90 ನಿಮಿಷಗಳಲ್ಲಿ ಬಜೆಟ್ ಮುಕ್ತಾಯ: ಇದು ಸೀತಾರಾಮನ್ ಅವರ ಎರಡನೇ ಅತಿ ಕಡಿಮೆ ಅವಧಿಯ ಭಾಷಣ
ನವದೆಹಲಿ: ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್(Nirmala Sitharaman) ಅವರು ಭಾನುವಾರ ಮಂಡಿಸಿದ 2026-27ನೇ ಸಾಲಿನ ಬಜೆಟ್ ಭಾಷಣವು ಹಲವು ವಿಶೇಷತೆಗಳಿಗೆ ಸಾಕ್ಷಿಯಾಯಿತು. ಈ ಬಾರಿಯ ಬಜೆಟ್ ಭಾಷಣವು ಕೇವಲ ಒಂದೂವರೆ ಗಂಟೆ (90 ನಿಮಿಷ) ಅವಧಿಯಲ್ಲಿ ಪೂರ್ಣಗೊಂಡಿದ್ದು, ಇದು ಅವರ ಪೂರ್ಣ ಪ್ರಮಾಣದ ಬಜೆಟ್ ಇತಿಹಾಸದಲ್ಲೇ ಎರಡನೇ ಅತಿ ಕಡಿಮೆ ಅವಧಿಯ ಭಾಷಣವಾಗಿದೆ.
ಸತತ 9ನೇ ಬಾರಿಗೆ ಬಜೆಟ್ ಮಂಡಿಸಿ ದಾಖಲೆ ಬರೆದ ಸೀತಾರಾಮನ್, ಭಾಷಣ ಮುಗಿಸಿದ ನಂತರ ಮುಗುಳ್ನಗುತ್ತಾ, ತಾವು ಒಂದೂವರೆ ಗಂಟೆಗಳ ಕಾಲ ಮಾತನಾಡಿದ್ದಾಗಿ ಸಂಸತ್ತಿನಲ್ಲಿ ಉಲ್ಲೇಖಿಸಿದ್ದಾರೆ.
ಭಾಷಣದ ಅವಧಿಯ ಅಂಕಿ-ಅಂಶಗಳು
ನಿರ್ಮಲಾ ಸೀತಾರಾಮನ್ ಅವರು ತಮ್ಮ ಸುದೀರ್ಘ ಭಾಷಣಗಳಿಗೆ ಹೆಸರಾದವರು. ಆದರೆ, ಕಳೆದ ಕೆಲವು ವರ್ಷಗಳಿಂದ ಅವರು ತಮ್ಮ ಭಾಷಣದ ಅವಧಿಯನ್ನು ಸಂಕ್ಷಿಪ್ತಗೊಳಿಸುತ್ತಾ ಬಂದಿದ್ದಾರೆ.
2026-27ರ ಬಜೆಟ್: 90 ನಿಮಿಷಗಳು (ಒಂದೂವರೆ ಗಂಟೆ). ಇದು 2024ರ ಪೂರ್ಣ ಪ್ರಮಾಣದ ಬಜೆಟ್ ಭಾಷಣದ ಅವಧಿಗೆ ಸಮಾನವಾಗಿದೆ.
ಅತಿ ಕಡಿಮೆ ಅವಧಿ (2025): ಕಳೆದ ವರ್ಷದ ಪೂರ್ಣ ಬಜೆಟ್ ಭಾಷಣವು ಅವರ ವೃತ್ತಿಜೀವನದಲ್ಲೇ ಅತ್ಯಂತ ಕಡಿಮೆ ಎಂದರೆ ಕೇವಲ 77 ನಿಮಿಷಗಳಲ್ಲಿ ಮುಕ್ತಾಯವಾಗಿತ್ತು.
