ಯೋಗಿ ಕೆಳಗಿಳಿಸಲು ಬಿಜೆಪಿ ಪಿತೂರಿ: ಮೋಹನ್ ಯಾದವ್ ಭೂ ಹಗರಣಕ್ಕೆ ಲಿಂಕ್ ಮಾಡಿದ ಅಖಿಲೇಶ್ ಯಾದವ್ ಬಿಗ್ ಕ್ಲೈಮ್! Akhilesh Yadav

ಜೂನ್ 23 ರಂದು ಸುದ್ದಿ ಸಂಸ್ಥೆ ANI ಜೊತೆ ಮಾತನಾಡಿದ ಅಖಿಲೇಶ್ ಯಾದವ್, ಮಧ್ಯಪ್ರದೇಶ ಸಿಎಂ ವಿರುದ್ಧ ಕೇಳಿಬರುತ್ತಿರುವ ಆರೋಪಗಳ ಹಿಂದೆ ಬಿಜೆಪಿಯ ಆಂತರಿಕ ರಾಜಕೀಯ ಅಡಗಿದೆ ಎಂದು ಹೊಸ ಬಾಂಬ್ ಸಿಡಿಸಿದ್ದಾರೆ.

ಮಧ್ಯಪ್ರದೇಶದ ಉಜ್ಜಯಿನಿ ಭೂ ಹಗರಣದ ವಿವಾದಕ್ಕೆ ಪ್ರತಿಕ್ರಿಯಿಸಿದ ಅಖಿಲೇಶ್ ಯಾದವ್, ಮೋಹನ್ ಯಾದವ್ ಅವರನ್ನು ಬಲಿಪಶು ಮಾಡಲು ಮತ್ತು ಅವರ ಹೆಸರನ್ನು ಕೆಡಿಸಲು ಬಿಜೆಪಿಯೇ ಈ ಪಿತೂರಿ ರೂಪಿಸಿದೆ. ಮೋಹನ್ ಯಾದವ್ ವಿರುದ್ಧದ ಆರೋಪಗಳನ್ನು ನೋಡುವುದಾದರೆ, ಉತ್ತರ ಪ್ರದೇಶದ ಸಿಎಂ ಯೋಗಿ ಅವರು ಬರೋಬ್ಬರಿ 300 ರಿಂದ 600 ಎಕರೆ ಭೂಮಿಯನ್ನು ಸ್ವಾಧೀನಪಡಿಸಿಕೊಂಡಿದ್ದಾರೆ. ಇದೇನೂ ಹೊಸ ವಿಷಯವಲ್ಲ. ಅವರು ಈ ಹಿಂದೆ ರಿಯಲ್ ಎಸ್ಟೇಟ್ ವ್ಯವಹಾರದಲ್ಲಿ ತೊಡಗಿದ್ದರು ಎಂಬುದು ಬಿಜೆಪಿಗೆ ತಿಳಿದಿಲ್ಲವೇ ಎಂದಿದ್ದಾರೆ. ಈ ಎಲ್ಲ ಆರೋಪಗಳನ್ನು ಯಾಕೆ ಮುನ್ನೆಲೆಗೆ ತರಲಾಗುತ್ತಿದೆ ಎಂದರೆ, ಬಿಜೆಪಿಗೆ ಸದ್ಯ ಮೂವರು ಮುಖ್ಯಮಂತ್ರಿಗಳನ್ನು ಬದಲಾಯಿಸಲು ಒಂದು ನೆಪ ಬೇಕಾಗಿದೆ ಎಂದು ನೇರವಾಗಿ ವಾಗ್ದಾಳಿ ನಡೆಸಿದ್ದಾರೆ.

