ಬಂಗಾಳದಲ್ಲಿ ಕಡುವೈರಿ ಮಮತಾಗೆ ಸದ್ದಿಲ್ಲದೆ ರಕ್ಷಾಕವಚವಾದ ಬಿಜೆಪಿ! ಟಿಎಂಸಿಯನ್ನು ಸಂಪೂರ್ಣವಾಗಿ ಮುಗಿಸದಂತೆ ಕಮಲಕ್ಕೆ ತಡೆಯೊಡ್ಡಿದ ಆ 'ಮೂರನೇ ಶಕ್ತಿ' ಯಾವುದು? Bjp Strategy Bengal

ಆದರೆ, ಚುನಾವಣೆ ಮುಗಿದು ಒಂದು ತಿಂಗಳು ಕಳೆದರೂ ಟಿಎಂಸಿ ಇನ್ನು ಸಂಪೂರ್ಣವಾಗಿ ಒಡೆದು ಹೋಗಿಲ್ಲ. ಪಕ್ಷದೊಳಗೆ ಇತಿಹಾಸದಲ್ಲೇ ಅತ್ಯಂತ ಭೀಕರ ಬಂಡಾಯದ ಬಿರುಗಾಳಿ ಎದ್ದಿದ್ದರೂ, ಮಮತಾ ಅವರ ಕಟ್ಟಾ ಶತ್ರುವಾಗಿರುವ ಬಿಜೆಪಿ ಮಾತ್ರ ಸದ್ಯಕ್ಕೆ ಟಿಎಂಸಿ ಪಕ್ಷವನ್ನು ಸಂಪೂರ್ಣವಾಗಿ ಪತನಗೊಳಿಸಲು ಇಷ್ಟಪಡುತ್ತಿಲ್ಲ. ಹೌದು, ತೃಣಮೂಲ ಕಾಂಗ್ರೆಸ್ ಈಗಲೇ ಸತ್ತು ಹೋದರೆ ಅದರಿಂದ ತನಗೆ ಲಾಭಕ್ಕಿಂತ ನಷ್ಟವೇ ಹೆಚ್ಚು ಎಂದು ಬಂಗಾಳದ ಬಿಜೆಪಿ ನಾಯಕರು ಆತಂಕಗೊಂಡಿದ್ದಾರೆ. ದೀದಿ ಪಕ್ಷದ ಪತನವಾದರೆ ಬಂಗಾಳದಲ್ಲಿ ತನಗಿಂತ ಬಲಿಷ್ಠವಾದ ಮತ್ತೊಂದು ಹಳೆಯ ಶತ್ರು ಎದ್ದು ನಿಲ್ಲಬಹುದು ಎಂಬ ಭಯ ಕೇಸರಿ ಪಾಳಯವನ್ನು ಕಾಡಲಾರಂಭಿಸಿದೆ.

ಕಳೆದ 1998 ರಲ್ಲಿ ಮಮತಾ ಬ್ಯಾನರ್ಜಿ ಅವರು ತೃಣಮೂಲ ಕಾಂಗ್ರೆಸ್ ಪಕ್ಷವನ್ನು ಸ್ಥಾಪಿಸಿದ ನಂತರ, ಪಕ್ಷ ಎಂದೂ ಇಂತಹ ಭೀಕರ ಆಂತರಿಕ ಯುದ್ಧವನ್ನು ಎದುರಿಸಿರಲಿಲ್ಲ. ವಿಧಾನಸಭೆಯ ಒಟ್ಟು 80 ಟಿಎಂಸಿ ಶಾಸಕರ ಪೈಕಿ ಬರೋಬ್ಬರಿ 60 ಶಾಸಕರು ಮಮತಾ ಬ್ಯಾನರ್ಜಿ ವಿರುದ್ಧ ಬಹಿರಂಗವಾಗಿ ದಂಗೆ ಎದ್ದಿದ್ದಾರೆ. ಉಲುಬೇರಿಯಾ ಪುರ್ಬಾ ಕ್ಷೇತ್ರದ ಶಾಸಕ ಹಾಗೂ ಹಿರಿಯ ನಾಯಕ ರಿತಬ್ರತಾ ಬ್ಯಾನರ್ಜಿ ನೇತೃತ್ವದಲ್ಲಿ ಈ 60 ಶಾಸಕರು ಮಮತಾ ಅವರ ನಿರ್ಧಾರವನ್ನು ಧಿಕ್ಕರಿಸಿ, ರಿತಬ್ರತಾ ಅವರನ್ನೇ ವಿಧಾನಸಭೆಯ ಅಧಿಕೃತ ವಿರೋಧ ಪಕ್ಷದ ನಾಯಕನನ್ನಾಗಿ ಆಯ್ಕೆ ಮಾಡಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ. ಇದಕ್ಕೆ ಸ್ಪೀಕರ್ ಕೂಡ ಒಪ್ಪಿಗೆ ನೀಡಿದ್ದಾರೆ.