ಅತಿ ದೀರ್ಘಾವಧಿ: 2020ರಲ್ಲಿ ಅವರು ಬರೋಬ್ಬರಿ 2 ಗಂಟೆ 42 ನಿಮಿಷಗಳ ಕಾಲ ಭಾಷಣ ಮಾಡಿ ದಾಖಲೆ ಬರೆದಿದ್ದರು. ಆದರೆ ಅಂದು ಆರೋಗ್ಯ ಸಮಸ್ಯೆಯಿಂದಾಗಿ ಭಾಷಣದ ಕೊನೆಯ ಎರಡು ಪುಟಗಳನ್ನು ಓದದೆ ಮುಕ್ತಾಯಗೊಳಿಸಿದ್ದರು.
ಮಧ್ಯಂತರ ಬಜೆಟ್: 2024ರ ಫೆಬ್ರವರಿಯಲ್ಲಿ ಮಂಡಿಸಿದ ಮಧ್ಯಂತರ ಬಜೆಟ್ ಕೇವಲ 56 ನಿಮಿಷಗಳ ಕಾಲ ಇತ್ತು.
ಶಾರ್ಟ್ ಅಂಡ್ ಸ್ವೀಟ್ ಬಜೆಟ್ ಭಾಷಣ
ಈ ಬಾರಿ ಸಚಿವರು ಸುದೀರ್ಘ ಪೀಠಿಕೆಗಳನ್ನು ಬದಿಗಿಟ್ಟು, ನೇರವಾಗಿ ಯೋಜನೆಗಳು ಮತ್ತು ಅನುದಾನಗಳ ಬಗ್ಗೆ ಪ್ರಸ್ತಾಪಿಸಿದರು. ಡಿಜಿಟಲ್ ಟ್ಯಾಬ್ಲೆಟ್ ಮೂಲಕ ಬಜೆಟ್ ಓದಿದ ನಿರ್ಮಲಾ, ಆರ್ಥಿಕ ಸುಧಾರಣೆಗಳು, ವಿಕಸಿತ ಭಾರತ 2047ರ ಗುರಿ ಮತ್ತು ವಿವಿಧ ವಲಯಗಳಿಗೆ ನೀಡಲಾದ ಉತ್ತೇಜಕಗಳ ಬಗ್ಗೆ ವೇಗವಾಗಿ ಮತ್ತು ಸ್ಪಷ್ಟವಾಗಿ ವಿವರಿಸಿದ್ದಾರೆ.
ದಾಖಲೆಗಳ ಸರದಾರ ನಿರ್ಮಲಾ ಸೀತಾರಾಮನ್
ನಿರ್ಮಲಾ ಸೀತಾರಾಮನ್ ಅವರು ಸತತವಾಗಿ 9 ಬಾರಿ ಬಜೆಟ್ ಮಂಡಿಸುವ ಮೂಲಕ ಮೊರಾರ್ಜಿ ದೇಸಾಯಿ ಅವರ ನಂತರದ ಸ್ಥಾನದಲ್ಲಿದ್ದಾರೆ. ಅವರ ಭಾಷಣದ ಅವಧಿ ಕಡಿಮೆಯಾಗಿದ್ದರೂ, ಅದರಲ್ಲಿರುವ ವಿಷಯದ ತೀವ್ರತೆ ಮತ್ತು ದೂರದೃಷ್ಟಿಯು ದೇಶದ ಆರ್ಥಿಕತೆಯನ್ನು ಐದು ಟ್ರಿಲಿಯನ್ ಡಾಲರ್ ಗುರಿಯತ್ತ ಕೊಂಡೊಯ್ಯುವ ಭರವಸೆ ನೀಡಿದೆ ಎಂದು ಆರ್ಥಿಕ ತಜ್ಞರು ವಿಶ್ಲೇಷಿಸಿದ್ದಾರೆ.
ಸರಳ ಮತ್ತು ಸಂಕ್ಷಿಪ್ತ ಭಾಷಣದ ಮೂಲಕ ಸಚಿವರು ಈ ಬಾರಿ ಶಾಸಕರು ಮತ್ತು ದೇಶದ ಜನತೆಗೆ ಬೇಸರವಾಗದಂತೆ ಬಜೆಟ್ ವಿವರಗಳನ್ನು ಮಂಡಿಸಿರುವುದು ವಿಶೇಷವಾಗಿದೆ,(ಏಜೆನ್ಸೀಸ್).