IPL 2026: 20 ಕೋಟಿ ಬಹುಮಾನ ಹಣ ಹೇಗೆ ಹಂಚ್ತೀರಾ? ಭುವಿ ಕೊಟ್ಟ ಸಖತ್ ಆನ್ಸರ್ ವೈರಲ್​!

ಸತತ ಎರಡನೇ ಗೆಲುವಿನ ಬಳಿಕ ಆರ್‌ಸಿಬಿ ಕ್ಯಾಂಪ್‌ನಲ್ಲಿ ಸಂಭ್ರಮ ಮುಗಿಲುಮುಟ್ಟಿದೆ. ಚಾಂಪಿಯನ್ಸ್ ಪಟ್ಟ ಮುಡಿಗೇರಿಸಿಕೊಂಡ ಬೆಂಗಳೂರು ತಂಡಕ್ಕೆ ಬರೋಬ್ಬರಿ 20 ಕೋಟಿ ರೂಪಾಯಿ ಬಹುಮಾನ ಹಣ ಲಭಿಸಿದೆ. ಈ ನಡುವೆ ಆರ್‌ಸಿಬಿಯ ಜನಪ್ರಿಯ ಹಾಗೂ ಹಾಸ್ಯಭರಿತ ಪಾತ್ರ 'ಮಿಸ್ಟರ್ ನಾಗ್ಸ್' (ಡ್ಯಾನಿಶ್ ಸೇಠ್), ತಂಡದ ಹಿರಿಯ ವೇಗಿ ಭುವನೇಶ್ವರ್ ಕುಮಾರ್ ಅವರ ಕಾಲೆಳೆದಿದ್ದಾರೆ.

ಆರ್‌ಸಿಬಿ ಇನ್‌ಸೈಡರ್ ಶೋನಲ್ಲಿ ಮಿಸ್ಟರ್ ನಾಗ್ಸ್ ಅವರು ಭುವನೇಶ್ವರ್ ಕುಮಾರ್ ಅವರನ್ನು ತಡೆದು, "ಈ 20 ಕೋಟಿ ರೂಪಾಯಿ ಬಹುಮಾನದ ಹಣವನ್ನು ತಂಡದಲ್ಲಿ ಹೇಗೆ ಹಂಚಿಕೊಳ್ಳುತ್ತೀರಾ?" ಎಂದು ತಮ್ಮದೇ ಶೈಲಿಯಲ್ಲಿ ತಮಾಷೆಯಾಗಿ ಪ್ರಶ್ನಿಸಿದರು. ಇದಕ್ಕೆ ಅಷ್ಟೇ ಚತುರತೆಯಿಂದ ನಗುತ್ತಲೇ ಉತ್ತರಿಸಿದ ಭುವಿ, "ಅದನ್ನು ತಿಳಿಯಲು ನಮಗೂ ಕೂಡ ಅಷ್ಟೇ ಕುತೂಹಲವಿದೆ!" ಎಂದು ಹೇಳುವ ಮೂಲಕ ಅಲ್ಲಿದ್ದವರನ್ನು ನಗೆಗಡಲಲ್ಲಿ ತೇಲಿಸಿದರು.

ಈ ಸೀಸನ್‌ನ ಪರ್ಪಲ್ ಕ್ಯಾಪ್ (ಅತಿ ಹೆಚ್ಚು ವಿಕೆಟ್ ಪಡೆದ ಜಿಗುಟು) ರೇಸ್‌ನಲ್ಲಿ ಎರಡನೇ ಸ್ಥಾನ ಪಡೆದ ಭುವನೇಶ್ವರ್ ಕುಮಾರ್, ಪಂದ್ಯದ ನಂತರದ ಸಂದರ್ಶನದಲ್ಲಿ ತಮ್ಮ ಸಂತಸ ಹಂಚಿಕೊಂಡರು. "ವೈಯಕ್ತಿಕವಾಗಿ ಈ ಸೀಸನ್ ನನಗೆ ತುಂಬಾ ಚೆನ್ನಾಗಿ ಮೂಡಿಬಂದಿದೆ. ಸೀಸನ್‌ಗೂ ಮುನ್ನ ಸಾಕಷ್ಟು ಯೋಜನೆಗಳನ್ನು ಹಾಕಿಕೊಂಡಿದ್ದೆವು, ಅವು ಯಶಸ್ವಿಯಾಗಿವೆ. ಆದರೆ ಎಲ್ಲಕ್ಕಿಂತ ಹೆಚ್ಚಾಗಿ ತಂಡಕ್ಕೆ ಟ್ರೋಫಿ ಮುಖ್ಯ. ಆ ಟ್ರೋಫಿಗಾಗಿ ನಾನು ವೈಯಕ್ತಿಕ ಸಾಧನೆಯನ್ನು ಯಾವುದೇ ದಿನವಾದರೂ ತ್ಯಾಗ ಮಾಡಲು ಸಿದ್ಧನಿದ್ದೆ" ಎಂದು ಭುವಿ ಭಾವುಕರಾಗಿ ನುಡಿದರು.

ದೊಡ್ಡ ಪಂದ್ಯಗಳಲ್ಲಿ ಹಳೆಯ ಪ್ರದರ್ಶನಗಳು ಮತ್ತು ವಿಕೆಟ್‌ಗಳು ಆತ್ಮವಿಶ್ವಾಸವನ್ನು ಹೆಚ್ಚಿಸುತ್ತವೆ ಎಂದು ಹೇಳಿದ ಭುವಿ, ತಂಡದ ಗೆಲುವಿನ ಶ್ರೇಯಸ್ಸನ್ನು ಸಹ ಆಟಗಾರರಿಗೆ ನೀಡಿದರು. "ಇದು ಕೇವಲ ಒಬ್ಬರ ಸಾಧನೆಯಲ್ಲ, ಸಂಪೂರ್ಣ ಟೀಮ್ ವರ್ಕ್. ಒಂದು ವೇಳೆ ಜೋಶ್ ಹ್ಯಾಜಲ್‌ವುಡ್ ವಿಕೆಟ್ ಪಡೆಯದಿದ್ದರೆ ನಾನು ಜವಾಬ್ದಾರಿ ತೆಗೆದುಕೊಳ್ಳುತ್ತಿದ್ದೆ. ನಾನು ವಿಫಲನಾದರೆ ರಸಿಖ್ ಸಲಾಂ ಸಾಥ್ ನೀಡುತ್ತಿದ್ದರು. ಹೀಗೆ ನಾವೆಲ್ಲರೂ ಒಬ್ಬರಿಗೊಬ್ಬರು ಬೆಂಬಲವಾಗಿ ನಿಂತಿದ್ದೇ ಈ ಮಹಾ ಗೆಲುವಿಗೆ ಕಾರಣ" ಎಂದು ಹಿರಿಯ ವೇಗಿ ಆರ್‌ಸಿಬಿಯ ಒಗ್ಗಟ್ಟನ್ನು ಶ್ಲಾಘಿಸಿದರು,(ಏಜೆನ್ಸೀಸ್​).