3ನೇ ಮದುವೆಗೆ ಸಜ್ಜಾದ ಆಮಿರ್ ಖಾನ್: ಜುಲೈ 5ಕ್ಕೆ ಗೌರಿ ಸ್ಪ್ರ್ಯಾಟ್ ಜತೆ ವಿವಾಹ!
ಮುಂಬೈ: ಬಾಲಿವುಡ್ನ ಮಿಸ್ಟರ್ ಪರ್ಫೆಕ್ಷನಿಸ್ಟ್ ಆಮಿರ್ ಖಾನ್ ಅವರ ವೈಯಕ್ತಿಕ ಜೀವನದ ಬಗ್ಗೆ ಹರಿದಾಡುತ್ತಿದ್ದ ಸುದ್ದಿಗೆ ಈಗ ದೊಡ್ಡದೊಂದು ಬ್ರೇಕ್ ಸಿಕ್ಕಿದೆ. ಮಾಧ್ಯಮ ಸಂಸ್ಥೆ ಹೌಟರ್ಫ್ಲೈ ಪ್ರಕಟಿಸಿರುವ ವರದಿಯ ಪ್ರಕಾರ, ಆಮಿರ್ ಮತ್ತು ಗೌರಿ ಸ್ಪ್ರ್ಯಾಟ್(Aamir Khan - Gauri Wedding) ಜುಲೈ 5 ರಂದು ಮುಂಬೈನಲ್ಲಿರುವ ಆಮಿರ್ ನಿವಾಸದಲ್ಲಿ ಸರಳವಾಗಿ ವಿವಾಹವಾಗಲಿದ್ದಾರೆ. ಯಾವುದೇ ಭವ್ಯವಾದ ಬಾಲಿವುಡ್ ಶೈಲಿಯ ಅದ್ದೂರಿ ಆಚರಣೆಗಳಿಲ್ಲದೆ, ಕೇವಲ ಕುಟುಂಬದ ಸದಸ್ಯರು ಮತ್ತು ತೀರಾ ಆಪ್ತ ಸ್ನೇಹಿತರ ಸಮ್ಮುಖದಲ್ಲಿ ಕೇವಲ ಸಹಿ ಹಾಕುವ ಮೂಲಕ ಇಬ್ಬರೂ ದಾಂಪತ್ಯ ಜೀವನಕ್ಕೆ ಕಾಲಿಡಲಿದ್ದಾರೆ ಎಂದು ವರದಿಯಾಗಿದೆ.
ಕಳೆದ ಒಂದು ವರ್ಷದಿಂದ ಇವರಿಬ್ಬರೂ ಜೊತೆಯಾಗಿ ವಾಸಿಸುತ್ತಿದ್ದು, ಸದ್ಯ ಒಂದು ಸುಸ್ಥಿರ ಹಾಗೂ ಸಂತೋಷದ ಜೀವನವನ್ನು ನಡೆಸುತ್ತಿದ್ದಾರೆ. ಈ ಬಾಂಧವ್ಯವನ್ನು ಅಧಿಕೃತಗೊಳಿಸಲು ಉಭಯ ಕುಟುಂಬಗಳ ಒಪ್ಪಿಗೆಯೊಂದಿಗೆ ಈ ನಿರ್ಧಾರಕ್ಕೆ ಬರಲಾಗಿದೆ ಎಂದು ದಂಪತಿಗಳ ಆಪ್ತ ಮೂಲಗಳು ತಿಳಿಸಿವೆ.
60ನೇ ವರ್ಷದ ಹುಟ್ಟುಹಬ್ಬದಂದು ಬಹಿರಂಗವಾಗಿದ್ದ ಪ್ರೀತಿ!
