ಅಹಮದಾಬಾದ್: ಗುಜರಾತ್ನ ಸರ್ದಾರ್ ವಲ್ಲಭಭಾಯಿ ಪಟೇಲ್ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕಸ್ಟಮ್ಸ್ ಅಧಿಕಾರಿಗಳು ಭಾರಿ ಪ್ರಮಾಣದ ಹೈಟೆಕ್ ಚಿನ್ನದ ಕಳ್ಳಸಾಗಣೆಯನ್ನು ಪತ್ತೆಹಚ್ಚುವಲ್ಲಿ ಯಶಸ್ವಿಯಾಗಿದ್ದಾರೆ. ಶುಕ್ರವಾರ ದುಬೈನಿಂದ ಆಗಮಿಸಿದ ಇಂಡಿಗೋ ವಿಮಾನದಲ್ಲಿ ಬಚ್ಚಿಡಲಾಗಿದ್ದ ಬರೋಬ್ಬರಿ 4.26 ಕೋಟಿ ರೂಪಾಯಿಗೂ ಅಧಿಕ ಮೌಲ್ಯದ ಅಕ್ರಮ ಚಿನ್ನವನ್ನು ಕಸ್ಟಮ್ಸ್ ಇಂಟೆಲಿಜೆನ್ಸ್ ವಿಭಾಗ ಮತ್ತು ವಿಮಾನ ಎಂಜಿನಿಯರ್ಗಳ ಜಂಟಿ ಕಾರ್ಯಾಚರಣೆಯಿಂದಾಗಿ ವಶಪಡಿಸಿಕೊಳ್ಳಲಾಗಿದೆ.
ಮಾಹಿತಿಯ ಪ್ರಕಾರ, ದುಬೈನಿಂದ ಅಹಮದಾಬಾದ್ಗೆ ಬಂದಿದ್ದ ಇಂಡಿಗೋ ವಿಮಾನ 6E-1478 ಅನ್ನು ಕಸ್ಟಮ್ಸ್ ಅಧಿಕಾರಿಗಳು ಸೂಕ್ಷ್ಮವಾಗಿ ಪರಿಶೀಲಿಸಿದರು. ಶೋಧ ಕಾರ್ಯಾಚರಣೆ ವೇಳೆ ಅಧಿಕಾರಿಗಳಿಗೆ ವಿಮಾನದ ಮುಂಭಾಗದ ಶೌಚಾಲಯದ ಭಾಗದಲ್ಲಿ ಅನುಮಾನಾಸ್ಪದ ಚಲನವಲನ ಕಂಡುಬಂದ ಹಿನ್ನೆಲೆಯಲ್ಲಿ ಹೆಚ್ಚಿನ ತಪಾಸಣೆ ನಡೆಸಿದ್ದರಿಂದ ಅನುಮಾನಾಸ್ಪದ ವಸ್ತುಗಳು ಕಂಡುಬಂದವು.
ಅಧಿಕಾರಿಗಳು ಪರಿಶೀಲನೆ ನಡೆಸಿದ ನಂತರ, 24 ಕ್ಯಾರೆಟ್ 24 ವಿದೇಶಿ ಮೂಲದ ಚಿನ್ನದ ಬಿಸ್ಕತ್ತುಗಳನ್ನು ವಶಪಡಿಸಿಕೊಂಡಿದ್ದು, ಸುಮಾರು 2,799.3 ಗ್ರಾಂ ತೂಕವಿರುವುದಾಗಿ ಮಾಹಿತಿ ಹಂಚಿಕೊಂಡಿದ್ದಾರೆ.
ಕಸ್ಟಮ್ಸ್ ಅಧಿಕಾರಿಗಳ ಪ್ರಕಾರ, ಚಿನ್ನವನ್ನು ಮರೆಮಾಚುವ ವಿಧಾನವು 1962 ರ ಕಸ್ಟಮ್ಸ್ ಕಾಯ್ದೆಯನ್ನು ಉಲ್ಲಂಘಿಸಿ ಭಾರತಕ್ಕೆ ಕಳ್ಳಸಾಗಣೆ ಮಾಡುವ ಉದ್ದೇಶದಿಂದ ಅಪರಿಚಿತ ವ್ಯಕ್ತಿಯೊಬ್ಬರು ಚಿನ್ನವನ್ನು ಮರೆಮಾಡಿದ್ದಾರೆ ಎಂದು ಸೂಚಿಸುತ್ತದೆ.