ಸಾಮಾನ್ಯವಾಗಿ ಯಾವುದೇ ರಾಜ್ಯದಲ್ಲಿ ಇಂತಹ ದೊಡ್ಡ ಬಂಡಾಯ ನಡೆದರೆ ಎದುರಾಳಿ ಪಕ್ಷವಾದ ಬಿಜೆಪಿ ತಕ್ಷಣವೇ ಆ ಶಾಸಕರನ್ನು ತನ್ನತ್ತ ಸೆಳೆದು ಸರ್ಕಾರ ಬೀಳಿಸಲು ಅಥವಾ ಆ ಪಕ್ಷವನ್ನು ಮುಗಿಸಲು ಯತ್ನಿಸುತ್ತದೆ. ಆದರೆ, ಬಂಗಾಳದಲ್ಲಿ ಬಿಜೆಪಿ ಈ ಬಂಡಾಯಗಾರರನ್ನು ಅಪ್ಪಿಕೊಳ್ಳಲು ನಿರಾಕರಿಸುತ್ತಿದೆ.

ರಾಜಕೀಯ ವಿಶ್ಲೇಷಕರು ಮತ್ತು ಹಿರಿಯ ಪತ್ರಕರ್ತರ ಪ್ರಕಾರ, ಟಿಎಂಸಿ ಪಕ್ಷದ ಸಂಪೂರ್ಣ ಪತನವಾದರೆ ಪಶ್ಚಿಮ ಬಂಗಾಳದ ರಾಜಕಾರಣದಲ್ಲಿ ಭಾರಿ ದೊಡ್ಡ ರಾಜಕೀಯ ಶೂನ್ಯತೆ ಸೃಷ್ಟಿಯಾಗುತ್ತದೆ. ಈ ಶೂನ್ಯತೆಯನ್ನು ತುಂಬಲು ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ ಅಂದರೆ ಸಿಪಿಐ(ಎಂ) ನೇತೃತ್ವದ ಎಡರಂಗ ಮತ್ತು ಕಾಂಗ್ರೆಸ್ ಮೈತ್ರಿಕೂಟ ಅತ್ಯಂತ ವೇಗವಾಗಿ ಸಜ್ಜಾಗುತ್ತಿದೆ.

ಒಂದು ವೇಳೆ ಟಿಎಂಸಿ ಸಂಪೂರ್ಣವಾಗಿ ಕರಗಿ ಹೋದರೆ, ಅದರ ಸಾಂಪ್ರದಾಯಿಕ ಮತದಾರರು ನೇರವಾಗಿ ಎಡರಂಗದ ಕಡೆಗೆ ವಾಲಲಿದ್ದಾರೆ. ಈ ಹಿಂದೆ 2019 ರ ಲೋಕಸಭೆ ಮತ್ತು 2021 ರ ವಿಧಾನಸಭಾ ಚುನಾವಣೆಗಳಲ್ಲಿ ಬಿಜೆಪಿ ಹೇಗೆ ಎಡಪಂಥೀಯರ ಶೇ. 20 ಕ್ಕಿಂತ ಹೆಚ್ಚು ಮತದಾರರನ್ನು ತನ್ನತ್ತ ಸೆಳೆದು ಬಂಗಾಳದಲ್ಲಿ 77 ಶಾಸಕರು ಹಾಗೂ 18 ಸಂಸದರನ್ನು ಗೆದ್ದು ಬಲಿಷ್ಠವಾಗಿ ನಿಂತಿತ್ತೋ, ಅದೇ ತಂತ್ರವನ್ನು ಈಗ ಸಿಪಿಐ(ಎಂ) ಮರಳಿ ಮಾಡಲು ಸಜ್ಜಾಗಿದೆ. ಟಿಎಂಸಿಯ ಅತೃಪ್ತ ಮತ್ತು ಮತದಾರರ ಬಲವನ್ನು ಎಡರಂಗವು ಮರಳಿ ಪಡೆದರೆ, ಬಂಗಾಳದಲ್ಲಿ ಬಿಜೆಪಿಗೆ ನೇರ ಸವಾಲು ಎದುರಾಗಲಿದೆ.

