ನವದೆಹಲಿ: ಸಾಮಾಜಿಕ ಜಾಲತಾಣಗಳಲ್ಲಿ ಕಾಣಸಿಗುವ ಪ್ರತಿಯೊಂದು ಉಚಿತ ಅಥವಾ ಸಹಾಯ ಹಸ್ತ ಬೇಡುವ ( Charity Scam ) ಜಾಹೀರಾತುಗಳನ್ನು ಕಣ್ಣು ಮುಚ್ಚಿ ನಂಬಿದರೆ ಎಂತಹ ದೊಡ್ಡ ಆಪತ್ತು ಎದುರಾಗಬಹುದು ಎಂಬುದಕ್ಕೆ ಕಣ್ಣೂರು ಮೂಲದ ಯುವಕನೊಬ್ಬ ಅನುಭವಿಸಿದ ಘಟನೆಯೇ ಸಾಕ್ಷಿ.
ಫೇಸ್‌ಬುಕ್‌ನಲ್ಲಿ ಕಂಡ ಕ್ಯುಆರ್ ಕೋಡ್ (QR Code) ಒಂದನ್ನು ಸ್ಕ್ಯಾನ್ ಮಾಡಿ ಚಾರಿಟಿ ಸಂಸ್ಥೆಗೆ (Charity) ದೇಣಿಗೆ ನೀಡಲು ಹೋದ ಯುವಕನೊಬ್ಬ ಸೈಬರ್ ಖದೀಮರ ಜಾಲಕ್ಕೆ ಸಿಲುಕಿ ಬರೋಬ್ಬರಿ 90,000 ರೂಪಾಯಿ ಹಣವನ್ನು ಕಳೆದುಕೊಂಡಿದ್ದಾನೆ. ಸಮಾಜಸೇವೆ ಮಾಡುವ ಒಳ್ಳೆಯ ಉದ್ದೇಶದಿಂದ ಹಣ ಕಳುಹಿಸಲು ಹೊರಟ ಯುವಕನಿಗೆ ಕೊನೆಗೆ ಆನ್‌ಲೈನ್ ವಂಚಕರು ದೊಡ್ಡ ಆಘಾತ ನೀಡಿದ್ದಾರೆ.
ಘಟನೆಯ ವಿವರಗಳ ಪ್ರಕಾರ, ಸಂತ್ರಸ್ತ ಯುವಕ ಫೇಸ್‌ಬುಕ್‌ನಲ್ಲಿ ಬಂದ ಚಾರಿಟಿ ಜಾಹೀರಾತಿನಲ್ಲಿದ್ದ ಕ್ಯುಆರ್ ಕೋಡ್ ಅನ್ನು ತನ್ನ ಮೊಬೈಲ್ ಮೂಲಕ ಸ್ಕ್ಯಾನ್ ಮಾಡಿದ್ದನು. ಆದರೆ, ಆ ಕ್ಷಣದಲ್ಲೇ ವಂಚಕರು ಹ್ಯಾಕಿಂಗ್ ತಂತ್ರಜ್ಞಾನದ ಮೂಲಕ ಆತನ ಮೊಬೈಲ್‌ನಲ್ಲಿದ್ದ ಸಂಪೂರ್ಣ ರಹಸ್ಯ ಮಾಹಿತಿ ಹಾಗೂ ಬ್ಯಾಂಕಿಂಗ್ ವಿವರಗಳನ್ನು ತಮ್ಮ ವಶಕ್ಕೆ ತೆಗೆದುಕೊಂಡಿದ್ದಾರೆ. ಇದಾದ ತಕ್ಷಣವೇ ಆತನ ಬ್ಯಾಂಕ್ ಖಾತೆಯಿಂದ ಒಟ್ಟು ಎರಡು ಕಂತುಗಳಲ್ಲಿ ಡಿಜಿಟಲ್ ಕನ್ನ ಹಾಕಲಾಗಿದೆ. ಮೊದಲ ಬಾರಿಗೆ 30,000 ರೂಪಾಯಿ ಹಾಗೂ ಎರಡನೇ ಬಾರಿಗೆ 60,000 ರೂಪಾಯಿಗಳನ್ನು ಖದೀಮರು ಆತನ ಖಾತೆಯಿಂದ ಲಪಟಾಯಿಸಿದ್ದಾರೆ.