ಇನ್ನೊಂದೆಡೆ, ಮಧ್ಯಪ್ರದೇಶ ಸಿಎಂ ಮೋಹನ್ ಯಾದವ್ ವಿರುದ್ಧ ಕಾಂಗ್ರೆಸ್ ಪಕ್ಷವು ತನ್ನ ದಾಳಿಯನ್ನು ತೀವ್ರಗೊಳಿಸಿದೆ. ನವದೆಹಲಿಯಲ್ಲಿ ಬುಧವಾರ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಕಾಂಗ್ರೆಸ್ ಮುಖಂಡ ಪವನ್ ಖೇರಾ, 2035ರ ಉಜ್ಜಯಿನಿ ಮಾಸ್ಟರ್ ಪ್ಲಾನ್ ಅಡಿಯಲ್ಲಿ ಭವಿಷ್ಯದ ಅಭಿವೃದ್ಧಿಗಾಗಿ ಕಾಯ್ದಿರಿಸಲಾಗಿದ್ದ ಭೂಮಿಯನ್ನು ಮೋಹನ್ ಯಾದವ್ ಅವರ ಕುಟುಂಬಸ್ಥರು ಮುಂಚಿತವಾಗಿಯೇ ಖರೀದಿ ಮಾಡಿದ್ದಾರೆ ಎಂದು ದಾಖಲೆ ಸಮೇತ ಆರೋಪಿಸಿದ್ದಾರೆ.

2028ರಲ್ಲಿ ಉಜ್ಜಯಿನಿಯಲ್ಲಿ ಮಹಾ ಕುಂಭಮೇಳ ನಡೆಯಲಿದ್ದು, ಅದಕ್ಕಾಗಿ ಗುರುತಿಸಲಾದ ಒಟ್ಟು 168 ಎಕರೆ ಜಾಗದ ಪೈಕಿ 111 ಎಕರೆ ಭೂಮಿಯನ್ನು ಸಿಎಂ ಮೋಹನ್ ಯಾದವ್ ಅವರ ಕುಟುಂಬದವರೇ ಖರೀದಿಸಿದ್ದಾರೆ. ಶೇರು ಮಾರುಕಟ್ಟೆಯ ಭಾಷೆಯಲ್ಲಿ ಇದನ್ನು ಇನ್ಸೈಡರ್ ಟ್ರೇಡಿಂಗ್ ಎನ್ನಲಾಗುತ್ತದೆ. ಮೋಹನ್ ಯಾದವ್ ಅವರು ಈ ಹಿಂದೆ ಶಿಕ್ಷಣ ಸಚಿವರಾಗಿ ಮತ್ತು ಪ್ರವಾಸೋದ್ಯಮ ನಿಗಮದ ಅಧ್ಯಕ್ಷರಾಗಿದ್ದಾಗ ಈ ಮಾಸ್ಟರ್ ಪ್ಲಾನ್‌ನ ರಹಸ್ಯ ಮಾಹಿತಿಗಳನ್ನು ಬಳಸಿಕೊಂಡು ತಮ್ಮ ಕುಟುಂಬದ ಹೆಸರಿಗೆ ನೂರಾರು ಎಕರೆ ಜಮೀನು ಬರೆಸಿಕೊಂಡಿದ್ದಾರೆ ಎಂದು ಪವನ್ ಖೇರಾ ಗಂಭೀರ ಆರೋಪ ಮಾಡಿದ್ದಾರೆ.