ಯಾವುದೇ ಪ್ರಯಾಣಿಕರು ಅಥವಾ ಸಿಬ್ಬಂದಿಗಳು ಸಾಗಣೆಯ ಮಾಲೀಕತ್ವವನ್ನು ಪಡೆಯಲು ಮುಂದೆ ಬಾರದ ಕಾರಣ, ಕಸ್ಟಮ್ಸ್ ಕಾಯ್ದೆಯ ಸಂಬಂಧಿತ ನಿಬಂಧನೆಗಳ ಅಡಿಯಲ್ಲಿ ಚಿನ್ನವನ್ನು ಹಕ್ಕು ಪಡೆಯದ ಚಿನ್ನವೆಂದು ವಶಪಡಿಸಿಕೊಂಡಿದ್ದು, ಹೆಚ್ಚಿನ ತನಿಖೆ ನಡೆಸುತ್ತಿರುವುದಾಗಿ ತಿಳಿಸಿದ್ದಾರೆ.
ಹಿಂದೆ ಏನಾಗಿತ್ತು?
ದುಬೈನಿಂದಲೇ ಆಗಮಿಸಿದ್ದ ಇಬ್ಬರು ಕಿಲಾಡಿ ಪ್ರಯಾಣಿಕರನ್ನು ತಡೆದು 1.13 ಲಕ್ಷಕ್ಕೂ ಅಧಿಕ ವಿದೇಶಿ ಮೂಲದ ಸಿಗರೇಟ್ಗಳನ್ನು ಜಪ್ತಿ ಮಾಡಿದ ಕೆಲವೇ ವಾರಗಳ ಅಂತರದಲ್ಲಿ ಈ ಹೈಟೆಕ್ ಚಿನ್ನದ ಬೇಟೆ ನಡೆದಿದೆ ಎಂದು ಕಸ್ಟಮ್ಸ್ ಮೂಲಗಳು ಖಚಿತಪಡಿಸಿದ್ದವು.
ಎಮಿರೇಟ್ಸ್ ವಿಮಾನದಲ್ಲಿ ಬಂದ ಪ್ರಯಾಣಿಕರನ್ನು ಆಗಮನದ ಹಾಲ್ನಲ್ಲಿ ತಡೆಹಿಡಿಯಲಾಯಿತು. ಅವರ ಚೆಕ್-ಇನ್ ಬ್ಯಾಗೇಜ್ಗಳ ಅನುಮಾನಾಸ್ಪದ ಎಕ್ಸ್-ರೇ ಚಿತ್ರಗಳನ್ನು ತಪಾಸಣೆಗಾಗಿ ಫ್ಲ್ಯಾಗ್ ಮಾಡಿದ ನಂತರ ದೊಡ್ಡ ಪ್ರಮಾಣದ ಸಿಗರೇಟ್ಗಳು ಪತ್ತೆಯಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ವಶಪಡಿಸಿಕೊಂಡ ಸರಕುಗಳಲ್ಲಿ 'ಮಾಂಡ್' ಬ್ರಾಂಡ್ನ 56,000 ಸ್ಟಿಕ್ಗಳನ್ನು ಹೊಂದಿರುವ 280 ಬಾಕ್ಸ್ಗಳು ಮತ್ತು 'ಗುಡಾಂಗ್ ಗರಂ' ಬ್ರಾಂಡ್ನ 57,200 ಸ್ಟಿಕ್ಗಳನ್ನು ಹೊಂದಿರುವ 286 ಬಾಕ್ಸ್ಗಳು ಸೇರಿವೆ. ಈ ಸರಕನ್ನು 1962 ರ ಕಸ್ಟಮ್ಸ್ ಕಾಯ್ದೆಯ ನಿಬಂಧನೆಗಳ ಅಡಿಯಲ್ಲಿ ವಶಪಡಿಸಿಕೊಳ್ಳಲಾಗಿದೆ (ಏಜೆನ್ಸೀಸ್).