ್ರ ಸರ್ಕಾರವು ಟೆಲಿಗ್ರಾಮ್ (Telegram) ಆ್ಯಪ್ ಮೇಲೆ ತಾತ್ಕಾಲಿಕ ನಿಷೇಧ ಹೇರಲು ನಿರ್ಧರಿಸಿದೆ. ಈ ಟೆಲಿಗ್ರಾಮ್​ ವೇದಿಕೆ ನಕಲಿ ಪ್ರಶ್ನೆ ಪತ್ರಿಕೆಗಳ ಮಾರಾಟ ಮತ್ತು ಅಪಪ್ರಚಾರಗಳಿಗೆ ಪ್ರಮುಖ ಸಾಧನವಾಗಿ ಮಾರ್ಪಟ್ಟಿರುವುದೇ ಸರ್ಕಾರದ ಈ ಒಂದು ನಿರ್ಧಾರಕ್ಕೆ ಮುಖ್ಯ ಕಾರಣವಾಗಿದೆ.

ಆದರೆ, ಇಲ್ಲಿ ಒಂದು ಪ್ರಶ್ನೆ ಸಹಜವಾಗಿ ಮೂಡುತ್ತದೆ. ಅದೇನೆಂದರೆ, ಟೆಲಿಗ್ರಾಮ್‌ನಂತೆಯೇ ವಾಟ್ಸ್​ಆ್ಯಪ್​ (WhatsApp) ಕೂಡ ಒಂದು ಮೆಸೇಜಿಂಗ್ ಆ್ಯಪ್ ಆಗಿದ್ದು, ವಾಟ್ಸ್​ಆ್ಯಪ್​ ಬಿಟ್ಟು ಕೇವಲ ಟೆಲಿಗ್ರಾಮ್ ಅನ್ನು ಮಾತ್ರ ಏಕೆ ಟಾರ್ಗೆಟ್​ ಮಾಡಲಾಗಿದೆ ಎಂಬುದು. ವಾಸ್ತವವಾಗಿ, ವಾಟ್ಸ್​ಆ್ಯಪ್​ಗೆ ಹೋಲಿಸಿದರೆ ಟೆಲಿಗ್ರಾಮ್‌ನಲ್ಲಿ ಬಳಕೆದಾರರ ಗುರುತನ್ನು ಮರೆಮಾಚಿ ಸಾವಿರಾರು ಜನರಿರುವ ಬೃಹತ್ ಗ್ರೂಪ್‌ಗಳು ಮತ್ತು ಚಾನೆಲ್‌ಗಳನ್ನು ಸುಲಭವಾಗಿ ಸೃಷ್ಟಿಸಬಹುದಾಗಿದೆ.

ಈ ಟೆಲಿಗ್ರಾಮ್ ಅಪರಾಧಿಗಳ ಪಾಲಿಗೆ ಅತ್ಯಂತ ಸುರಕ್ಷಿತ ತಾಣವಾಗಿ ಮಾರ್ಪಡಲು ಅದರಲ್ಲಿರುವ ಅತಿಯಾದ ಗೌಪ್ಯತೆ ಮತ್ತು ಅನಾಮಧೇಯತೆಯೇ ಮುಖ್ಯ ಕಾರಣವಾಗಿದೆ. ವಾಟ್ಸ್​ಆ್ಯಪ್​ ಬಳಸುವ ಪ್ರತಿಯೊಬ್ಬರ ಫೋನ್ ನಂಬರ್ ಇತರರಿಗೆ ಸ್ಪಷ್ಟವಾಗಿ ಕಾಣಿಸಿದರೆ, ಟೆಲಿಗ್ರಾಮ್‌ನಲ್ಲಿ ಬಳಕೆದಾರರು ತಮ್ಮ ಫೋನ್ ನಂಬರ್ ಅನ್ನು ಸಂಪೂರ್ಣವಾಗಿ ಹೈಡ್ ಮಾಡಿ, ಕೇವಲ ಒಂದು ಯೂಸರ್‌ನೇಮ್ ಬಳಸಿ ಖಾತೆಯನ್ನು ನಿರ್ವಹಿಸಬಹುದಾದ ಮುಕ್ತ ಅವಕಾಶವಿದೆ. ಇದರ ಜೊತೆಗೆ, ಟೆಲಿಗ್ರಾಮ್ ಚಾನೆಲ್‌ಗಳಲ್ಲಿ ಅನ್‌ಲಿಮಿಟೆಡ್ ಚಂದಾದಾರರನ್ನು ಹೊಂದಲು ಅವಕಾಶವಿರುವುದರಿಂದ, ಅಪರಿಚಿತ ವ್ಯಕ್ತಿಯೊಬ್ಬ ಗ್ರೂಪ್‌ಗಳನ್ನು ಕ್ರಿಯೇಟ್ ಮಾಡಿ ಲಕ್ಷಾಂತರ ಜನರಿಗೆ ನಕಲಿ ಪ್ರಶ್ನೆ ಪತ್ರಿಕೆಗಳನ್ನು ಕಳುಹಿಸಿ, ಕೋಟ್ಯಂತರ ರೂಪಾಯಿ ಹಣ ಲೂಟಿ ಮಾಡಿದರೂ ಸಹ ಆತನನ್ನು ಪತ್ತೆ ಹಚ್ಚುವುದು ಸೈಬರ್ ಕ್ರೈಮ್ ಪೊಲೀಸರಿಗೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ.