ಈ ಭೂ ಹಗರಣವನ್ನು ಅಯೋಧ್ಯೆಯ ರಾಮಮಂದಿರದ ದೇಣಿಗೆ ದುರುಪಯೋಗದ ವಿವಾದಕ್ಕೆ ಹೋಲಿಸಿದ ಪವನ್ ಖೇರಾ, ಇದು ಕೇವಲ ಪ್ರಾದೇಶಿಕ ವಿಷಯವಲ್ಲ, ಇದೊಂದು ಜಾಗತಿಕ ಹಗರಣ. ಅಯೋಧ್ಯೆ ಮತ್ತು ಉಜ್ಜಯಿನಿ ನಗರಗಳೊಂದಿಗೆ ದೇಶದ ಕೋಟ್ಯಂತರ ಜನರ ಧಾರ್ಮಿಕ ನಂಬಿಕೆಗಳು ಬೆಸೆದುಕೊಂಡಿವೆ. ಜನರು ತಮ್ಮ ಕಷ್ಟದ ಹಣವನ್ನು ಉಳಿಸಿ ಈ ಪುಣ್ಯಕ್ಷೇತ್ರಗಳಿಗೆ ತೀರ್ಥಯಾತ್ರೆಗೆ ಬರುತ್ತಾರೆ. ಅಂತಹ ಪವಿತ್ರ ಜಾಗದಲ್ಲಿ ಭ್ರಷ್ಟಾಚಾರ ನಡೆಸುವುದು ಜನರ ನಂಬಿಕೆಗೆ ಬೆನ್ನುಮೂಳೆ ಇರಿದಂತೆ ಎಂದು ಆಕ್ರೋಶ ಹೊರಹಾಕಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಅವರ ಮೌನವನ್ನು ಟೀಕಿಸಿದ ಖೇರಾ, ಪ್ರಧಾನಿ ಮೋದಿ ಅವರಿಂದ ಯಾವುದೇ ಕ್ರಮವನ್ನು ನಿರೀಕ್ಷಿಸಲು ಸಾಧ್ಯವಿಲ್ಲ. ಅವರು ವಿದೇಶಗಳಲ್ಲಿ ಮೆಲೋಡಿ ತಿನ್ನುತ್ತಾ, ಇಲ್ಲಿ ದೇಶದ ಜನರಿಗೆ ಝಾಲ್ ಮುರಿ ತಿನ್ನಿಸುತ್ತಿದ್ದಾರೆ. ಆದರೆ ಅವರದೇ ಮುಖ್ಯಮಂತ್ರಿಗಳು ಮಾತ್ರ ಬಡವರ ಜಮೀನು ಮತ್ತು ದೇವಸ್ಥಾನಗಳ ಚಿನ್ನ-ಬೆಳ್ಳಿಯನ್ನು ನುಂಗಿ ನೀರು ಕುಡಿಯುತ್ತಿದ್ದಾರೆ. ಆರ್‌ಎಸ್‌ಎಸ್ ಭಾಷೆಯಲ್ಲೇ ಹೇಳಬೇಕೆಂದರೆ, 'ಅಯೋಧ್ಯೆ, ಉಜ್ಜಯಿನಿ ಕೇವಲ ದೃಶ್ಯಗಳಷ್ಟೇ, ಮಥುರಾ-ಕಾಶಿ ಇನ್ನೂ ಬಾಕಿ ಇವೆ ಎಂಬಂತಾಗಿದೆ ಇವರ ಭ್ರಷ್ಟಾಚಾರ ಎಂದು ವ್ಯಂಗ್ಯವಾಡಿದ್ದಾರೆ.

ಒಟ್ಟಾರೆಯಾಗಿ, ಮಧ್ಯಪ್ರದೇಶದ ಈ ಭೂ ವಿವಾದವು ಈಗ ಉತ್ತರ ಪ್ರದೇಶದ ಯೋಗಿ ಆದಿತ್ಯನಾಥ್ ಅವರ ಕುರ್ಚಿಗೂ ಕಂಟಕ ತರಲಿದೆಯೇ ಎಂಬ ಚರ್ಚೆಯನ್ನು ಹುಟ್ಟುಹಾಕಿದ್ದು, ಮುಂಬರುವ ದಿನಗಳಲ್ಲಿ ದೇಶದ ರಾಜಕಾರಣದಲ್ಲಿ ದೊಡ್ಡ ಬದಲಾವಣೆಗಳ ಮುನ್ಸೂಚನೆ ನೀಡಿದೆ,(ಏಜೆನ್ಸೀಸ್).