ಪಶ್ಚಿಮ ಬಂಗಾಳವನ್ನು ಸತತ 34 ವರ್ಷಗಳ ಕಾಲ (1977 ರಿಂದ 2011) ಯಾವುದೇ ಅಡೆತಡೆಯಿಲ್ಲದೆ ಆಳಿದ ಇತಿಹಾಸ ಕಮ್ಯುನಿಸ್ಟ್ ಪಕ್ಷಕ್ಕಿದೆ. ಕಳೆದು ಹೋದ 15 ವರ್ಷಗಳ ಟಿಎಂಸಿ ಆಡಳಿತದಲ್ಲಿ ಎಡಪಂಥೀಯರು ಸಂಪೂರ್ಣವಾಗಿ ಧೂಳೀಪಟವಾಗಿದ್ದರು. ಆದರೆ, ಮೇ 4 ರ ಫಲಿತಾಂಶದ ನಂತರ ಬಂಗಾಳದ ಮೂಲೆ ಮೂಲೆಗಳಲ್ಲಿ ಕಮ್ಯುನಿಸ್ಟ್ ಬಾವುಟಗಳು ಮತ್ತೆ ರಾರಾಜಿಸುತ್ತಿವೆ.

ದೋಮ್ಕಲ್‌ನಲ್ಲಿ ಐತಿಹಾಸಿಕ ಗೆಲುವು: 2016 ರ ನಂತರ ಇದೇ ಮೊದಲ ಬಾರಿಗೆ ಸಿಪಿಐ(ಎಂ) ದೋಮ್ಕಲ್ ವಿಧಾನಸಭಾ ಉಪಚುನಾವಣೆಯಲ್ಲಿ ಭರ್ಜರಿ ಜಯ ಸಾಧಿಸಿದೆ.

ಫಾಲ್ಟಾ ಚುನಾವಣೆಯಲ್ಲಿ ತೃತೀಯ ಸ್ಥಾನಕ್ಕೆ ತಳ್ಳಲ್ಪಟ್ಟ ಟಿಎಂಸಿ: ಇತ್ತೀಚೆಗೆ ನಡೆದ ಫಾಲ್ಟಾ ಮರುಚುನಾವಣೆಯಲ್ಲಿ ಸಿಪಿಐ(ಎಂ) ಅಭ್ಯರ್ಥಿ ಬರೋಬ್ಬರಿ 40,000 ಕ್ಕೂ ಹೆಚ್ಚು ಮತಗಳನ್ನು ಪಡೆದು ಎರಡನೇ ಸ್ಥಾನಕ್ಕೆ ಬಂದರೆ, ಮಮತಾ ಅವರ ಟಿಎಂಸಿ ಅಭ್ಯರ್ಥಿ ಜಹಾಂಗೀರ್ ಖಾನ್ ಮೂರನೇ ಸ್ಥಾನಕ್ಕೆ ತಳ್ಳಲ್ಪಟ್ಟು ಮುಖಭಂಗ ಅನುಭವಿಸಿದ್ದಾರೆ.

ರಸ್ತೆಗಿಳಿದ ಕೇಡರ್ ಪಡೆ: ಎಡಪಂಥೀಯರ ಅಂಗಸಂಸ್ಥೆಗಳಾದ ಸಿಐಟಿಯು (CITU) ಮತ್ತು ಶಿಕ್ಷಕರ ಸಂಘಟನೆಗಳು (ABTA) ಬಂಗಾಳದ ಬೀದಿ ಬೀದಿಗಳಲ್ಲಿ ರೈಲ್ವೆ ನಿಲ್ದಾಣದ ಫೆರಿವಾಲರ ಪರವಾಗಿ ಭಾರಿ ಪ್ರತಿಭಟನೆಗಳನ್ನು ನಡೆಸುತ್ತಿವೆ. ವರ್ಷಗಳಿಂದ ಮುಚ್ಚಿದ್ದ ಕಮ್ಯುನಿಸ್ಟ್ ಆಫೀಸ್‌ಗಳು ಈಗ ದಿನದ 24 ಗಂಟೆಯೂ ಓಪನ್ ಆಗುತ್ತಿವೆ.

