ಪೊಲೀಸ್ ವ್ಯಾನ್ ತಡೆದ ಸುಂದರಿಗೆ ಸಂಕಷ್ಟ: ಟ್ರೋಲಿಂಗ್‌ಗೆ ಬೇಸತ್ತು ಸೈಬರ್ ಪೊಲೀಸರ ಮೊರೆ ಹೋದ ರಿಯಾ ಅಹಿರ್​​! Riya Ahir

ಮುಂಬೈ: ಕಳೆದ ಕೆಲ ದಿನಗಳಿಂದ ದೇಶಾದ್ಯಂತ ನೀಟ್​ ಪರೀಕ್ಷೆಯಲ್ಲಾದ ಅಕ್ರಮವನ್ನು ವಿರೋಧಿಸಿ ಪ್ರತಿಭಟನೆಯನ್ನು ನಡೆಸಲಾಗಿತ್ತು. ಅದೇ ರೀತಿ ಮುಂಬೈನಲ್ಲಿ ಈ ಹೋರಾಟ ನಡೆದ ಸಂದರ್ಭದಲ್ಲಿ ರಿಯಾ ಅಹಿರ್ (Riya Ahir)​ ಎಂಬ ಯುವತಿ ಪೊಲೀಸ್​ ವ್ಯಾನ್​ನನ್ನು ತಡೆದು ನೀಡಿದ್ದ ಪೋಸ್​ ಸೋಷಿಯಲ್​ ಮೀಡಿಯಾನಲ್ಲಿ ಸಕ್ಕತ್​ ವೈರಲ್​ ಆಗಿತ್ತು .

ಆದರೆ, ಈ ಹೋರಾಟದ ನಂತರ, ನನಗೆ ಜೀವ ಬೆದರಿಕೆ, ಅಶ್ಲೀಲ ಸಂದೇಶಗಳು ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಟ್ರೋಲಿಂಗ್​ಗೆ ಗುರಿ ಮಾಡಲಾಗುತ್ತಿದೆ ಎಂದು ರಿಯಾ, ಸೈಬರ್​ ಠಾಣೆಗೆ ದೂರನ್ನು ನೀಡಿರುವುದು ತಿಳಿದು ಬಂದಿದೆ.

ಜುಲೈ 22 ರಂದು ಮುಂಬೈನ ಶಿವಾಜಿ ಪಾರ್ಕ್​ನಲ್ಲಿ ನಡೆದ ಪ್ರತಿಭಟನೆ ಸಮಯದಲ್ಲಿ ಪೊಲೀಸರು ವಿದ್ಯಾರ್ಥಿಗಳನ್ನು ಪೊಲೀಸ್​ ವ್ಯಾನ್​ನಲ್ಲಿ ತುಂಬಿಕೊಂಡು ಹೋಗುತ್ತಿದ್ದ ಸಮಯದಲ್ಲಿ ರಸ್ತೆಯಲ್ಲಿ ವಾಹನಕ್ಕೆ ಅಡ್ಡ ನಿಂತ ರಿಯಾ, ವ್ಯಾನ್​ನಲ್ಲಿದ್ದ ವಿದ್ಯಾರ್ಥಿಗಳು ಪಾರಾಗುವಂತೆ ಮಾಡಿದ್ದಳು.

ಕಳೆದ ಕೆಲ ದಿನಗಳಿಂದ ನನ್ನ ಫೋಟೊವನ್ನು ಬಳಿಸಿಕೊಂಡು ನಿರಂತರ ಟ್ರೋಲ್​ ಹಾಗೂ ಆನ್​ಲೈನ್​ ಬುಲ್ಲಿಂಗ್​ ಮಾಡುತ್ತಿದ್ದಾರೆ. ಇದು ನನಗೆ ಮಾನಸಿಕ ಹಿಂಸೆ, ಕಿರುಕುಳ ನೀಡಿದಂತಾಗುತ್ತಿದೆ. ಹಾಗೆಯೇ ಇದರಿಂದ ನನ್ನ ತಂದೆ-ತಾಯಿ ಕೂಡ ಕಷ್ಟ ಎದುರಿಸುವಂತಾಗಿದೆ ಎಂದು ರಿಯಾ ಅಹಿರ್​ ಹೇಳಿದ್ದಾರೆ.

ರಿಯಾ ಅಹಿರ್​ ನೀಡಿರುವ ದೂರನ್ನು ಮುಂಬೈ ಸೈಬರ್​ ಸೆಲ್​ ಪೊಲೀಸರು ಸ್ವೀಕರಿಸಿದ್ದು, ಕಾನೂನಾತ್ಮಕವಾಗಿ ಏನು ಮಾಡಬಹುದೋ ಅದನ್ನು ನಾವು ಮಾಡುತ್ತೇವೆ ಎಂದಿದ್ದಾರೆ.