ಡಿಎಂಕೆ ಬೆನ್ನಿಗೆ ಕಾಂಗ್ರೆಸ್‌ ಚೂರಿ ಇರಿತ...ಸಂಸತ್ತಿನಲ್ಲಿ ಹೊಸ ಇತಿಹಾಸ ಬರೆಯುತ್ತಾ ಹಳೆಯ ಒಡನಾಟ..? | DMKvsCongress

ಸಿಎಂ ವಿಜಯ್ ನೇತೃತ್ವದ ಟಿವಿಕೆ ಸರ್ಕಾರಕ್ಕೆ ಕಾಂಗ್ರೆಸ್ ಬೆಂಬಲಿಸಿದಾಗಿನಿಂದ ಡಿಎಂಕೆ ಮತ್ತು ಕಾಂಗ್ರೆಸ್ ನಡುವಿನ ದೀರ್ಘಕಾಲದ ಮೈತ್ರಿ ಮುರಿದುಬಿದ್ದಿದೆ. ಕೈ ಪಕ್ಷವು ತನ್ನ ಬೆನ್ನಿಗೆ ಚೂರಿ ಇರಿದಿದೆ ಎಂದು ಬಹಿರಂಗವಾಗಿ ಆಕ್ರೋಶ ಹೊರಹಾಕಿರುವ ಡಿಎಂಕೆ, ಲೋಕಸಭೆಯಲ್ಲಿ ಆ ಪಕ್ಷದ ಸಂಸದರ ಜೊತೆ ಕುಳಿತುಕೊಳ್ಳಲು ನಿರಾಕರಿಸಿದೆ. ಈ ಹಿನ್ನೆಲೆಯಲ್ಲಿ ಸದನದಲ್ಲಿ ತಮಗೆ ಪ್ರತ್ಯೇಕ ಆಸನ ವ್ಯವಸ್ಥೆ ಕಲ್ಪಿಸುವಂತೆ ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರಿಗೂ ಪತ್ರ ಬರೆಯಲಾಗಿದೆ.

ಸಧ್ಯ ಉಂಟಾಗಿರುವ ಭಿನ್ನಾಭಿಪ್ರಾಯವು ತನಗೆ ವರವಾಗಬಹುದು ಹಾಗೂ ಕೆಲವು ವಿಷಯಗಳಲ್ಲಾದರೂ ಡಿಎಂಕೆ ತನ್ನೊಂದಿಗೆ ಕೈಜೋಡಿಸಬಹುದು ಎಂದು ಬಿಜೆಪಿ ಆಶಿಸುತ್ತಿದೆ. ಇದರೊಂದಿಗೆ, ಇತ್ತೀಚಿನ ವಿಧಾನಸಭಾ ಚುನಾವಣೆಯಲ್ಲಿ ಟಿವಿಕೆ ಎದುರು ಸೋಲು ಕಂಡಿರುವ ಡಿಎಂಕೆ ರಾಜಕೀಯವಾಗಿಯೂ ಕೊಂಚ ದುರ್ಬಲಗೊಂಡಿದೆ. ಈ ಸನ್ನಿವೇಶವನ್ನು ತನ್ನದಾಗಿಸಿಕೊಳ್ಳಲು ಬಿಜೆಪಿ ಎದುರುನೋಡುತ್ತಿದೆ.

ಹಾಗೆ ನೋಡಿದರೆ ಡಿಎಂಕೆ ಪಕ್ಷಕ್ಕೆ ಬಿಜೆಪಿಯೊಂದಿಗೆ ಕೆಲಸ ಮಾಡಿದ ಇತಿಹಾಸವೂ ಇದೆ. ಹಿಂದೆ ಕಾಂಗ್ರೆಸ್ ನೇತೃತ್ವದ ಮೈತ್ರಿಕೂಟವನ್ನು ಸೇರುವ ಮುನ್ನ, ಡಿಎಂಕೆಯು ಅಟಲ್ ಬಿಹಾರಿ ವಾಜಪೇಯಿ ನೇತೃತ್ವದ ಎನ್‌ಡಿಎ ಸರ್ಕಾರದ ಭಾಗವಾಗಿ ಕಾರ್ಯನಿರ್ವಹಿಸಿತ್ತು. ಆದ್ದರಿಂದ ಈ ಹಳೆಯ ರಾಜಕೀಯ ಒಡನಾಟವನ್ನು ಮತ್ತೆ ಆರಂಭಿಸುವುದು ಅಸಾಧ್ಯವೇನಲ್ಲ ಎಂದು ಮೂಲಗಳು ಅಭಿಪ್ರಾಯಪಟ್ಟಿವೆ.