ಕಳೆದ ವರ್ಷ ನಡೆದ ಅಂತಾರಾಷ್ಟ್ರೀಯ ಅಧ್ಯಯನವೊಂದರ ಪ್ರಕಾರ, ಟೆಲಿಗ್ರಾಮ್‌ನಲ್ಲಿರುವ ಕೇವಲ 339 ಸೈಬರ್ ಅಪರಾಧದ ಚಾನೆಲ್‌ಗಳನ್ನು ಬರೋಬ್ಬರಿ 2.38 ಕೋಟಿಗೂ ಹೆಚ್ಚು ಜನರು ಫಾಲೋ ಮಾಡುತ್ತಿದ್ದಾರೆ ಎಂಬ ಆಘಾತಕಾರಿ ಅಂಶ ಬೆಳಕಿಗೆ ಬಂದಿದೆ. ಈ ಅಂಕಿ-ಅಂಶವೇ ಈ ಸಮಸ್ಯೆಯ ತೀವ್ರತೆ ಹಾಗೂ ಪರಿಸ್ಥಿತಿ ಎಷ್ಟು ಗಂಭೀರವಾಗಿದೆ ಎಂಬುದನ್ನು ಸ್ಪಷ್ಟವಾಗಿ ಸಾಬೀತುಪಡಿಸುತ್ತದೆ.

ಟೆಲಿಗ್ರಾಮ್‌ನಲ್ಲಿರುವ ಫೈಲ್ ಶೇರಿಂಗ್ ಮಿತಿ ಮತ್ತು ಮೆಸೇಜ್ ಎಡಿಟಿಂಗ್ ವೈಶಿಷ್ಟ್ಯಗಳು ವಂಚಕರಿಗೆ ಮತ್ತೊಂದು ದೊಡ್ಡ ವರದಾನವಾಗಿವೆ. ಸಿಗ್ನಲ್​ನಂತಹ ಅತ್ಯಂತ ಸುರಕ್ಷಿತವಾದ ಆ್ಯಪ್‌ಗಳು ಲಭ್ಯವಿದ್ದರೂ ಸಹ, ವಂಚಕರು ಟೆಲಿಗ್ರಾಮ್ ಅನ್ನೇ ಆಯ್ಕೆ ಮಾಡಿಕೊಳ್ಳಲು ಪ್ರಮುಖ ಕಾರಣವೆಂದರೆ, ಇದರಲ್ಲಿ ಯಾವುದೇ ಕಂಪ್ರೆಷನ್ ಇಲ್ಲದೆ ಒಂದೇ ಬಾರಿಗೆ 2GB ವರೆಗಿನ ದೊಡ್ಡ ಫೈಲ್‌ಗಳನ್ನು ಸುಲಭವಾಗಿ ಶೇರ್ ಮಾಡಬಹುದು. ಚಲನಚಿತ್ರಗಳು ಇಲ್ಲಿ ಸೋರಿಕೆಯಾಗಲು ಸಹ ಇದೇ ಪ್ರಮುಖ ಕಾರಣವಾಗಿದೆ.