ಆಮಿರ್ ಖಾನ್ ಸಾಮಾನ್ಯವಾಗಿ ತಮ್ಮ ವೈಯಕ್ತಿಕ ಜೀವನವನ್ನು ಮಾಧ್ಯಮಗಳ ಕಣ್ಣಿನಿಂದ ದೂರ ಇಡಲು ಬಯಸುತ್ತಾರೆ. ಆದರೆ, ಕಳೆದ ವರ್ಷ ಮಾರ್ಚ್ನಲ್ಲಿ ನಡೆದ ತಮ್ಮ 60ನೇ ವರ್ಷದ ಹುಟ್ಟುಹಬ್ಬದ ಪೂರ್ವಭಾವಿ ಕಾರ್ಯಕ್ರಮದಲ್ಲಿ ಅವರು ಮೊದಲ ಬಾರಿಗೆ ಗೌರಿ ಸ್ಪ್ರ್ಯಾಟ್ ಅವರನ್ನು ಮಾಧ್ಯಮಗಳಿಗೆ ತಮ್ಮ ಜೀವನ ಸಂಗಾತಿ ಎಂದು ಪರಿಚಯಿಸಿದ್ದರು. ಆ ಮೂಲಕ ಇವರಿಬ್ಬರ ಸಂಬಂಧದ ಸುದ್ದಿ ಅಧಿಕೃತವಾಗಿ ಹೊರಬಿದ್ದಿತ್ತು.
ಇತ್ತೀಚಿನ ಸಂದರ್ಶನವೊಂದರಲ್ಲಿ ತಮ್ಮ ಸಂಬಂಧದ ಆಳದ ಬಗ್ಗೆ ಮಾತನಾಡಿದ್ದ ಆಮಿರ್, ಗೌರಿ ಮತ್ತು ನಾನು ಪರಸ್ಪರ ತುಂಬಾ ಗಂಭೀರವಾಗಿದ್ದೇವೆ ಮತ್ತು ಬದ್ಧತೆಯುಳ್ಳ ಜಾಗದಲ್ಲಿದ್ದೇವೆ. ನನ್ನ ಮನಸ್ಸಿನಲ್ಲಿ ನಾನು ಈಗಾಗಲೇ ಅವಳನ್ನು ಮದುವೆಯಾಗಿದ್ದೇನೆ. ಅದನ್ನು ಅಧಿಕೃತವಾಗಿ ಮಾಡಬೇಕೇ ಬೇಡವೇ ಎಂಬುದನ್ನು ಸಮಯಕ್ಕೆ ಬಿಟ್ಟಿದ್ದೇವೆ ಎಂದು ಹೇಳಿದ್ದರು. ಆದರೆ ಈಗ ಕೊನೆಗೂ ಇಬ್ಬರೂ ಮದುವೆಯಾಗಲು ನಿರ್ಧರಿಸಿದ್ದಾರೆ.
ಆಮಿರ್ ಖಾನ್ ಮತ್ತು ಗೌರಿ ಸ್ಪ್ರ್ಯಾಟ್ ಹಿನ್ನೆಲೆ
ಇವರಿಬ್ಬರ ನಡುವೆ ಸುಮಾರು 14 ವರ್ಷಗಳ ವಯಸ್ಸಿನ ಅಂತರವಿದ್ದರೂ, ಇವರ ನಡುವಿನ ಬಾಂಡಿಂಗ್ ಅತ್ಯಂತ ಗಟ್ಟಿಯಾಗಿದೆ. ಕಳೆದ 25 ವರ್ಷಗಳಿಂದ ಇಬ್ಬರೂ ಪರಸ್ಪರ ಸ್ನೇಹಿತರಾಗಿದ್ದರು, ಆ ಸ್ನೇಹವೇ ನಂತರ ಪ್ರೀತಿಗೆ ತಿರುಗಿತು. ಗೌರಿ ಸ್ಪ್ರ್ಯಾಟ್ ಈ ಹಿಂದೆ 'ಆಮಿರ್ ಖಾನ್ ಪ್ರೊಡಕ್ಷನ್ಸ್' ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದರು. ವಿಶೇಷವೆಂದರೆ, ಗೌರಿ ಅವರು ಭಾರತದ ಸ್ವಾತಂತ್ರ್ಯ ಚಳವಳಿಯಲ್ಲಿ ಭಾಗವಹಿಸಿದ್ದ ಬ್ರಿಟಿಷ್ ಮೂಲದ ಕಮ್ಯುನಿಸ್ಟ್ ಫಿಲಿಪ್ ಸ್ಪ್ರ್ಯಾಟ್ ಅವರ ಮೊಮ್ಮಗಳಾಗಿದ್ದಾರೆ. ಗೌರಿ ಅವರಿಗೆ ಮೊದಲ ಮದುವೆಯಿಂದ ಕ್ವಿನ್ ಎಂಬ 7 ವರ್ಷದ ಮಗನಿದ್ದಾನೆ.