ತಮ್ಮ ಖಾತೆಯಿಂದ ದಿಢೀರನೆ ಹಣ ಕಡಿತಗೊಂಡ ಮೆಸೇಜ್ ನೋಡಿ ಬೆಚ್ಚಿಬಿದ್ದ ಯುವಕ, ತಡಮಾಡದೇ ತಕ್ಷಣವೇ ಸೈಬರ್ ಕ್ರೈಂ ಪೋಲಿಸರಿಗೆ ದೂರು ನೀಡಿದ್ದಾನೆ. ಯುವಕನ ದೂರಿನ ಆಧಾರದ ಮೇಲೆ ಪ್ರಸ್ತುತ ಸೈಬರ್ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು, ಹಣ ಹೋದ ಹಾದಿ ಹಾಗೂ ಹ್ಯಾಕರ್ಸ್ ಇರುವ ಸ್ಥಳದ ಕುರಿತು ತೀವ್ರತರವಾದ ತನಿಖೆಯನ್ನು ನಡೆಸುತ್ತಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಇಂತಹ ಕ್ಯುಆರ್ ಕೋಡ್ ಆಧರಿತ 'ಫಿಷಿಂಗ್' ವಂಚನೆಗಳು ಹೆಚ್ಚಾಗುತ್ತಿದ್ದು, ಸೈಬರ್ ಕ್ರಿಮಿನಲ್‌ಗಳು ಸಾರ್ವಜನಿಕರ ದಯಾಪರತೆಯನ್ನು ಬಂಡವಾಳ ಮಾಡಿಕೊಳ್ಳುತ್ತಿದ್ದಾರೆ ಎಂದು ಪೊಲೀಸರು ಕಳವಳ ವ್ಯಕ್ತಪಡಿಸಿದ್ದಾರೆ.
ಈ ಘಟನೆಯ ಬೆನ್ನಲ್ಲೇ ಸೈಬರ್ ಪೊಲೀಸರು ಸಾರ್ವಜನಿಕರಿಗೆ ಕಟ್ಟುನಿಟ್ಟಿನ ಎಚ್ಚರಿಕೆಯ ಸಂದೇಶವನ್ನು ರವಾನಿಸಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಬರುವ ಅಪರಿಚಿತ ಕ್ಯುಆರ್ ಕೋಡ್‌ಗಳನ್ನು ಯಾವುದೇ ಕಾರಣಕ್ಕೂ ಯೋಚಿಸದೆ ಸ್ಕ್ಯಾನ್ ಮಾಡಬೇಡಿ. ಯಾವುದೇ ಸಂಸ್ಥೆ ಅಥವಾ ವ್ಯಕ್ತಿಗೆ ಧರ್ಮಾರ್ಥವಾಗಿ ದೇಣಿಗೆ ನೀಡುವ ಮೊದಲು, ಅವರು ನೀಡಿರುವ ಬ್ಯಾಂಕ್ ಖಾತೆಯ ವಿವರಗಳು, ಐಎಫ್‌ಎಸ್‌ಸಿ ಕೋಡ್ ಹಾಗೂ ಸಂಸ್ಥೆಯ ಅಧಿಕೃತತೆಯನ್ನು ಸರಿಯಾಗಿ ಪರಿಶೀಲಿಸಿ ಖಚಿತಪಡಿಸಿಕೊಳ್ಳುವುದು ಅತ್ಯಗತ್ಯ. ಸಣ್ಣ ಜಾಗರೂಕತೆ ತಪ್ಪಿದರೆ ಬ್ಯಾಂಕ್ ಖಾತೆಯಲ್ಲಿರುವ ಹಣ ಕ್ಷಣಾರ್ಧದಲ್ಲಿ ಮಾಯವಾಗಬಹುದು ಎಂದು ಪೊಲೀಸರು ಜಾಗೃತಿ ಮೂಡಿಸಿದ್ದಾರೆ, (ಏಜೆನ್ಸೀಸ್).