ಆಂಧ್ರ ಹುಡುಗನನ್ನು ವರಿಸಿದ ಜರ್ಮನ್​ ಯುವತಿ: ಹಿಂದೂ ಸಂಪ್ರದಾಯದಂತೆ ನಡೆಯಿತು ಅದ್ಧೂರಿ ಮದುವೆ! Andhra Boy German Girl Wedding

Andhra Boy German Girl Wedding : ಪ್ರೀತಿಗೆ ಯಾವುದೇ ಗಡಿಗಳಿಲ್ಲ, ಅದು ಜಾತಿ, ಧರ್ಮ, ದೇಶ, ಭಾಷೆ ಎಲ್ಲವನ್ನೂ ಮೀರಿದ್ದು ಎಂಬುದನ್ನು ಸಾಬೀತುಪಡಿಸುತ್ತಾ, ಆಂಧ್ರಪ್ರದೇಶದ ಪಲ್ನಾಡು ಜಿಲ್ಲೆಯ ನಕರಿಕಲ್ಲು ಮಂಡಲದ ದೀಚಾವರಂ ಗ್ರಾಮದ ಯಂಪಾಟಿ ವೆಂಕಟೇಶ್ವರಲು ಎಂಬ ಯುವಕ ಹಾಗೂ ಜರ್ಮನಿಯಲ್ಲಿ ನೆಲೆಸಿದ್ದ ರಷ್ಯನ್ ಮೂಲದ ಪಾಲಿನಾ ಎಂಬ ಯುವತಿ ಹಿಂದೂ ಮತ್ತು ಕ್ರಿಶ್ಚಿಯನ್ ಸಂಪ್ರದಾಯಗಳಂತೆ ವಿವಾಹವಾಗಿದ್ದಾರೆ.

ಯಂಪಾಟಿ ಶ್ರೀನಿವಾಸರಾವ್ ಮತ್ತು ಬಂಗಾರಮ್ಮ ದಂಪತಿಯ ಪುತ್ರನಾದ ವೆಂಕಟೇಶ್ವರಲು, ಕೆಲವು ವರ್ಷಗಳ ಹಿಂದೆ ಉನ್ನತ ವ್ಯಾಸಂಗಕ್ಕಾಗಿ ಜರ್ಮನಿಗೆ ತೆರಳಿದ್ದರು. ಅದೇ ಸಮಯದಲ್ಲಿ ರಷ್ಯನ್ ಮೂಲದ ಪಾಲಿನಾ ಎಂಬ ಯುವತಿಯ ಕುಟುಂಬವೂ ಜರ್ಮನಿಗೆ ಬಂದು ಅಲ್ಲಿಯೇ ನೆಲೆಸಿತ್ತು. ಕಾಕತಾಳೀಯ ಎಂಬಂತೆ, ವೆಂಕಟೇಶ್ವರಲು ಓದುತ್ತಿದ್ದ ಅದೇ ಕಾಲೇಜಿಗೆ ಪಾಲಿನಾ ಕೂಡ ಸೇರಿಕೊಂಡರು. ಅಲ್ಲಿ ಇಬ್ಬರ ನಡುವೆ ಪರಿಚಯವಾಗಿ, ಆ ಸ್ನೇಹವು ಕ್ರಮೇಣ ಗಾಢವಾದ ಪ್ರೀತಿಯಾಗಿ ಬದಲಾಯಿತು.

ಉನ್ನತ ಶಿಕ್ಷಣವನ್ನು ಯಶಸ್ವಿಯಾಗಿ ಮುಗಿಸಿದ ನಂತರ, ವೆಂಕಟೇಶ್ವರಲು ಅವರಿಗೆ ವಿಶ್ವಪ್ರಸಿದ್ಧ ಆ್ಯಪಲ್ ಸಂಸ್ಥೆಯಲ್ಲಿ ಉದ್ಯೋಗ ಲಭಿಸಿತು. ಪಾಲಿನಾ ಕೂಡ ತಮ್ಮ ವಿದ್ಯಾಭ್ಯಾಸ ಮುಗಿಸಿ ಕೆಲಸಕ್ಕೆ ಸೇರಿಕೊಂಡರು. ಇಬ್ಬರೂ ಆರ್ಥಿಕವಾಗಿ ಸ್ಥಿರರಾದ ಬಳಿಕ ತಮ್ಮ ಪ್ರೀತಿಯನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯಲು ನಿರ್ಧರಿಸಿ, ಮದುವೆಯಾಗಲು ತೀರ್ಮಾನಿಸಿದರು.