ಆದರೆ, ಈ ಎರಡೂ ಪಕ್ಷಗಳು ಒಟ್ಟಾಗಿ ಸಾಗಲು ಕೆಲವು ಪ್ರಮುಖ ಸೈದ್ಧಾಂತಿಕ ಅಡೆತಡೆಗಳು ಎದುರಾಗಲಿವೆ ಎನ್ನುವುದಂತು ಒಪ್ಪಿಕೊಳ್ಳಲೇಬೇಕು. ಕೇಂದ್ರ ಸರ್ಕಾರದ ಪ್ರಸ್ತಾವಿತ ಗಡಿ ನಿರ್ಣಯ (ಡಿಲಿಮಿಟೇಶನ್) ಯೋಜನೆಯನ್ನು ಡಿಎಂಕೆ ಮೊದಲಿನಿಂದಲೂ ತೀವ್ರವಾಗಿ ವಿರೋಧಿಸುತ್ತಾ ಬಂದಿದೆ. ತನ್ನ ಇಡೀ ವಿಧಾನಸಭಾ ಚುನಾವಣಾ ಪ್ರಚಾರವನ್ನೇ ಇದು ದಕ್ಷಿಣ ರಾಜ್ಯಗಳ ಪ್ರಾತಿನಿಧ್ಯದ ಮೇಲಿನ ಬಿಜೆಪಿಯ ದಾಳಿ ಎಂದು ಬಿಂಬಿಸಿತ್ತು. ಡಿಎಂಕೆ ಸಂಸದರು ಕಪ್ಪು ಬಟ್ಟೆ ಧರಿಸಿ ಮಸೂದೆಯ ಪ್ರತಿಗಳನ್ನು ಸುಟ್ಟು ಪ್ರತಿಭಟಿಸಿದ ಉದಾಹರಣೆ ಇರುವುದರಿಂದ, ಎಂ.ಕೆ. ಸ್ಟಾಲಿನ್ ನೇತೃತ್ವದ ಪಕ್ಷವು ಈ ವಿಷಯದಲ್ಲಿ ತನ್ನ ನಿಲುವನ್ನು ಬದಲಿಸಿಕೊಳ್ಳುವುದು ಅಷ್ಟು ಸುಲಭವಲ್ಲ.

ಇದರೊಂದಿಗೆ ಸನಾತನ ಧರ್ಮದ ಕುರಿತು ಡಿಎಂಕೆ ಹೊಂದಿರುವ ನಿಲುವು ಮತ್ತೊಂದು ದೊಡ್ಡ ಅಸ್ಪಷ್ಟ ಹಾಗೂ ಸಂಘರ್ಷದ ಪ್ರದೇಶವಾಗಿದೆ. ತಮಿಳುನಾಡಿನ ಮಾಜಿ ಉಪಮುಖ್ಯಮಂತ್ರಿ ಉದಯನಿಧಿ ಸ್ಟಾಲಿನ್ ಅವರು ಸನಾತನ ಧರ್ಮದ ವಿರುದ್ಧ ಪದೇ ಪದೇ ನೀಡಿದ್ದ ಹೇಳಿಕೆಗಳು ಮತ್ತು ಅದನ್ನು ನಿರ್ಮೂಲನೆ ಮಾಡುವ ಕುರಿತಾದ ಹೇಳಿಕೆಗಳು ಬಿಜೆಪಿ ಮತ್ತು ಡಿಎಂಕೆ ನಡುವೆ ದೊಡ್ಡ ಸರಣಿ ಜಗಳಕ್ಕೆ ಕಾರಣವಾಗಿದ್ದವು. ಈ ಭಿನ್ನಾಭಿಪ್ರಾಯವನ್ನು ಬದಿಗಿಟ್ಟು ದಾರಿ ಕಂಡುಕೊಳ್ಳುವುದು ಎರಡೂ ಕಡೆಯವರಿಗೆ ಸವಾಲಿನ ಕೆಲಸವಾಗಿದೆ.

