ಮುಂಬೈ: ಮಕ್ಕಳಲ್ಲಿ ಮೊಬೈಲ್ಫೋನ್ ಗೀಳು ಯಾವ ಪರಿಯಲ್ಲಿ ಆವರಿಸಿದೆ ಎಂಬುದಕ್ಕೆ ಇದೂ ಒಂದು ಉದಾಹರಣೆ. ಗೇಮ್ಸ್ ಆಡಲು ಅಮ್ಮ ಮೊಬೈಲ್ ಫೋನ್ ಕೊಡಲಿಲ್ಲ ಎಂಬ ಕಾರಣಕ್ಕೆ ಇಲ್ಲೊಬ್ಬ ಬಾಲಕ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.
ಮುಂಬೈನಲ್ಲಿನ 16 ವರ್ಷದ ಬಾಲಕನೊಬ್ಬ ರೈಲಿಗೆ ದೇಹವೊಡ್ಡಿ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಈ ಬಾಲಕ ಬುಧವಾರ ಮೊಬೈಲ್ಫೋನ್ನಲ್ಲಿ ಗೇಮ್ಸ್ ಆಡುತ್ತಿದ್ದಾಗ, ಫೋನ್ ಕಿತ್ತುಕೊಂಡ ತಾಯಿ ಓದು ಎಂದು ಗದರಿ, ಹೊರಹೋಗಿದ್ದರು.
ನಂತರ ಬಾಲಕ ಡೆತ್ನೋಟ್ ಬರೆದಿಟ್ಟು ಮನೆಯಿಂದ ಹೊರಗೆ ಹೋಗಿದ್ದ. ಮನೆಗೆ ಬಂದ ತಾಯಿ ಡೆತ್ನೋಟ್ ನೋಡಿದ್ದು, ನಾನು ಮನೆಗೆ ವಾಪಸ್ ಬರುವುದಿಲ್ಲ, ಆತ್ಮಹತ್ಯೆ ಮಾಡಿಕೊಳ್ಳಲಿದ್ದೇನೆ ಎಂದು ಮಗ ಅದರಲ್ಲಿ ಬರೆದಿಟ್ಟಿದ್ದು ಕಂಡುಬಂದಿತ್ತು.
ಕೂಡಲೇ ದಿಂಡೋಶಿ ಪೊಲೀಸರಿಗೆ ಮನೆಯವರು ಮಾಹಿತಿ ನೀಡಿದ್ದರು. ಪೊಲೀಸರು ಎಲ್ಲೆಡೆ ಹುಡುಕಾಟ ಆರಂಭಿಸಿದ್ದರು. ಇಂದು ಮಲಾಡ್ ಮತ್ತು ಖಾಂಡಿವಿಲಿ ಸ್ಟೇಷನ್ ಮಧ್ಯೆ ರೈಲ್ವೆ ಹಳಿಯೊಂದರಲ್ಲಿ ಬಾಲಕನ ಶವ ಪತ್ತೆಯಾದ ಮಾಹಿತಿ ಸಿಕ್ಕಿತ್ತು. ಈ ಮೇರೆಗೆ ಪೊಲೀಸರು ಪರಿಶೀಲನೆ ನಡೆಸಿದಾಗ, ಅದು ಡೆತ್ನೋಟ್ ಬರೆದಿಟ್ಟು ಮನೆಬಿಟ್ಟು ಹೋಗಿದ್ದ ಬಾಲಕ ಎಂಬುದು ಖಚಿತಪಟ್ಟಿದೆ. ಬೊರಿವಿಲಿ ಗವರ್ನಮೆಂಟ್ ರೈಲ್ವೆ ಪೊಲೀಸ್ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.