ದಶಕಗಳ ಪಾಲುದಾರಿಕೆ ಬಲವರ್ಧನೆ ; ಈಗಾಗಲೇ 300 ಟ್ರಕ್ ಪೂರೈಕೆ : ವಿಆರ್​ಎಲ್ ಸಂಸ್ಥೆಯಿಂದ ಅಶೋಕ್ ಲೇಲ್ಯಾಂಡ್​ಗೆ 715 ವಾಹನ ಆರ್ಡರ್

ಅಶೋಕ್ ಲೇಲ್ಯಾಂಡ್ ಈ ಬಗ್ಗೆ ಸೋಮವಾರ ಪ್ರಕಟಣೆ ನೀಡಿ, ವಿಆರ್​ಎಲ್ ಲಾಜಿಸ್ಟಿಕ್ಸ್ ಸಂಸ್ಥೆಯೊಂದಿಗೆ ತನಗಿರುವ ದಶಕಗಳ ಸುದೀರ್ಘ ಪಾಲುದಾರಿಕೆಯನ್ನು ಮತ್ತಷ್ಟು ಬಲಪಡಿಸುವಲ್ಲಿ ಈ ಒಪ್ಪಂದ ಪ್ರಮುಖ ಮೈಲಿಗಲ್ಲಾಗಿದೆ ಎಂದು ತಿಳಿಸಿದೆ. ಒಪ್ಪಂದದ ಪ್ರಕಾರ ವಾಹನಗಳ ಪೂರೈಕೆ ಪ್ರಕ್ರಿಯೆ ಈಗಾಗಲೇ ಪ್ರಗತಿಯಲ್ಲಿದ್ದು, ಒಟ್ಟು ವಾಹನಗಳ ಪೈಕಿ 300 ಟ್ರಕ್​ಗಳನ್ನು ಈಗಾಗಲೇ ವಿಆರ್​ಎಲ್ ಸಂಸ್ಥೆಗೆ ಯಶಸ್ವಿಯಾಗಿ ಹಸ್ತಾಂತರಿಸಲಾಗಿದೆ. ಇನ್ನುಳಿದ 415 ವಾಹನಗಳನ್ನು ಪ್ರಸಕ್ತ ವರ್ಷದ ಒಳಗಾಗಿ ಪೂರೈಸಲು ವೇಳಾಪಟ್ಟಿ ಸಿದ್ಧಪಡಿಸಲಾಗಿದೆ ಎಂದು ವಿವರಿಸಿದೆ.

ಅಶೋಕ್ ಲೇಲ್ಯಾಂಡ್​ನ ಮೀಡಿಯಂ ಆಂಡ್ ಹೆವಿ ಕಮರ್ಷಿಯಲ್ ವೆಹಿಕಲ್ಸ್ (ಎಂಎಚ್​ಸಿವಿ) ವಿಭಾಗದ ರಾಷ್ಟ್ರೀಯ ಮಾರಾಟ ಮುಖ್ಯಸ್ಥೆ ಮಾಧವಿ ದೇಶ್​ವುುಖ್ ಪ್ರತಿಕ್ರಿಯಿಸಿದ್ದು, ‘ಲಾಜಿಸ್ಟಿಕ್ಸ್ ಉದ್ಯಮದಲ್ಲಿ ಗ್ರಾಹಕರ ಉದಯೋನ್ಮುಖ ಅಗತ್ಯಗಳಿಗೆ ತಕ್ಕಂತೆ ಹೊಸ ಉತ್ಪನ್ನಗಳು ಮತ್ತು ವೈಶಿಷ್ಟ್ಯಗಳನ್ನು ಅಭಿವೃದ್ಧಿಪಡಿಸುವಲ್ಲಿ ವಿಆರ್​ಎಲ್ ಸಂಸ್ಥೆ ಹಲವಾರು ವರ್ಷಗಳಿಂದ ನಮ್ಮೊಂದಿಗೆ ನಿಕಟವಾಗಿ ಕೆಲಸ ಮಾಡಿದೆ. ಈ ಬೃಹತ್ ಆರ್ಡರ್ ಲಭಿಸಿರುವುದು ಅಶೋಕ್ ಲೇಲ್ಯಾಂಡ್​ನ ತಂತ್ರಜ್ಞಾನ ಮತ್ತು ಕಾರ್ಯಕ್ಷಮತೆಯ ಮೇಲೆ ವಿಆರ್​ಎಲ್ ಲಾಜಿಸ್ಟಿಕ್ಸ್ ಇಟ್ಟಿರುವ ಅಚಲ ನಂಬಿಕೆಗೆ ಸಾಕ್ಷಿಯಾಗಿದೆ’ ಎಂದು ಹೇಳಿದ್ದಾರೆ.

ಈ ಹೊಸ ವಾಹನಗಳು ಅತ್ಯಾಧುನಿಕ ತಂತ್ರಜ್ಞಾನವನ್ನು ಹೊಂದಿದ್ದು, ಇವುಗಳ ನಿರ್ವಹಣಾ ವೆಚ್ಚ ಹಾಗೂ ರಿಪೇರಿ ಸಮಯ (ಡೌನ್​ಟೈಮ್ ಗಣನೀಯವಾಗಿ ಕಡಿಮೆ ಇರಲಿದೆ. ಇದು ಸಾರಿಗೆ ಸಂಸ್ಥೆಯ ಉತ್ಪಾದಕತೆಯನ್ನು ಹೆಚ್ಚಿಸುವುದಲ್ಲದೆ, ಕಾರ್ಯಾಚರಣೆಯ ಲಾಭದಾಯಕತೆಯನ್ನು ಉತ್ತಮ ಪಡಿಸಲು ಪೂರಕವಾಗಿ ವಿನ್ಯಾಸಗೊಳಿಸಲಾಗಿದೆ ಎಂದು ಅಶೋಕ್ ಲೇಲ್ಯಾಂಡ್ ತಿಳಿಸಿದೆ.