ಹೈದರಾಬಾದ್: ನಗರ & ಪಟ್ಟಣದಲ್ಲಿ ಕುಡಿದು ವಾಹನ ಚಲಾಯಿಸುವಾಗ ತಪಾಸಣೆಯಿಂದ ತಪ್ಪಿಸಿಕೊಳ್ಳಲು ಮತ್ತು ಡ್ರಿಂಕ್ ಅಂಡ್ ಡ್ರೈವ್ ಕೇಸ್ನಿಂದ ಪಾರಾಗಲು ಪೊಲೀಸ್ ಅಂಕಲ್ಸ್ ಎಂಬ ವಾಟ್ಸಾಪ್ ಗ್ರೂಪ್(WhatsApp group) ರಚಿಸಿದ್ದ ಕುಡಕರು, ಸಿಕ್ಕಿ ಬಿದ್ದ ವ್ಯಕ್ತಿಯ ಪೋನ್ ಪರಿಶೀಲನೆ ಬಳಿಕ ಗ್ರೂಪ್ ಬಹಿರಂಗಗೊಂಡಿದೆ.
ತೆಲಂಗಾಣದ ಪೆದ್ದಪಲ್ಲಿ ಜಿಲ್ಲೆಯ ಗೋದಾವರಿಖನಿಯಲ್ಲಿ ಈ ಘಟನೆ ನಡೆದಿದ್ದು, ಪಟ್ಟಣದಲ್ಲಿ ಡ್ರಿಂಕ್ ಅಂಡ್ ಡ್ರೈವ್ ಪರೀಕ್ಷೆಗಳನ್ನು ಎಲ್ಲಿ ನಡೆಸಲಾಗುತ್ತದೆ? ವಾಹನಗಳನ್ನು ಎಲ್ಲಿ ನಿಲ್ಲಿಸಿ ಪರಿಶೀಲಿಸುತ್ತಾರೆ ಎಂಬುದರ ಕುರಿತು ಮಾಹಿತಿಯನ್ನು ಗುಂಪಿನ ಸದಸ್ಯರು ಗ್ರೂಪ್ನಲ್ಲಿ ಹಂಚಿಕೊಳ್ತಿದ್ದರು ಮತ್ತು ತಪಾಸಣೆಯಿಂದ ತಪ್ಪಿಸಿಕೊಳ್ತಿದ್ದರು ಎನ್ನಲಾಗಿದೆ.
ಇತ್ತೀಚೆಗೆ ಕುಡಿದ ವ್ಯಕ್ತಿಯ ತಪಾಸಣೆ ವೇಳೆ ಪೊಲೀಸರು ಈ ವಾಟ್ಸಾಪ್ ಗ್ರೂಪ್ ಅನ್ನು ಪತ್ತೆ ಹಚ್ಚಿದ್ದಾರೆ. ಗ್ರೂಪ್ನಲ್ಲಿ 1024 ಮಂದಿಯಿದ್ದು, ಗ್ರೂಪ್ನ ಸಂಪೂರ್ಣ ಮಾಹಿತಿಯನ್ನು ತಿಳಿಯಲು ಎಸ್ಐ ಸ್ವತಃ ಆ ವಾಟ್ಸಾಪ್ ಗ್ರೂಪ್ಗೆ ಸೇರಿದ್ದಾರೆ. ಎಸ್ಐ ಗ್ರೂಪ್ಗೆ ಸೇರಿದ್ದಾರೆ ಎಂದು ತಿಳಿದ ಬಳಿಕ ಆ ಗುಂಪಿನ ಸದಸ್ಯರು ಒಬ್ಬೊಬ್ಬರಾಗಿ ಗ್ರೂಪ್ನಿಂದ ಹೊರಹೋಗಲು ಆರಂಭಿಸಿದ್ದಾರೆ.
ಈ ಕುರಿತು ವಿಡಿಯೋ ಮಾಡಿ ಗ್ರೂಪ್ನಲ್ಲಿ ಬಿಟ್ಟಿರುವ ಎಸ್ಐ, ಗ್ರೂಪ್ನಲ್ಲಿನ ನಿಮ್ಮೆಲ್ಲರ ಫೋನ್ ಸಂಖ್ಯೆಗಳನ್ನು ನಾನು ಸೇವ್ ಮಾಡಿದ್ದೇನೆ. ಶೀಘ್ರದಲ್ಲೇ ನಿಮ್ಮೆಲ್ಲರಿಗೂ ಕೌನ್ಸೆಲಿಂಗ್ ವ್ಯವಸ್ಥೆ ಮಾಡುತ್ತೇನೆ ಎಂದು ಹೇಳಿದ್ದಾರೆ. ಈ ವಿಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ (ಏಜೆನ್ಸೀಸ್).