ಡಿಜಿಟಲ್ ಎಡವಟ್ಟು; ಪ್ರಧಾನಿ ಮೋದಿ ಸಂದೇಶವನ್ನೇ ತಪ್ಪಾಗಿ ಅರ್ಥೈಸಿದ Grok AI: ರಾಜತಾಂತ್ರಿಕ ವಲಯದಲ್ಲಿ ಸಂಚಲನ
ನವದೆಹಲಿ: ತಂತ್ರಜ್ಞಾನ ಎಷ್ಟೇ ಮುಂದುವರಿದರೂ ಕೆಲವು ಬಾರಿ ಅದು ಉಂಟುಮಾಡುವ ಅನಾಹುತಗಳು ರಾಜತಾಂತ್ರಿಕ ಸಂಬಂಧಗಳ ಮೇಲೆ ಪರಿಣಾಮ ಬೀರಬಲ್ಲವು ಎಂಬುದಕ್ಕೆ ಇಂದಿನ ಘಟನೆ ಸಾಕ್ಷಿಯಾಗಿದೆ. ಎಲೋನ್ ಮಸ್ಕ್ ಅವರ X (ಟ್ವಿಟರ್) ವೇದಿಕೆಯ ಎಐ ತಂತ್ರಜ್ಞಾನವಾದ Grok (ಗೋಕ್), ಪ್ರಧಾನಿ ನರೇಂದ್ರ ಮೋದಿಯವರು ಮಾಲ್ಡೀವ್ಸ್(Maldives Controversy) ಅಧ್ಯಕ್ಷರಿಗೆ ಕಳುಹಿಸಿದ ಸೌಹಾರ್ದಯುತ ಸಂದೇಶವನ್ನು ತಪ್ಪಾಗಿ ಅನುವಾದಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಆಕ್ರೋಶಕ್ಕೆ ಗುರಿಯಾಗಿದೆ.
ಏನಿದು ವಿವಾದ..?
ಮಾಲ್ಡೀವ್ಸ್ನೊಂದಿಗಿನ ದ್ವಿಪಕ್ಷೀಯ ಸಂಬಂಧಗಳನ್ನು ಬಲಪಡಿಸುವ ನಿಟ್ಟಿನಲ್ಲಿ ಪ್ರಧಾನಿ ಮೋದಿಯವರು ಹಂಚಿಕೊಂಡಿದ್ದ ಅಧಿಕೃತ ಸಂದೇಶವನ್ನು Grok AI ತನ್ನ ವೇದಿಕೆಯಲ್ಲಿ ಅನುವಾದಿಸುವಾಗ ಗಂಭೀರ ತಪ್ಪು ಮಾಡಿದೆ. ಈ ಅನುವಾದವು ಸಂದೇಶದ ಮೂಲ ಅರ್ಥವನ್ನೇ ಬದಲಿಸಿದ್ದು, ಇದು ಮಾಲ್ಡೀವ್ಸ್ ವಿರೋಧಿ ಅಥವಾ ವಿವಾದಾತ್ಮಕ ಧಾಟಿಯಲ್ಲಿ ಕಂಡುಬಂದಿದೆ ಎಂದು ಬಳಕೆದಾರರು ಕಿಡಿಕಾರಿದ್ದಾರೆ.
ಕೇಂದ್ರ ಸರ್ಕಾರದ ಗಂಭೀರ ಎಚ್ಚರಿಕೆ
ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿರುವ ಭಾರತ ಸರ್ಕಾರವು 'X' ಪ್ಲಾಟ್ಫಾರ್ಮ್ಗೆ ಕಠಿಣ ಎಚ್ಚರಿಕೆ ನೀಡಿದೆ. ಎಐ ವ್ಯವಸ್ಥೆಗಳು ಜವಾಬ್ದಾರಿಯುತವಾಗಿ ಕಾರ್ಯನಿರ್ವಹಿಸಬೇಕು. ತಪ್ಪು ಮಾಹಿತಿಯನ್ನು ಹರಡುವುದು ಅಥವಾ ಗಂಭೀರ ಸಂದೇಶಗಳನ್ನು ಹಾದಿ ತಪ್ಪಿಸುವುದು ಸ್ವೀಕಾರಾರ್ಹವಲ್ಲ ಎಂದು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಹೇಳಿದೆ. ಈ ಕುರಿತು ಕೈಗೊಂಡ ಕ್ರಮಗಳ ವರದಿ(Action Taken Report) ಸಲ್ಲಿಸುವಂತೆ ಕಂಪನಿಗೆ ಸೂಚಿಸಲಾಗಿದೆ.
Grok AI ಮೇಲೆ ಹೆಚ್ಚುತ್ತಿರುವ ಒತ್ತಡ
ಕೇವಲ ಅನುವಾದವಲ್ಲದೆ, ಇತ್ತೀಚೆಗೆ ಈ ಎಐ ಸಾಧನವು ಮಹಿಳೆಯರ ಕುರಿತಾದ ಅಸಭ್ಯ ಚಿತ್ರಗಳನ್ನು ಸೃಷ್ಟಿಸುತ್ತಿದೆ ಎಂಬ ಆರೋಪವೂ ಕೇಳಿಬಂದಿತ್ತು. ಈಗ ಪ್ರಧಾನಿಯವರ ಸಂದೇಶವನ್ನೇ ತಪ್ಪಾಗಿ ಅನುವಾದಿಸಿರುವುದು ಅದರ ವಿಶ್ವಾಸಾರ್ಹತೆಯ ಮೇಲೆ ದೊಡ್ಡ ಪ್ರಶ್ನಾರ್ಥಕ ಚಿಹ್ನೆ ಮೂಡಿಸಿದೆ. X ಕಂಪನಿಯು ಈ ತಾಂತ್ರಿಕ ದೋಷವನ್ನು ಸರಿಪಡಿಸಲು ಮುಂದಾಗಿದ್ದು, ನಮ್ಮ ಎಐ ಮಾದರಿಯು ಇನ್ನೂ ಕಲಿಯುವ ಹಂತದಲ್ಲಿದೆ ಎಂಬ ಹಳೆಯ ಸಮರ್ಥನೆಯನ್ನೇ ನೀಡುತ್ತಿದೆ.
ಸಾರ್ವಜನಿಕರ ಪ್ರತಿಕ್ರಿಯೆ
ಟ್ವಿಟರ್ನಲ್ಲಿ ಈ ವಿಷಯವು ಟ್ರೆಂಡಿಂಗ್ನಲ್ಲಿದ್ದು, ರಾಜತಾಂತ್ರಿಕ ವಿಷಯಗಳಲ್ಲಿ ಎಐ ಬಳಸುವಾಗ ಎಚ್ಚರಿಕೆ ಬೇಕು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಈ ಎಡವಟ್ಟು ಭಾರತ ಮತ್ತು ಮಾಲ್ಡೀವ್ಸ್ ನಡುವೆ ಇತ್ತೀಚೆಗಷ್ಟೇ ಹಳಿಗೆ ಬರುತ್ತಿರುವ ಸಂಬಂಧಕ್ಕೆ ಅಡ್ಡಿಯಾಗಬಾರದು ಎಂಬುದು ಜನರ ಆಶಯವಾಗಿದೆ,(ಏಜೆನ್ಸೀಸ್).