2 ವರ್ಷ ಹಾಸಿಗೆ ಹಿಡಿದಿದ್ದ ವ್ಯಕ್ತಿ ಈಗ ಗಿನ್ನಿಸ್ ವಿಶ್ವ ವಿಜೇತ: 27 ಕೆಜಿ ತೂಕ ಹೊತ್ತು ಇತಿಹಾಸ ಬರೆದ ಭಾರತದ ಪುಷ್-ಅಪ್ ಮ್ಯಾನ್! Rohtash Chaudhary

ದೆಹಲಿಯ ಜವಾಹರ್‌ಲಾಲ್ ನೆಹರೂ ಕ್ರೀಡಾಂಗಣದಲ್ಲಿ ನಡೆದ ಈ ಐತಿಹಾಸಿಕ ಕ್ಷಣಕ್ಕೆ ಕ್ರೀಡಾಭಿಮಾನಿಗಳು ಸಾಕ್ಷಿಯಾದರು. 2023ರಲ್ಲಿ ಸಿರಿಯಾದ ಸಾಮಿ ಜೋಮಾ ಹಸನ್ ಹೆಸರಿನಲ್ಲಿದ್ದ ವಿಶ್ವ ದಾಖಲೆಯನ್ನು ರೋಹ್ತಾಶ್ ಮುರಿದಿದ್ದಾರೆ. ಆದಾಗ್ಯೂ, ಗಿನ್ನಿಸ್ ವರ್ಲ್ಡ್ ರೆಕಾರ್ಡ್ಸ್‌ನ ಅಧಿಕೃತ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಳ್ಳಲಾದ ವೀಡಿಯೊದಲ್ಲಿ, ರೋಹ್ತಾಶ್​ ತೂಕದ ಬ್ಯಾಗ್​ ಧರಿಸಿ ಅತ್ಯಂತ ನಿಖರತೆ ಹಾಗೂ ಶಿಸ್ತಿನಿಂದ ಪುಷ್​​-ಅಪ್ಸ್ ಮಾಡುತ್ತಿರುವುದು ಮತ್ತು ಅಧಿಕಾರಿಗಳು ಅದನ್ನು ಎಣಿಕೆ ಮಾಡುತ್ತಿರುವುದನ್ನು ಕಾಣಬಹುದಾಗಿದೆ.

ಕೇಂದ್ರ ಯುವ ವ್ಯವಹಾರಗಳು ಮತ್ತು ಕ್ರೀಡಾ ಸಚಿವ ಮನ್ಸುಖ್ ಮಾಂಡವಿಯಾ ಹಾಗೂ ಗಿನ್ನಿಸ್ ತೀರ್ಪುಗಾರ್ತಿ ಐನಿ ತೂರಾಬಲ್ಲಿ ಅವರು ಸ್ವತಃ ಈ ಸಾಧನೆಯನ್ನು ವೀಕ್ಷಿಸಿದ್ದು, ರೋಹ್ತಶ್​ ಅವರಿಗೆ ಅಧಿಕೃತ ಗಿನ್ನಿಸ್​ ದಾಖಲೆಯ ಪ್ರಮಾಣಪತ್ರವನ್ನು ಹಸ್ತಾಂತರಿಸಿದರು.

ಈ ಸಾಧನೆಯ ಹಿನ್ನೆಲೆಯಲ್ಲಿ ರೋಹ್ತಾಶ್ ದಿನನಿತ್ಯ ಅತ್ಯಂತ ಶಿಸ್ತಿನ ದಿನಚರಿಯನ್ನು ಪಾಲಿಸುತ್ತಿದ್ದರು. ಪ್ರತಿದಿನ ಬೆಳಿಗ್ಗೆ ತೂಕದ ಬ್ಯಾಗ್‌ನೊಂದಿಗೆ ಹಲವು ಸೆಟ್‌ಗಳ ಪುಷ್-ಅಪ್ಸ್ ಅಭ್ಯಾಸ, ಹೆಚ್ಚಿನ ಪ್ರೋಟೀನ್ ಹೊಂದಿರುವ ಆಹಾರ ಸೇವನೆ ಮತ್ತು ಮಾನಸಿಕ ದೃಢತೆಯ ತರಬೇತಿಯನ್ನು ಅವರು ಪಡೆಯುತ್ತಿದ್ದರು.

ದಾಖಲೆಗಳು ಕೇವಲ ಮುರಿಯಲು ಮಾತ್ರವಲ್ಲ; ಮಾನವನ ಸಾಮರ್ಥ್ಯಕ್ಕೆ ಯಾವುದೇ ಮಿತಿಗಳಿಲ್ಲ ಎಂಬುದನ್ನು ನೆನಪಿಸಲು ಇರುತ್ತವೆ. ನಿಮ್ಮ ಮೇಲೆ ನಿಮಗೆ ನಂಬಿಕೆಯಿದ್ದು, ಸತತ ಪ್ರಯತ್ನವಿದ್ದರೆ ಅಸಾಧ್ಯವಾದದ್ದನ್ನೂ ಸಾಧಿಸಬಹುದು ಎಂದು ರೋಹ್ತಾಶ್ ಹೇಳಿದರು.

ರೋಹ್ತಾಶ್ ಅವರ ಈ ಯಶಸ್ಸಿನ ಹಿಂದೆ ದುಃಖದ ಕಥೆಗಳಿವೆ. ಕೆಲವು ವರ್ಷಗಳ ಹಿಂದೆ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ತೀವ್ರವಾಗಿ ಗಾಯಗೊಂಡಿದ್ದು, ಸುಮಾರು ಎರಡು ವರ್ಷಗಳ ಕಾಲ ಸಂಪೂರ್ಣವಾಗಿ ಹಾಸಿಗೆ ಹಿಡಿದಿದ್ದರು. ಅವರ ದೇಹವು ಚಲಿಸಲು ಸಾಧ್ಯವಾಗದ ಸ್ಥಿತಿಯಲ್ಲಿದ್ದರೂ ಸೋಲೊಪ್ಪಿಕೊಳ್ಳದ ಅವರು, ನಿರಂತರ ಚಿಕಿತ್ಸೆ ಮತ್ತು ಹಠದ ತರಬೇತಿಯಿಂದ ಚೇತರಿಸಿಕೊಂಡು ದಾಖಲೆಗಳನ್ನು ಬರೆಯಲು ಪ್ರಾರಂಭಿಸಿದರು.

ಈ ವರ್ಷ ಅವರು ನಿರಂತರವಾಗಿ ದಾಖಲೆ ಮುರಿಯಲು ಪ್ರಾರಂಭಿಸಿ 10 ವರ್ಷಗಳು ಪೂರೈಸಿವೆ. ಪ್ರಸ್ತುತ ಭಾರತ ಸರ್ಕಾರದ 'ಫಿಟ್ ಇಂಡಿಯಾ ಮೂವ್‌ಮೆಂಟ್'ನ ರಾಯಭಾರಿಯಾಗಿರುವ ರೋಹ್ತಾಶ್, ಯುವ ಪೀಳಿಗೆಯಲ್ಲಿ ದೈಹಿಕ ಆರೋಗ್ಯ ಮತ್ತು ಫಿಟ್‌ನೆಸ್ ಜಾಗೃತಿ ಮೂಡಿಸುವ ಮಹತ್ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದಾರೆ (ಏಜೆನ್ಸೀಸ್​).