ಹಿರಿಯ ಪತ್ರಕರ್ತ ಸಾಯಂತನ್ ಘೋಷ್ ಅವರ ಪ್ರಕಾರ, ಮಹಾರಾಷ್ಟ್ರದಲ್ಲಿ ಶಿವಸೇನೆಯನ್ನು ಒಡೆದು ಏಕನಾಥ್ ಶಿಂದೆಯವರನ್ನು ತಲೆಯ ಮೇಲೆ ಕೂರಿಸಿಕೊಂಡಂತೆ ಬಿಜೆಪಿ ಇಲ್ಲಿ ಮಾಡಲು ಬಯಸುತ್ತಿಲ್ಲ. ಇದೊಂದು ಸಂಪೂರ್ಣ ಹೊಸ ರಾಜಕೀಯ ಮಾಡೆಲ್ ಆಗಿದೆ. ಇಲ್ಲಿ ಟಿಎಂಸಿ ಪಕ್ಷವು ಸಾಯಬಾರದು, ಆದರೆ ಅತ್ಯಂತ ದುರ್ಬಲವಾಗಿ ಬದುಕಿರಬೇಕು. ದುರ್ಬಲವಾದ ಟಿಎಂಸಿ ಬಂಗಾಳದಲ್ಲಿ ವಿಪಕ್ಷದ ಜಾಗವನ್ನು ಆಕ್ರಮಿಸಿಕೊಂಡಿದ್ದರೆ, ಅಲ್ಲಿ ಹೊಸದಾಗಿ ಯಾವುದೇ ಬಲಿಷ್ಠ ಎಡಪಂಥೀಯ ಶಕ್ತಿ ತಲೆ ಎತ್ತಲು ಸಾಧ್ಯವಾಗುವುದಿಲ್ಲ.

ಬಿಜೆಪಿ ಸಂಸದ ಸೌಮಿತ್ರಾ ಖಾನ್ ಇತ್ತೀಚೆಗೆ ಬಹಿರಂಗವಾಗಿಯೇ ಹೇಳಿಕೆ ನೀಡಿದ್ದರು. ದೆಹಲಿಯ ನಮ್ಮ ಹಿರಿಯ ನಾಯಕರು ಒಮ್ಮೆ ಹಸಿರು ನಿಶಾನೆ ತೋರಿದರೆ ಸಾಕು, ಟಿಎಂಸಿಯ 50 ಕ್ಕೂ ಹೆಚ್ಚು ಶಾಸಕರು ಮತ್ತು 20 ಸಂಸದರು ನಾಳೆಯೇ ಬಿಜೆಪಿಗೆ ಬರಲು ಸಿದ್ಧರಿದ್ದಾರೆ. ಮಮತಾ ಪಕ್ಷ ಇತಿಹಾಸದಿಂದಲೇ ನಾಶವಾಗುತ್ತದೆ. ಆದರೆ, ಬಂಗಾಳದ ಬಿಜೆಪಿ ರಾಜ್ಯಾಧ್ಯಕ್ಷ ಸಮೀಕ್ ಭಟ್ಟಾಚಾರ್ಯ ಅವರು ಸದ್ಯಕ್ಕೆ ಟಿಎಂಸಿ ನಾಯಕರಿಗೆ ಬಿಜೆಪಿಯ ಬಾಗಿಲು ಸಂಪೂರ್ಣ ಮುಚ್ಚಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. ಪಕ್ಷದೊಳಗೆ ತೃಣಮೂಲ ನಾಯಕರನ್ನು ತುಂಬಿಕೊಂಡರೆ ಬಿಜೆಪಿಯ ಅಸ್ತಿತ್ವವೇ ಹಾಳಾಗುತ್ತದೆ ಎಂಬುದು ಅವರ ಅಧಿಕೃತ ವಾದವಾದರೂ, ತೆರೆಮರೆಯ ಅಸಲಿ ಕಥೆಯೇ ಬೇರೆಯಾಗಿದೆ.