ಎಲ್ಲಕ್ಕಿಂತ ಅಪಾಯಕಾರಿ ವಿಷಯವೆಂದರೆ, ಟೆಲಿಗ್ರಾಮ್‌ನಲ್ಲಿ ಹಳೆಯ ಸಂದೇಶಗಳನ್ನು ಎಡಿಟ್ ಮಾಡಿದರೂ ಸಹ, ಮೂಲ ಸಂದೇಶವನ್ನು ಕಳುಹಿಸಲಾದ ಹಳೆಯ ಸಮಯ ಹಾಗೇ ಇರುತ್ತದೆ. ಪರೀಕ್ಷೆ ಮುಗಿದ ನಂತರ ಪ್ರಶ್ನೆ ಪತ್ರಿಕೆಯನ್ನು ಪಿಡಿಎಫ್ ರೂಪದಲ್ಲಿ ಅಪ್‌ಲೋಡ್ ಮಾಡಿ, ಹಳೆಯ ಸಮಯ ಬರುವಂತೆ ಎಡಿಟ್ ಮಾಡುವ ಮೂಲಕ, ಪರೀಕ್ಷೆಗೂ ಮುನ್ನವೇ ಪತ್ರಿಕೆ ಸೋರಿಕೆಯಾಗಿದೆ ಎಂಬ ನಕಲಿ ಸಾಕ್ಷ್ಯಗಳನ್ನು ಸೃಷ್ಟಿಸಲು ಕೆಲವು ಚಾಣಾಕ್ಷ ವಂಚಕರ ಗ್ಯಾಂಗ್‌ಗಳು ಈ ವೈಶಿಷ್ಟ್ಯವನ್ನು ದುರುಪಯೋಗಪಡಿಸಿಕೊಂಡಿವೆ. ಇದೇ ಕಾರಣಕ್ಕಾಗಿ ಸರ್ಕಾರವು ಜೂನ್ 22 ರವರೆಗೆ ಈ ಆ್ಯಪ್ ಅನ್ನು ಸಂಪೂರ್ಣವಾಗಿ ನಿಷೇಧಿಸಿದ್ದು, ದೇಶದಲ್ಲಿ ಜೂನ್ 30 ರವರೆಗೆ ಈ ಎಡಿಟಿಂಗ್ ವೈಶಿಷ್ಟ್ಯವನ್ನೂ ಸಹ ಸ್ಥಗಿತಗೊಳಿಸಿದೆ. ವಾಟ್ಸ್​ಆ್ಯಪ್‌ನಲ್ಲೂ ಎಡಿಟ್ ಆಯ್ಕೆ ಇದ್ದರೂ, ಅದಕ್ಕೆ ನಿರ್ದಿಷ್ಟ ಸಮಯದ ಮಿತಿ ಇರುತ್ತದೆ ಮತ್ತು ಎಡಿಟ್ ಮಾಡುವಾಗ ಹೊಸ ಫೈಲ್‌ಗಳನ್ನು ಸೇರಿಸಲು ಸಾಧ್ಯವಿರುವುದಿಲ್ಲ.