ತಮ್ಮ ಮದುವೆಯ ನಿರ್ಧಾರವನ್ನು ಇಬ್ಬರೂ ತಮ್ಮ ಪೋಷಕರಿಗೆ ತಿಳಿಸಿದರು. ವೆಂಕಟೇಶ್ವರಲು ಅವರ ಗುಣವನ್ನು ಮೆಚ್ಚಿದ ಪಾಲಿನಾ ಪೋಷಕರಾದ ಸಾರ್ಗೆಜೋರಿಸ್ ಮತ್ತು ಎಲೆನಾ ಜೊರಿನಾ ಈ ವಿವಾಹಕ್ಕೆ ಸಂತೋಷದಿಂದ ಒಪ್ಪಿಗೆ ನೀಡಿದರು. ಅದರಂತೆ, ಪಲ್ನಾಡು ಜಿಲ್ಲೆಯ ನರಸರಾವ್ ಪೇಟೆಯ 'ಎ1 ಕನ್ವೆನ್ಷನ್ ಹಾಲ್'ನಲ್ಲಿ ಶುಕ್ರವಾರದಂದು ಇವರ ವಿವಾಹ ಮಹೋತ್ಸವವು ಅತ್ಯಂತ ವೈಭವದಿಂದ ಜರುಗಿತು. ಈ ಅಪೂರ್ವ ಕ್ಷಣಕ್ಕೆ ಸಾಕ್ಷಿಯಾಗಲು ರಷ್ಯಾ ಮತ್ತು ಜರ್ಮನಿಯಿಂದ ವಧುವಿನ ಆಪ್ತರು ಹಾಗೂ ಸಂಬಂಧಿಕರು ಭಾರತಕ್ಕೆ ಆಗಮಿಸಿದ್ದರು.

ಎಲ್ಲರ ಸಮ್ಮುಖದಲ್ಲಿ ಈ ಜೋಡಿಯು ಹಿಂದೂ ಹಾಗೂ ಕ್ರಿಶ್ಚಿಯನ್ ಉಭಯ ಸಂಪ್ರದಾಯಗಳ ಪ್ರಕಾರ ಮದುವೆಯ ಬಂಧನಕ್ಕೆ ಒಳಗಾಯಿತು. ವಿದೇಶದಿಂದ ಬಂದ ಅತಿಥಿಗಳಿಗಾಗಿ ವಿಶೇಷವಾಗಿ ಆಂಧ್ರದ ಸಾಂಪ್ರದಾಯಿಕ ಶೈಲಿಯ ಖಾದ್ಯಗಳನ್ನು ಸಿದ್ಧಪಡಿಸಲಾಗಿತ್ತು, ಇಲ್ಲಿನ ಭೋಜನ ಸವಿದು ವಿದೇಶಿ ಅತಿಥಿಗಳು ಮನಸಾರೆ ಆನಂದಿಸಿದರು.

ಇತ್ತೀಚಿನ ದಿನಗಳಲ್ಲಿ ಆಂಧ್ರದ ಯುವಕ-ಯುವತಿಯರು ವಿದೇಶಿಯರನ್ನು ವರಿಸುವುದು ಹೆಚ್ಚಾಗುತ್ತಿದ್ದು, ವಿದೇಶಿಗರು ಇಲ್ಲಿಗೆ ಬಂದು ನಮ್ಮ ಹಿಂದೂ ಸಂಪ್ರದಾಯ ಮತ್ತು ಸ್ಥಳೀಯ ಆಚಾರ-ವಿಚಾರಗಳನ್ನು ಗೌರವಿಸಿ ಮದುವೆಯಾಗುತ್ತಿರುವುದು ನಿಜಕ್ಕೂ ಹೆಮ್ಮೆಯ ಸಂಗತಿಯಾಗಿದೆ, (ಏಜೆನ್ಸೀಸ್​).