ಬಜೆಟ್ 2026; ಮಧ್ಯಮ ವರ್ಗದವರಿಗೆ ಏನಿದೆ..? ಎಂಬ ಪ್ರಶ್ನೆಗೆ ನಿರ್ಮಲಾ ಮೌನ: ವಿಡಿಯೋ ವೈರಲ್..Nirmala Sitharaman

ಬಜೆಟ್ ನಂತರದ ಸಾಂಪ್ರದಾಯಿಕ ಪತ್ರಿಕಾಗೋಷ್ಠಿಯಲ್ಲಿ ಸಚಿವೆ ಸೀತಾರಾಮನ್ ಅವರು ವಿವಿಧ ವಲಯಗಳ ಹಂಚಿಕೆಗಳ ಬಗ್ಗೆ ವಿವರಿಸುತ್ತಿದ್ದರು. ಈ ವೇಳೆ ಪತ್ರಕರ್ತರೊಬ್ಬರು, ಮೇಡಂ, ಈ ಬಾರಿಯ ಬಜೆಟ್‌ನಲ್ಲಿ ದೇಶದ ಬೆನ್ನೆಲುಬಾದ ಮಧ್ಯಮ ವರ್ಗದವರಿಗೆ ನೀವು ನೀಡಿರುವ ನಿರ್ದಿಷ್ಟ ಕೊಡುಗೆ ಅಥವಾ ಸಮಾಧಾನಕರ ವಿಷಯವೇನು? ಎಂದು ಪ್ರಶ್ನಿಸಿದ್ದಾರೆ.

ಕೆಲವು ಸೆಕೆಂಡುಗಳ ಮೌನದ ನಂತರ ಮಾತನಾಡಿದ ನಿರ್ಮಲಾ ಸೀತಾರಾಮನ್, ಮಧ್ಯಮ ವರ್ಗದವರ ಆದಾಯ ತೆರಿಗೆ ಸ್ಲ್ಯಾಬ್ ಅಥವಾ ಹಣದುಬ್ಬರ ನಿಯಂತ್ರಣದ ಬಗ್ಗೆ ನೇರ ಉತ್ತರ ನೀಡುವ ಬದಲಿಗೆ, ಸರ್ಕಾರವು ಜಾರಿಗೆ ತರುತ್ತಿರುವ ಯೂನಿವರ್ಸಿಟಿ ಟೌನ್‌ಶಿಪ್ ಯೋಜನೆಗಳ ಬಗ್ಗೆ ಸುದೀರ್ಘವಾಗಿ ವಿವರಿಸಿದ್ದಾರೆ.

ಶಿಕ್ಷಣ ಮತ್ತು ಮೂಲಸೌಕರ್ಯವು ಹೇಗೆ ದೇಶದ ಭವಿಷ್ಯವನ್ನು ಬದಲಿಸುತ್ತದೆ ಎಂದು ನಿರ್ಮಲಾ ವಿವರಿಸಿದರೂ, ಮಧ್ಯಮ ವರ್ಗದವರು ನಿರೀಕ್ಷಿಸುತ್ತಿದ್ದ ತೆರಿಗೆ ವಿನಾಯಿತಿ ಅಥವಾ ಉಳಿತಾಯ ಯೋಜನೆಗಳ ಬಗ್ಗೆ ಅವರು ಯಾವುದೇ ಸ್ಪಷ್ಟನೆ ನೀಡಲಿಲ್ಲ. ಪತ್ರಕರ್ತರು ಮತ್ತೊಮ್ಮೆ ಕೇಳಲು ಪ್ರಯತ್ನಿಸಿದರೂ ಸಚಿವರು ಮುಂದಿನ ಪ್ರಶ್ನೆಗೆ ಅವಕಾಶ ನೀಡಿದರು.

ಸಚಿವರ ಈ ಪ್ರತಿಕ್ರಿಯೆಯ ವಿಡಿಯೋ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ತಮ್ಮ ಆಕ್ರೋಶ ಹೊರಹಾಕುತ್ತಿದ್ದಾರೆ.

ಮೌನವೇ ಉತ್ತರವೇ..?: ಮಧ್ಯಮ ವರ್ಗದವರಿಗೆ ಬಜೆಟ್‌ನಲ್ಲಿ ಏನೂ ಇಲ್ಲ ಎಂಬುದು ಸಚಿವರ ಮೌನದಿಂದಲೇ ಸಾಬೀತಾಗಿದೆ ಎಂದು ಹಲವರು ಟೀಕಿಸಿದ್ದಾರೆ.

ಯೂನಿವರ್ಸಿಟಿ ಟೌನ್‌ಶಿಪ್ ನಮಗೆ ಬೇಕಿಲ್ಲ: ಸಾಮಾನ್ಯ ಜನರು ಮನೆ ಬಾಡಿಗೆ, ಪೆಟ್ರೋಲ್ ಬೆಲೆ ಮತ್ತು ಶಿಕ್ಷಣ ಶುಲ್ಕದ ಬಗ್ಗೆ ಚಿಂತಿಸುತ್ತಿದ್ದರೆ, ಸಚಿವರು ಹೈಟೆಕ್ ಟೌನ್‌ಶಿಪ್‌ಗಳ ಬಗ್ಗೆ ಮಾತನಾಡುತ್ತಿರುವುದು ದುರಂತ ಎಂದು ಬಳಕೆದಾರರು ಕಮೆಂಟ್ ಮಾಡುತ್ತಿದ್ದಾರೆ.

ಕಾಂಗ್ರೆಸ್ ಸೇರಿದಂತೆ ವಿರೋಧ ಪಕ್ಷಗಳು ಈ ವಿಡಿಯೋವನ್ನು ಹಂಚಿಕೊಂಡು ಕೇಂದ್ರ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿವೆ. ಮಧ್ಯಮ ವರ್ಗದವರ ಪ್ರಶ್ನೆಗೆ ಉತ್ತರವಿಲ್ಲದ ಮೋದಿ ಸರ್ಕಾರ, ಕೇವಲ ಬಂಡವಾಳಶಾಹಿಗಳ ಹಿತಾಸಕ್ತಿ ಕಾಪಾಡುತ್ತಿದೆ ಎಂದು ಮಲ್ಲಿಕಾರ್ಜುನ ಖರ್ಗೆ ಆರೋಪಿಸಿದ್ದಾರೆ.

ಒಟ್ಟಾರೆಯಾಗಿ, 90 ನಿಮಿಷಗಳ ಬಜೆಟ್ ಭಾಷಣದಲ್ಲಿರದ ಮಧ್ಯಮ ವರ್ಗದ ಪ್ರಸ್ತಾಪವು ಸುದ್ದಿಗೋಷ್ಠಿಯಲ್ಲಿಯೂ ಕಾಣಿಸದಿರುವುದು ಸಾರ್ವಜನಿಕರಲ್ಲಿ ಅಸಮಾಧಾನ ಮೂಡಿಸಿದೆ,(ಏಜೆನ್ಸೀಸ್).