ಸರ್ಕಾರದ ನಿಯಮಾವಳಿಗಳನ್ನು ಪಾಲಿಸುವ ಮತ್ತು ಸಹಕರಿಸುವ ವಿಚಾರದಲ್ಲೂ ಈ ಎರಡೂ ಆ್ಯಪ್‌ಗಳ ನಡುವೆ ಭಾರಿ ವ್ಯತ್ಯಾಸವಿದೆ. ಭಾರತ ಸರ್ಕಾರದ ಆದೇಶಗಳ ನಂತರ ವಾಟ್ಸ್​ಆ್ಯಪ್ ಮತ್ತು ಎಕ್ಸ್​ನಂತಹ ಕಂಪನಿಗಳು ತಕ್ಷಣವೇ ಕ್ರಮ ಕೈಗೊಳ್ಳುತ್ತವೆ. ಅಷ್ಟೇ ಅಲ್ಲದೆ, ವಾಟ್ಸ್​ಆ್ಯಪ್​ನ ಪ್ರಮುಖ ಕಂಪನಿಯಾದ 'ಮೆಟಾ' ತನ್ನ ಪ್ಲಾಟ್‌ಫಾರ್ಮ್‌ನಲ್ಲಿರುವ ಸಾರ್ವಜನಿಕ ಗ್ರೂಪ್‌ಗಳ ನಡವಳಿಕೆ ಹಾಗೂ ಅವುಗಳ ಚಟುವಟಿಕೆಗಳ ಮಾದರಿಯನ್ನು ಸೂಕ್ಷ್ಮವಾಗಿ ಗಮನಿಸಲು ಅತ್ಯಂತ ಶಕ್ತಿಶಾಲಿ ಎಐ (AI) ತಂತ್ರಜ್ಞಾನದ ಪರಿಕರಗಳನ್ನು ಬಳಸುತ್ತದೆ. ಆದರೆ ಟೆಲಿಗ್ರಾಮ್ ಸ್ಥಾಪಕ ಪಾವೆಲ್ ಡುರೊವ್ ಅವರ ಸಿದ್ಧಾಂತವೇ ವಿಭಿನ್ನವಾಗಿದೆ. ಯಾವುದೇ ಸರ್ಕಾರಗಳಿಗೆ ಅಥವಾ ಪ್ರಮುಖ ಟೆಕ್ ದೈತ್ಯ ಕಂಪನಿಗಳಿಗೆ ತಲೆಬಾಗಬಾರದು ಎಂಬ ಉದ್ದೇಶದಿಂದಲೇ ಅವರು ಈ ಆ್ಯಪ್ ಅನ್ನು ಸೃಷ್ಟಿಸಿದ್ದಾರೆ.

ಇದಲ್ಲದೆ, ಭಾರತದಲ್ಲಿ ಟೆಲಿಗ್ರಾಮ್ ಯಾವುದೇ ಅಧಿಕೃತ ಕಚೇರಿಯನ್ನು ಹೊಂದಿಲ್ಲದಿರುವುದರಿಂದ, ಅದು ಕಾನೂನು ನೋಟಿಸ್‌ಗಳಿಗೆ ಮತ್ತು ತನಿಖೆಗಳಿಗೆ ತಕ್ಷಣವೇ ಸ್ಪಂದಿಸುವುದು ತೀರಾ ವಿರಳವಾಗಿದೆ. ಇತ್ತೀಚಿನ ದಿನಗಳಲ್ಲಿ ಟೆಲಿಗ್ರಾಮ್ ತನ್ನ ನಿಯಮಗಳನ್ನು ಕಠಿಣಗೊಳಿಸುತ್ತಿದ್ದು, ಪ್ರತಿದಿನ 80,000 ದಿಂದ 1.5 ಲಕ್ಷ ವಿವಾದಾತ್ಮಕ ಚಾನೆಲ್‌ಗಳನ್ನು ಬ್ಲಾಕ್ ಮಾಡುತ್ತಿದ್ದರೂ ಸಹ, ನೀಟ್​ನಂತಹ ದೇಶದ ಅತ್ಯಂತ ಪ್ರತಿಷ್ಠಿತ ಹಾಗೂ ರಾಷ್ಟ್ರವ್ಯಾಪಿ ಪರೀಕ್ಷೆಗಳ ಭದ್ರತೆ ಮತ್ತು ಗೌಪ್ಯತೆಯನ್ನು ಕಾಪಾಡುವ ನಿಟ್ಟಿನಲ್ಲಿ, ಸದ್ಯಕ್ಕೆ ವಾಟ್ಸ್​ಆ್ಯಪ್​ ಅನ್ನು ಬಿಟ್ಟು ಟೆಲಿಗ್ರಾಮ್ ವಿರುದ್ಧವೇ ಕಠಿಣ ಕ್ರಮ ಕೈಗೊಳ್ಳುವುದು ಸೂಕ್ತ ಮತ್ತು ಅನಿವಾರ್ಯ ಎಂಬ ತೀರ್ಮಾನಕ್ಕೆ ಕೇಂದ್ರ ಸರ್ಕಾರ ಬಂದಿದೆ, (ಏಜೆನ್ಸೀಸ್​).