ಮಹಾರಾಷ್ಟ್ರ: ಮುಸ್ಲಿಂ ಕುಟುಂಬವೊಂದು ಬಕ್ರೀದ್ಗೆ ಮುಂಚಿತವಾಗಿ ಎರಡು ಆಡುಗಳನ್ನು ಅಪಾರ್ಟ್ಮೆಂಟ್ಗೆ ಕರೆತಂದಿರುವ ಘಟನೆ ಥಾಣೆಯಲ್ಲಿ ನಡೆದಿದೆ. ಇದರಿಂದ ಆಕ್ರೋಶಿತಗೊಂಡ ಹತ್ತಿರದ ನಿವಾಸಿಗಳು ಹನುಮಾನ್ ಚಾಲೀಸಾ ಪಠಿಸಿ, ಜೈ ಶ್ರೀ ರಾಮ್ ಘೋಷಣೆ ಕೂಗುತ್ತಾ ಪ್ರತಿಭಟಿಸಿದ್ದಾರೆ.
ಮೊಹ್ಸಿನ್ ಖಾನ್ ಎಂಬಾತ ಬಕ್ರೀದ್ ಹಬ್ಬದ ಹಿನ್ನೆಲೆಯಲ್ಲಿ ಬಲಿ ಕೊಡುವ ಉದ್ದೇಶದಿಂದ ಆಡುಗಳನ್ನು ಅಪಾರ್ಟ್ಮೆಂಟ್ಗೆ ತಂದಿದ್ದಾ ಎಂದು ವರದಿಯಾಗಿದೆ. ಈತ ತನ್ನ ಪತ್ನಿ ಹಾಗೂ ಪುತ್ರನೊಂದಿಗೆ ಸೇರಿ ಲಿಫ್ಟ್ ಮೂಲಕ ಆಡುಗಳನ್ನು ಕರೆತರುತ್ತಿರುವ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.
ಮೊಹ್ಸಿನ್ ಖಾನ್ ಬಕ್ರೀದ್ ಹಬ್ಬಕ್ಕೆ ಬಲಿ ಕೊಡುವ ಉದ್ದೇಶದಿಂದ ಆಡುಗಳನ್ನು ತಂದಿರುವ ವಿಚಾರ ಗೊತ್ತಾಗುತ್ತಿದ್ದಂತೆ ಅಪಾರ್ಟ್ಮೆಂಟ್ ನಿವಾಸಿಗಳು ಪ್ರತಿಭಟನೆ ಇಳಿದಿದ್ದಾರೆ. ಇವರಿಗೆ ವಿವಿಧ ಹಿಂದು ಸಂಘಟನೆಯ ಕಾರ್ಯಕರ್ತರು ಸಾಥ್ ನೀಡಿದ್ದಾರೆ. ಕೊನೆಗೆ ಪೊಲೀಸರು ಸ್ಥಳಕ್ಕಾಗಮಿಸಿ ಲಾಠಿ ಚಾರ್ಚ್ ನಡೆಸಿ ಪ್ರತಿಭಟನಾ ನಿರತರನ್ನು ಚದುರಿಸಿದ್ದಾರೆ. ಈ ಸಂಬಂಧ 11 ಜನರ ವಿರುದ್ಧ ಪ್ರಕರಣ ದಾಖಲಾಗಿದೆ.
'ಅಪಾರ್ಟ್ಮೆಂಟ್ಗೆ ಮೇಕೆಗಳನ್ನು ಕರೆತರುವುದು ಕಾನೂನಿಗೆ ವಿರುದ್ಧವಾಗಿದ್ದರೆ, ಅವರು ನಮ್ಮ ವಿರುದ್ಧ ಪೊಲೀಸ್ ದೂರು ನೀಡಬೇಕಾಗಿತ್ತು. ಪ್ರತಿಭಟಿಸಲು ಬಂದ ಗುಂಪು ನಮ್ಮ ಮೇಲೆ ಹಲ್ಲೆ ಮತ್ತು ಮಾನಸಿಕ ಕಿರುಕುಳ ನೀಡಿದೆ' ಎಂದು ಮೊಹ್ಸಿನ್ ಖಾನ್ ತಿಳಿಸಿರುವುದು ವರದಿಯಾಗಿದೆ.