ಬಿಜೆಡಿಯ ನವೀನ್ ಪಟ್ನಾಯಕ್, ವೈಎಸ್‌ಆರ್‌ಸಿಪಿಯ ಜಗನ್ ರೆಡ್ಡಿ ಮತ್ತು ಬಿಆರ್‌ಎಸ್‌ನ ಕೆ. ಚಂದ್ರಶೇಖರ್ ರಾವ್ ಪಕ್ಷಗಳ ಮಾದರಿಯಲ್ಲೇ, ಡಿಎಂಕೆಯೂ ಎನ್‌ಡಿಎ ಮೈತ್ರಿಕೂಟದ ಹೊರಗಿದ್ದುಕೊಂಡೇ ಕೇಂದ್ರ ಸರ್ಕಾರಕ್ಕೆ ವಿಷಯಾಧಾರಿತ ಬೆಂಬಲ ನೀಡಲಿ ಎಂಬುದು ಬಿಜೆಪಿಯ ಆಶಯವಾಗಿದೆ. ಮತ್ತೊಂದೆಡೆ, ಚುನಾವಣಾ ಸೋಲಿನ ಬಳಿಕ ಬಿಜೆಪಿಯ ತಮಿಳುನಾಡು ಮಿತ್ರಪಕ್ಷವಾದ ಎಐಎಡಿಎಂಕೆಯಲ್ಲಿ ಆಂತರಿಕ ಬಂಡಾಯ ಶುರುವಾಗಿದ್ದು, ಪಕ್ಷವು ಒಡೆಯುವ ಸಾಧ್ಯತೆಯೇ ಹೆಚ್ಚು. ಇಂತಹ ಪರಿಸ್ಥಿತಿಯಲ್ಲಿ ಎಐಎಡಿಎಂಕೆಯ ಎರಡೂ ಬಣಗಳು ತಮ್ಮ ರಾಜಕೀಯ ಉಳಿವಿಗಾಗಿ ಕೇಂದ್ರದ ಬೆಂಬಲವನ್ನು ಯಾಚಿಸಬೇಕಾಗುತ್ತದೆ. ಅಂತಹ ಸಂದರ್ಭದಲ್ಲಿ, ಸ್ಟಾಲಿನ್ ನೇತೃತ್ವದ ಡಿಎಂಕೆ ಸ್ವಲ್ಪ ಆಸಕ್ತಿ ತೋರಿಸಿದರೂ ಸಾಕು, ತಮಿಳುನಾಡಿನಲ್ಲಿ ಅದರ ಕಡೆಗೆ ಹೆಜ್ಜೆ ಇಡಲು ಬಿಜೆಪಿಗೆ ಯಾವುದೇ ರಾಜಕೀಯ ಮುಜುಗರ ಇರುವುದಿಲ್ಲ.

ಇದರೊಂದಿಗೆ ಮುಂದಿನ ವರ್ಷ ರಾಷ್ಟ್ರಪತಿ ಚುನಾವಣೆ ಎದುರಾಗಲಿದ್ದು, ಪಶ್ಚಿಮ ಬಂಗಾಳ ಮತ್ತು ಅಸ್ಸಾಂನಲ್ಲಿ ಇತ್ತೀಚೆಗೆ ದೊಡ್ಡ ಗೆಲುವು ಸಾಧಿಸಿದ್ದರೂ, ಸಂಸತ್ತಿನಲ್ಲಿ ಮೂರನೇ ಎರಡರಷ್ಟು ಬಹುಮತದ ಕೊರತೆ ಕಾಡುತ್ತಲೇ ಇದೆ. ಹೀಗಾಗಿ ರಾಷ್ಟ್ರಪತಿ ಚುನಾವಣೆಯಲ್ಲಿ ಡಿಎಂಕೆಯ ಬೆಂಬಲವನ್ನು ಪಡೆಯುವ ಅವಕಾಶಗಳನ್ನು ಬಿಜೆಪಿ ಅನ್ವೇಷಿಸುತ್ತಿದೆ ಎನ್ನಲಾಗಿದ್ದು, ಇದು ಕೇಂದ್ರದ ಆಡಳಿತ ಪಕ್ಷಕ್ಕೆ ಸಿಗುವ ಸಂಖ್ಯಾಬಲದ ಬೋನಸ್ ಜೊತೆಗೆ, ಡಿಎಂಕೆ ನೀಡಬಹುದಾದ ಇಂತಹ ವಿಷಯಾಧಾರಿತ ಬೆಂಬಲವು ಒಟ್ಟಾರೆ ದೇಶದ ವಿರೋಧ ಪಕ್ಷಗಳ ಒಕ್ಕೂಟದಲ್ಲಿ ಗೊಂದಲವನ್ನು ಎತ್ತಿ ತೋರಿಸುತ್ತದೆ. ಇದು ರಾಜಕೀಯವಾಗಿ ಬಿಜೆಪಿಗೆ ಸಿಗುವ ಮತ್ತೊಂದು ದೊಡ್ಡ ಲಾಭದಾಯಕ ಅಂಶವಾಗಲಿದೆ(ಏಜೆನ್ಸೀಸ್​​).