ಮಂಡ್ಯ: ಮೈಸೂರು-ಬೆಂಗಳೂರು ದಶಪಥ ರಸ್ತೆಯನ್ನು ವೀಕ್ಷಿಸಲು ಗುರುವಾರ ಸಂಸದ ಪ್ರತಾಪ್ ಸಿಂಹ ಬಂದಿದ್ದರು. ಈ ವೇಳೆ ಅವರ ಕಾರನ್ನು ತಡೆದ ಯುವ ರೈತನೊಬ್ಬ, ರೈತರ ಭೂಮಿಯನ್ನು ಸ್ವಾದೀನ ಮಾಡಿಕೊಂಡಿದ್ದಾರೆ. ಆದರೆ ಸೂಕ್ತ ಪರಿಹಾರ ಸಿಕ್ಕಿಲ್ಲ. ದಯವಿಟ್ಟು ಪರಿಹಾರ ಕೊಡಿಸಿ ಎಂದು ಮನವಿ ಮಾಡಿದರು.
ಮೈಸೂರು-ಬೆಂಗಳೂರು ಹೆದ್ದಾರಿ ಬಗ್ಗೆ ಶ್ರೀರಂಗಪಟ್ಟಣ ತಾಲೂಕಿನ ಕೆ.ಶೆಟ್ಟಿಹಳ್ಳಿ ಗ್ರಾಮದ ಬಳಿ ಕಾರಿನಲ್ಲಿ ಫೇಸ್ಬುಕ್ ಮೂಲಕ ಮಾಹಿತಿ ಪ್ರತಾಪ್ ಸಿಂಹ ಮಾಹಿತಿ ನೀಡುತ್ತಿದ್ದರು. ಈ ವೇಳೆ ಸಂಸದರ ಕಾರನ್ನು ತಡೆದ ಯುವಕ, ಮೈಸೂರು-ಕುಶಾಲನಗರ ರಸ್ತೆಗಾಗಿ ರೈತರ ಜಮೀನು ಸ್ವಾದೀನ ಮಾಡಿಕೊಳ್ಳಲಾಗಿದೆ. ಇನ್ನೂ ಪರಿಹಾರ ಕೊಟ್ಟಿಲ್ಲ ಎಂದು ಅಳಲು ತೋಡಿಕೊಂಡರು.
ಯುವಕನ ಮನವಿಗೆ ಸ್ಪಂದಿಸಿದ ಸಂಸದರು, ಇನ್ನೊಂದು ವಾರ ಸಮಯ ಕೊಡಿ. ನೀವು ಭೂಮಿ ಕೊಟ್ಟಿದ್ದೀರಾ, ಪರಿಹಾರ ಕೊಡಿಸ್ತೇನೆ. ನನ್ನ ಕಚೇರಿಗೆ ಬನ್ನಿ, ಅಧಿಕಾರಿಗಳೊಂದಿಗೆ ನಾನೇ ಮಾತನಾಡಿ ಪರಿಹಾರ ಕೊಡಿಸುತ್ತೇನೆ ಎಂದು ಭರವಸೆ ನೀಡಿದರು. ಸಂಸದರ ಭರವಸೆ ಮಾತಿಗೆ ಧನ್ಯವಾದ ತಿಳಿಸಿದ ಯುವಕ, ನಂತರ ಸಂಸದರ ಜತೆಗೆ ಫೋಟೋ ತೆಗೆಸಿಕೊಂಡರು.