ಪಂಜಾಬ್ನಲ್ಲಿ ಆಮ್ ಆದ್ಮಿಗೆ ಇಡಿ ಶಾಕ್: 100 ಕೋಟಿ ಜಿಎಸ್ಟಿ ಹಗರಣದಲ್ಲಿ ಸಚಿವ ಸಂಜೀವ್ ಅರೋರಾ ಬಂಧನ!
ಚಂಡೀಗಢ: ಜಾರಿ ನಿರ್ದೇಶನಾಲಯ (ED) ಶನಿವಾರ ಪಂಜಾಬ್ನ ಆಮ್ ಆದ್ಮಿ ಪಕ್ಷದ (AAP) ಹಿರಿಯ ನಾಯಕ ಹಾಗೂ ಸಚಿವ ಸಂಜೀವ್ ಅರೋರಾ(Sanjeev Arora Arrest) ಅವರನ್ನು ಬಂಧಿಸುವ ಮೂಲಕ ಪಂಜಾಬ್ ರಾಜಕಾರಣದಲ್ಲಿ ಭೂಕಂಪನ ಸೃಷ್ಟಿಸಿದೆ. ಸುಮಾರು 100 ಕೋಟಿ ರೂಪಾಯಿಗಳ ನಕಲಿ ಜಿಎಸ್ಟಿ ಬಿಲ್ಲಿಂಗ್ ಮತ್ತು ಅಕ್ರಮ ಹಣ ವರ್ಗಾವಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಎಂಟು ಗಂಟೆಗಳ ಸುದೀರ್ಘ ಶೋಧದ ನಂತರ ಈ ಕ್ರಮ ಕೈಗೊಳ್ಳಲಾಗಿದೆ.
ಈ ಬಂಧನವು ಪಂಜಾಬ್ ಮುಖ್ಯಮಂತ್ರಿ ಭಗವಂತ್ ಮಾನ್ ಮತ್ತು ಎಎಪಿ ರಾಷ್ಟ್ರೀಯ ಸಂಚಾಲಕ ಅರವಿಂದ್ ಕೇಜ್ರಿವಾಲ್ ಅವರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದ್ದು, ಕೇಂದ್ರ ಸರ್ಕಾರದ ವಿರುದ್ಧ ರಾಜಕೀಯ ಸೇಡು ಎಂಬ ಆರೋಪ ಕೇಳಿಬಂದಿದೆ.
100 ಕೋಟಿಯ ನಕಲಿ ಜಿಎಸ್ಟಿ ಜಾಲ: ಇಡಿ ಆರೋಪವೇನು..?
ಸಂಜೀವ್ ಅರೋರಾ ಅವರ ಒಡೆತನದ ಕಂಪನಿಗಳು ಮೊಬೈಲ್ ಫೋನ್ ಖರೀದಿ ಮತ್ತು ರಫ್ತಿನ ಹೆಸರಿನಲ್ಲಿ ಬೃಹತ್ ಅಕ್ರಮ ಎಸಗಿದ್ದಾರೆ ಎಂದು ಇಡಿ ಅಧಿಕಾರಿಗಳು ಆರೋಪಿಸಿದ್ದಾರೆ.
ನಕಲಿ ಬಿಲ್ಲಿಂಗ್: ದೆಹಲಿಯ ಅಸ್ತಿತ್ವದಲ್ಲಿಲ್ಲದ ಕಂಪನಿಗಳಿಂದ ಸುಮಾರು 100 ಕೋಟಿ ರೂ. ಮೌಲ್ಯದ ಮೊಬೈಲ್ ಫೋನ್ಗಳನ್ನು ಖರೀದಿಸಿದಂತೆ ನಕಲಿ ಜಿಎಸ್ಟಿ ಬಿಲ್ಗಳನ್ನು ಸೃಷ್ಟಿಸಲಾಗಿದೆ.
ತೆರಿಗೆ ವಂಚನೆ: ಈ ನಕಲಿ ಬಿಲ್ಗಳ ಮೂಲಕ ಸರ್ಕಾರದ ಬೊಕ್ಕಸಕ್ಕೆ ವಂಚಿಸಿ ಭಾರಿ ಮೊತ್ತದ ಇನ್ಪುಟ್ ಟ್ಯಾಕ್ಸ್ ಕ್ರೆಡಿಟ್ (ITC) ಮತ್ತು ಜಿಎಸ್ಟಿ ಮರುಪಾವತಿಯನ್ನು ಪಡೆಯಲಾಗಿದೆ.
ಹಣದ ರವಾನೆ: ದುಬೈನಿಂದ ಭಾರತಕ್ಕೆ ಅಕ್ರಮ ಹಣವನ್ನು ರಫ್ತು ವ್ಯವಹಾರದ ಸೋಗಿನಲ್ಲಿ ತರಲು ಈ ವ್ಯವಹಾರಗಳನ್ನು ಬಳಸಿಕೊಳ್ಳಲಾಗಿದೆ ಎಂಬ ಗಂಭೀರ ಸಂಶಯವನ್ನು ಇಡಿ ವ್ಯಕ್ತಪಡಿಸಿದೆ.
ಶನಿವಾರ ದೆಹಲಿ, ಗುರುಗ್ರಾಮ್ ಮತ್ತು ಚಂಡೀಗಢ ಸೇರಿದಂತೆ ಐದು ಸ್ಥಳಗಳಲ್ಲಿ ಇಡಿ ದಾಳಿ ನಡೆಸಿತ್ತು. ತನಿಖೆಗೆ ಅರೋರಾ ಅವರು ಸಹಕರಿಸುತ್ತಿಲ್ಲ ಎಂಬ ಕಾರಣ ನೀಡಿ ಅಧಿಕಾರಿಗಳು ಅವರನ್ನು ವಶಕ್ಕೆ ಪಡೆದಿದ್ದಾರೆ.
