ಖತರ್ನಾಕ್ ಕಿಲಾಡಿ ಸೊಸೆ: ಅತ್ತೆಗೆ ಫಿನೈಲ್ ಬೆರೆಸಿದ ಊಟ ನೀಡಿ, ನಗದು-ಚಿನ್ನದೊಂದಿಗೆ ಪರಾರಿಯಾದ ನವವಧು! | Fraud Bride

ವಿಕ್ರಮಜೀತ್ ಎಂಬುವವರು ರೇಖಾ ಎಂಬಾಕೆಯನ್ನು ಕಳೆದ ಮೇ ತಿಂಗಳಲ್ಲಿ ವಿವಾಹವಾಗಿದ್ದರು. ರೇಖಾಗೆ ಈ ಮೊದಲೇ ಮದುವೆಯಾಗಿ ಇಬ್ಬರು ಮಕ್ಕಳಿದ್ದರು. ತನ್ನ ಮೊದಲ ಪತಿಯಿಂದ ವಿಚ್ಛೇದನ ಪ್ರಕ್ರಿಯೆ ನಡೆಯುತ್ತಿದೆ ಎಂದು ನಂಬಿಸಿದ್ದ ಈಕೆ, ಗುರುದ್ವಾರದಲ್ಲಿ ವಿಕ್ರಮಜೀತ್ ಅವರನ್ನು ವರಿಸಿದ್ದಳು. ಆದರೆ ಮದುವೆಯಾದ ಕೆಲವೇ ದಿನಗಳಲ್ಲಿ ಈಕೆಯ ಅಸಲಿ ರೂಪ ಹೊರಬಂದಿದೆ.

ಸಂಚು ರೂಪಿಸಿದ್ದ ರೇಖಾ, ಮನೆಯಲ್ಲಿದ್ದ ತನ್ನ ಅತ್ತೆಗೆ ಫಿನೈಲ್ ಬೆರೆಸಿದ ಖಿಚಡಿಯನ್ನು ತಿನ್ನಿಸಿದ್ದಾಳೆ. ಅತ್ತೆಯ ಆರೋಗ್ಯ ತೀವ್ರವಾಗಿ ಹದಗೆಟ್ಟು, ಇಡೀ ಕುಟುಂಬ ಆಸ್ಪತ್ರೆಗೆ ಧಾವಿಸಿದ ಸಮಯವನ್ನು ಬಳಸಿಕೊಂಡ ಕಿಲಾಡಿ ಸೊಸೆ, ಮನೆಯಲ್ಲಿದ್ದ ಚಿನ್ನ, ಬೆಳ್ಳಿ ಆಭರಣಗಳು ಹಾಗೂ 30,000 ರೂ. ನಗದನ್ನು ದೋಚಿ ಪರಾರಿಯಾಗಿದ್ದಾಳೆ.

ಇನ್ನೂ ಆಘಾತಕಾರಿ ವಿಷಯವೆಂದರೆ, ಈ ಬಗ್ಗೆ ವಿಕ್ರಮಜೀತ್ ಕುಟುಂಬದವರು ರೇಖಾಳ ಸಂಬಂಧಿಕರನ್ನು ವಿಚಾರಿಸಿದಾಗ, "ಇದೇ ನಮ್ಮ ಬ್ಯುಸಿನೆಸ್, ನೀವು ಏನೂ ಮಾಡಲು ಸಾಧ್ಯವಿಲ್ಲ" ಎಂದು ಉದ್ಧಟತನದ ಉತ್ತರ ನೀಡಿದ್ದಾರೆ. ಅಷ್ಟೇ ಅಲ್ಲದೆ, ವಾಪಸ್ 3 ಲಕ್ಷ ರೂ. ನೀಡದಿದ್ದರೆ ಸುಳ್ಳು ಕೇಸ್ ಹಾಕುವುದಾಗಿ ಬೆದರಿಕೆ ಹಾಕಿದ್ದಾರೆ ಎಂದು ಸಂತ್ರಸ್ತ ವಿಕ್ರಮಜೀತ್ ಆರೋಪಿಸಿದ್ದಾರೆ.

ಸದ್ಯ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ತಲೆಮರೆಸಿಕೊಂಡಿರುವ ಕಿಲಾಡಿ ವಧುವಿಗಾಗಿ ಹುಡುಕಾಟ ನಡೆಸುತ್ತಿದ್ದಾರೆ,(ಏಜೆನ್ಸೀಸ್).