ಆಮಿರ್ ಖಾನ್ ಅವರ ಹಿಂದಿನ ವಿವಾಹಗಳು
ಗೌರಿ ಜೊತೆಗಿನ ವಿವಾಹವು ಆಮಿರ್ ಖಾನ್ ಅವರ ಜೀವನದ ಮೂರನೇ ಮದುವೆಯಾಗಲಿದೆ.
ರೀನಾ ದತ್ತಾ (1986 - 2002): ಆಮಿರ್ ಖಾನ್ ಮೊದಲು ರೀನಾ ದತ್ತಾ ಅವರನ್ನು ವಿವಾಹವಾಗಿದ್ದರು. ಈ ದಂಪತಿಗೆ ಜುನೈದ್ ಖಾನ್ ಮತ್ತು ಇರಾ ಖಾನ್ ಎಂಬ ಇಬ್ಬರು ಮಕ್ಕಳಿದ್ದಾರೆ. 16 ವರ್ಷಗಳ ದಾಂಪತ್ಯದ ನಂತರ 2002 ರಲ್ಲಿ ಇವರು ವಿಚ್ಛೇದನ ಪಡೆದರು.
ಕಿರಣ್ ರಾವ್ (2005 - 2021): ನಂತರ 2005 ರಲ್ಲಿ ಚಲನಚಿತ್ರ ನಿರ್ಮಾಪಕಿ ಕಿರಣ್ ರಾವ್ ಅವರನ್ನು ವಿವಾಹವಾದರು. ಇವರಿಗೆ ಆಜಾದ್ ರಾವ್ ಖಾನ್ ಎಂಬ ಮಗನಿದ್ದಾನೆ. 2021 ರಲ್ಲಿ ಇವರು ಸೌಹಾರ್ದಯುತವಾಗಿಯೇ ಬೇರ್ಪಡುವುದಾಗಿ ಘೋಷಿಸಿದರು.
ವಿಚ್ಛೇದನದ ನಂತರವೂ ಆಮಿರ್ ಖಾನ್ ತಮ್ಮ ಇಬ್ಬರೂ ಮಾಜಿ ಪತ್ನಿಯರೊಂದಿಗೆ ಉತ್ತಮ ಮತ್ತು ಗೌರವಾನ್ವಿತ ಸಂಬಂಧವನ್ನು ಕಾಯ್ದುಕೊಂಡಿದ್ದಾರೆ. ಕೌಟುಂಬಿಕ ಕಾರ್ಯಕ್ರಮಗಳಲ್ಲಿ ಇವರೆಲ್ಲರೂ ಒಟ್ಟಿಗೆ ಕಾಣಿಸಿಕೊಳ್ಳುತ್ತಾರೆ. ಸದ್ಯ ಜುಲೈ 5 ರಂದು ನಡೆಯಲಿರುವ ಈ ಪ್ರೈವೇಟ್ ವೆಡ್ಡಿಂಗ್ಗೆ ಬಾಲಿವುಡ್ ಸೂಪರ್ ಸ್ಟಾರ್ಗಳಾದ ಸಲ್ಮಾನ್ ಖಾನ್ ಮತ್ತು ಶಾಹರುಖ್ ಖಾನ್ ಕೂಡ ಹಾಜರಾಗುವ ಸಾಧ್ಯತೆ ಇದೆ ಎಂದು ವರದಿಯಾಗಿದೆ,(ಏಜೆನ್ಸೀಸ್).