'ಪಕ್ಷಗಳನ್ನು ಒಡೆಯಲು ಏಜೆನ್ಸಿಗಳ ಬಳಕೆ': ಕೇಜ್ರಿವಾಲ್ ವಾಗ್ದಾಳಿ
ಸಚಿವರ ಬಂಧನದ ಬೆನ್ನಲ್ಲೇ ಕಿಡಿಕಾರಿದ ಅರವಿಂದ್ ಕೇಜ್ರಿವಾಲ್, ಮೋದಿ ಸರ್ಕಾರ ಅಧಿಕಾರಕ್ಕೆ ಬಂದಾಗಿನಿಂದ ಸಿಬಿಐ ಮತ್ತು ಇಡಿ ಸಂಸ್ಥೆಗಳು ಭ್ರಷ್ಟಾಚಾರ ತಡೆಯುವ ಬದಲು ವಿರೋಧ ಪಕ್ಷಗಳನ್ನು ಒಡೆಯುವ ಕೆಲಸ ಮಾಡುತ್ತಿವೆ. ನಾಯಕರನ್ನು ಬೆದರಿಸಿ ಬಿಜೆಪಿಗೆ ಸೇರಿಸಿಕೊಳ್ಳುವುದೇ ಈ ದಾಳಿಗಳ ಹಿಂದಿನ ನೈಜ ಉದ್ದೇಶ ಎಂದು ಆಕ್ರೋಶ ಹೊರಹಾಕಿದ್ದಾರೆ.
ಪಂಜಾಬ್ ಈಗ ಬಿಜೆಪಿಯ ಟಾರ್ಗೆಟ್: ಸಿಎಂ ಭಗವಂತ್ ಮಾನ್
ಪಂಜಾಬ್ ಮುಖ್ಯಮಂತ್ರಿ ಭಗವಂತ್ ಮಾನ್ ಅವರು ಬಿಜೆಪಿಯ ನಡೆಯನ್ನು ತೀವ್ರವಾಗಿ ಖಂಡಿಸಿದ್ದಾರೆ. ಮಹಾರಾಷ್ಟ್ರ, ಬಿಹಾರ, ಕರ್ನಾಟಕ ಮತ್ತು ಪಶ್ಚಿಮ ಬಂಗಾಳದ ನಂತರ ಈಗ ಪಂಜಾಬ್ ಬಿಜೆಪಿಯ ಗುರಿಯಾಗಿದೆ. ಚುನಾವಣೆ ಹತ್ತಿರ ಬರುತ್ತಿದ್ದಂತೆ ತನಿಖಾ ಸಂಸ್ಥೆಗಳನ್ನು ರಾಜಕೀಯ ಆಯುಧಗಳನ್ನಾಗಿ ಬಳಸಲಾಗುತ್ತಿದೆ ಎಂದು ಅವರು ಆರೋಪಿಸಿದರು. ರಾಜ್ಯಸಭಾ ಸಂಸದ ಅಶೋಕ್ ಮಿತ್ತಲ್ ಅವರ ಉದಾಹರಣೆ ನೀಡಿದ ಮಾನ್, ಬಿಜೆಪಿ ಸೇರಿದ ನಾಯಕರ ಮೇಲಿನ ತನಿಖೆಗಳು ಮಾಯವಾಗುವುದು ಹೇಗೆ ಎಂದು ಪ್ರಶ್ನಿಸಿದ್ದಾರೆ.
ಹ್ಯಾಂಪ್ಟನ್ ಸ್ಕೈ ರಿಯಾಲಿಟಿ ಮೇಲೆ ಕಣ್ಣು
ಸಂಜೀವ್ ಅರೋರಾ ಅವರಿಗೆ ಸಂಬಂಧಿಸಿದ 'ಹ್ಯಾಂಪ್ಟನ್ ಸ್ಕೈ ರಿಯಾಲಿಟಿ ಲಿಮಿಟೆಡ್' ಕಚೇರಿಗಳ ಮೇಲೂ ದಾಳಿ ನಡೆದಿದ್ದು, ಹಲವು ಮಹತ್ವದ ದಾಖಲೆಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಮೂಲಗಳು ತಿಳಿಸಿವೆ. ಕಳೆದ ಏಪ್ರಿಲ್ 17 ರಂದು ಕೂಡ ಅರೋರಾ ಅವರ ನಿವಾಸದ ಮೇಲೆ FEMA ಕಾಯ್ದೆಯಡಿ ದಾಳಿ ನಡೆಸಲಾಗಿತ್ತು.
ಪಂಜಾಬ್ನಲ್ಲಿ ಆಡಳಿತಾರೂಢ ಎಎಪಿ ಸಚಿವರ ಬಂಧನವು ರಾಜ್ಯ ರಾಜಕೀಯದಲ್ಲಿ ಸಂಚಲನ ಮೂಡಿಸಿದ್ದು, ಮುಂಬರುವ ದಿನಗಳಲ್ಲಿ ಇದು ಕೇಂದ್ರ ಮತ್ತು ರಾಜ್ಯದ ನಡುವಿನ ಕಾನೂನು ಹೋರಾಟಕ್ಕೆ ನಾಂದಿ ಹಾಡಲಿದೆ. ಇಂದು ಸಂಜೆ ಅರೋರಾ ಅವರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗುತ್ತಿದ್ದು, ಇಡಿ ಹೆಚ್ಚಿನ ಕಸ್ಟಡಿಗೆ ಬೇಡಿಕೆ ಇಡುವ ಸಾಧ್ಯತೆಯಿದೆ,(ಏಜೆನ್ಸೀಸ್).