Lord Ram was Muslim | ಶ್ರೀರಾಮ ಮುಸ್ಲಿಂ ಎಂದು ಟಿಎಂಸಿ ಶಾಸಕನ ವಾದ..ಮತಬ್ಯಾಂಕ್​ ಸಮಾಧಾನ ಮಾಡುವುದೇ ಮಮತಾ ಆದ್ಯತೆ ಎಂದು ಬಿಜೆಪಿ ಟಾಂಗ್​

ಬಂಗಾಳಿ ಭಾಷೆಯಲ್ಲಿ ಭಾಷಣ ಮಾಡಿರುವ ಮಿತ್ರಾ, ಹಿಂದೂ ಶ್ಲೋಕವನ್ನು ಪಠಿಸುವ ಮೂಲಕ ತಮ್ಮ ಮಾತುಗಳನ್ನು ಪ್ರಾರಂಭಿಸಿದರು ಮತ್ತು ಹಿಂದೂ ಧರ್ಮದ ಬಗೆಗಿನ ಬಿಜೆಪಿಯ ವ್ಯಾಖ್ಯಾನವನ್ನು ಟೀಕಿಸಿದರು. ತಮ್ಮ ಹೇಳಿಕೆಗಳು ಧರ್ಮವನ್ನು ಗುರಿಯಾಗಿಸಿ ನೀಡಿದ್ದಲ್ಲ, ಬದಲಾಗಿ ಹಿಂದೂ ಧರ್ಮದ ಬಗ್ಗೆ ಬಿಜೆಪಿ ನಾಯಕತ್ವದ ತಿಳುವಳಿಕೆಯನ್ನು ಪ್ರಶ್ನಿಸುವ ಇಚ್ಛೆ ಹೊಂದಿವೆ ಎಂದು ಹೇಳಿದರು.

ವೈಯಕ್ತಿಕ ಸಂವಾದವೊಂದನ್ನು ನೆನಪಿಸಿಕೊಂಡ ಕಾಮರ್ಹತಿ ಕ್ಷೇತ್ರದ ಶಾಸಕ ಮಿತ್ರಾ, ಬಿಜೆಪಿಯ ಹಿರಿಯ ನಾಯಕರೊಬ್ಬರಿಗೆ ರಾಮ ಹಿಂದೂ ಎಂದು ಸಾಬೀತುಪಡಿಸಲು ಸವಾಲು ಹಾಕಿದ್ದಾಗಿ ತಿಳಿಸಿದರು. ನಾನು ಅವರಿಗೆ ಹೇಳಿದೆ, ರಾಮ ಹಿಂದೂ ಎಂದು ನನಗೆ ಸಾಬೀತುಪಡಿಸಿ. ರಾಮನ ಉಪನಾಮ ಏನೆಂದು ಹೇಳಿ ಎಂದು ಪ್ರಶ್ನಿಸಿದ್ದೆ, ಹಾಜರಿದ್ದ ಯಾರೂ ಕೂಡ ನನ್ನ ಪ್ರಶ್ನೆಗೆ ಉತ್ತರಿಸಲಿಲ್ಲ. ಬಂಗಾಳದ ವಿಪಕ್ಷ ನಾಯಕ ಸುವೇಂದು ಅಧಿಕಾರಿ ಸಹ ಇದಕ್ಕೆ ಪ್ರತಿಕ್ರಿಯಿಸಲಿಲ್ಲ ಎಂದು ಹೇಳಿದ್ದಾರೆ.

ಶಾಸಕ ಮಿತ್ರಾ ಹೇಳಿಕೆಯನ್ನು ತೀವ್ರವಾಗಿ ಖಂಡಿಸಿರುವ ಬಿಜೆಪಿ ವಕ್ತಾರ ಪ್ರದೀಪ್ ಭಂಡಾರಿ, ಪ್ರಭು ಶ್ರೀರಾಮ ಹಿಂದೂ ಅಲ್ಲ, ಮುಸ್ಲಿಂ ಆಗಿದ್ದರು ಎಂಬ ಟಿಎಂಸಿ ಶಾಸಕ ಮದನ್ ಮಿತ್ರಾ ಮಾತು ಹಿಂದೂ ನಂಬಿಕೆಗೆ ಉದ್ದೇಶಪೂರ್ವಕವಾಗಿ ಮಾಡಿರುವ ಅವಮಾನವಾಗಿದೆ. ಟಿಎಂಸಿ ಹಿಂದೂ ನಂಬಿಕೆಯ ಮೇಲೆ ದೈನಂದಿನ ದಾಳಿಗೆ ಇಳಿದಿರುವುದಕ್ಕೆ ಇದೇ ನೈಜ ಉದಾಹರಣೆ. ತಮ್ಮ ಮತ ಬ್ಯಾಂಕ್ ಸಮಾಧಾನಪಡಿಸಲು ಅಗ್ಗದ ಪ್ರಚೋದನೆ. ಇದು ಮಮತಾ ಬ್ಯಾನರ್ಜಿ ಅವರ ಏಕೈಕ ಆದ್ಯತೆಯಾಗಿದೆ ಎಂದು ಹೇಳಿದ್ದಾರೆ(ಏಜೆನ್ಸೀಸ್​).