ರಾಜಕೀಯ ವಿಶ್ಲೇಷಕ ಸ್ನಿಗ್ಧೇಂದು ಭಟ್ಟಾಚಾರ್ಯ ಅವರ ಪ್ರಕಾರ, 2024 ರ ಒಡಿಶಾ ಚುನಾವಣೆಯಲ್ಲಿ ನವೀನ್ ಪಟ್ನಾಯಕ್ ಅವರ ಬಿಜೆಡಿ ಪಕ್ಷ ಸೋತಾಗಲೂ ಆ ಪಕ್ಷದೊಳಗೆ ಭಾರಿ ಬಿರುಕು ಮೂಡಿತ್ತು. ನವೀನ್ ಪಟ್ನಾಯಕ್ ಮತ್ತು ವಿಕೆ ಪಾಂಡಿಯನ್ ನಡುವಿನ ಬಿಕ್ಕಟ್ಟನ್ನು ಬಳಸಿ ಬಿಜೆಪಿ ಆ ಪಕ್ಷವನ್ನು ಸುಲಭವಾಗಿ ಒಡೆಯಬಹುದಿತ್ತು. ಆದರೆ, ಬಿಜೆಪಿ ಹಾಗೆ ಮಾಡಲಿಲ್ಲ. ಏಕೆಂದರೆ ಒಡಿಶಾದಲ್ಲಿ ಬಿಜೆಡಿ ಒಡೆದರೆ ಅಲ್ಲಿ ಕಾಂಗ್ರೆಸ್ ಮತ್ತೆ ಬಲಿಷ್ಠವಾಗುತ್ತದೆ ಎಂಬ ಭಯ ಬಿಜೆಪಿಗೆ ಇತ್ತು. ಅದೇ ಒಡಿಶಾ ಮಾದರಿಯನ್ನು ಈಗ ಬಂಗಾಳದಲ್ಲೂ ಬಿಜೆಪಿ ಅಳವಡಿಸಿಕೊಳ್ಳುತ್ತಿದೆ. ಟಿಎಂಸಿಯನ್ನು ಬದುಕಿಸಿಟ್ಟುಕೊಂಡು ಕಾಂಗ್ರೆಸ್ ಮತ್ತು ಕಮ್ಯುನಿಸ್ಟರನ್ನು ಬಂಗಾಳದ ಗಡಿಯಿಂದ ದೂರವಿಡುವುದು ಇದರ ಮುಖ್ಯ ಉದ್ದೇಶವಾಗಿದೆ.

ಕೊನೆಯದಾಗಿ ಹೇಳುವುದಾದರೆ, ಕಮ್ಯುನಿಸ್ಟ್ ಪಕ್ಷವು ಬಂಗಾಳದಲ್ಲಿ ಮರಳಿ ಅಧಿಕಾರಕ್ಕೆ ಬರಬೇಕಾದರೆ ಅವರು ಕೇವಲ ಟಿಎಂಸಿ ಪಕ್ಷವನ್ನು ಬೈಯುವುದನ್ನು ಬಿಟ್ಟು, ನೇರವಾಗಿ ಬಿಜೆಪಿಯ ನೀತಿಗಳ ವಿರುದ್ಧ ಹೋರಾಡಬೇಕಾಗುತ್ತದೆ. ಟಿಎಂಸಿ ಮತದಾರರನ್ನು ಕೆಂಪು ಪಾಳಯದತ್ತ ಸೆಳೆಯಬೇಕಾಗುತ್ತದೆ. ಒಂದು ವೇಳೆ ಎಡರಂಗ ಈ ಕೆಲಸದಲ್ಲಿ ಯಶಸ್ವಿಯಾದರೆ, ಮುಂದಿನ ದಿನಗಳಲ್ಲಿ ಬಂಗಾಳದ ರಾಜಕಾರಣವು ಬಿಜೆಪಿ ವರ್ಸಸ್ ಸಿಪಿಐ(ಎಂ) ಆಗಿ ಬದಲಾಗುವುದರಲ್ಲಿ ಯಾವುದೇ ಸಂಶಯವಿಲ್ಲ. ಆ ದಿನಗಳು ಬರದಂತೆ ತಡೆಯಲು ಸದ್ಯಕ್ಕೆ ಮಮತಾ ಬ್ಯಾನರ್ಜಿಯವರ ಟಿಎಂಸಿ ಬದುಕಿರುವುದು ಶತ್ರು ಬಿಜೆಪಿಗೆ ಅತ್ಯಂತ ಅನಿವಾರ್ಯವಾಗಿದೆ,(ಏಜೆನ್ಸೀಸ್).