ಕಿರು ಚಿತ್ರಮಂದಿರ (ಮಿನಿ ಥಿಯೇಟರ್) ತೆರೆಯುವರಿಗೆ ಅನುಮತಿ ಕೊಡಲು ಸರ್ಕಾರ ಕರ್ನಾಟಕ ಸಿನಿಮಾ ಕಾಯ್ದೆ-2014ಕ್ಕೆ ತಿದ್ದುಪಡಿ ಮಾಡಿ ಕರಡು ಅಧಿಸೂಚನೆ ಹೊರಡಿಸಿದೆ. 30 ದಿನದೊಳಗೆ ಆಕ್ಷೇಪ ವ್ಯಕ್ತವಾಗದಿದ್ದಲ್ಲಿ ಗೃಹ ಇಲಾಖೆ ಅಂತಿಮ ಅಧಿಸೂಚನೆ ಹೊರಡಿಸಲಿದೆ.
4 ಸಾವಿರ ಅಡಿ ವಿಸ್ತೀರ್ಣದಲ್ಲಿ 199 ಆಸನ ಇದ್ದರೆ ‘ಮಿನಿ ಥಿಯೇಟರ್’ ಎಂದು ಪರಿಗಣಿಸಲಾಗುತ್ತದೆ. ವಾಣಿಜ್ಯ ಕೇಂದ್ರ, ಶಾಪಿಂಗ್ ಮಾಲ್, ಕನ್ವೆನ್ಷನ್ ಸೆಂಟರ್, ಬಸ್ ಮತ್ತು ರೈಲು ನಿಲ್ದಾಣ, ಬಹುಮಹಡಿ ಕಟ್ಟಡಗಳಲ್ಲಿ ಮಿನಿಥಿಯೇಟರ್ ತೆರೆಯಲು ಅವಕಾಶವಿದೆ. ಆಸಕ್ತ ಉದ್ಯಮಿಗಳು ಆನ್ಲೈನ್ನಲ್ಲಿ ಶುಲ್ಕ ಪಾವತಿಸಿ ಪರವಾನಗಿ ಪಡೆಯಲು ಅರ್ಜಿ ಸಲ್ಲಿಸಬೇಕು.
30 ದಿನದೊಳಗಾಗಿ ಲೋಕೋಪಯೋಗಿ ಇಲಾಖೆ, ಸ್ಥಳೀಯ ಸಂಸ್ಥೆಗಳು ಅಥವಾ ನಗರ ಸ್ಥಳೀಯ ಸಂಸ್ಥೆ, ವಿದ್ಯುತ್, ಅಗ್ನಿಶಾಮಕ ಮತ್ತು ತುರ್ತು ಸೇವೆ, ಪೊಲೀಸ್ ಇಲಾಖೆ ಅಧಿಕಾರಿಗಳು ಸ್ಥಳ ಪರಿಶೀಲಿಸಿ ನಿರಪೇಕ್ಷಣಾ ಪ್ರಮಾಣಪತ್ರ ನೀಡಲಿದ್ದಾರೆ. ಎಲ್ಲ ವ್ಯವಸ್ಥೆ ನಿರ್ವಹಿಸಲು ನೋಡಲ್ ಅಧಿಕಾರಿಯನ್ನು ನೇಮಿಸಲಾಗುತ್ತದೆ. ಸಂಬಂಧಪಟ್ಟ ಇಲಾಖೆಯಿಂದ ಎನ್ಒಸಿ ಬಂದ ಮೇಲೆ ಮಿನಿಥಿಯೇಟರ್ಗೆ ಪರವಾನಗಿ ನೀಡಲಾಗುತ್ತದೆ. ಎನ್ಒಸಿ ನೀಡಲು ಸಮಸ್ಯೆ ಇದ್ದರೆ ಲೋಪಗಳನ್ನು ಆನ್ಲೈನ್ನಲ್ಲೇ ಉಲ್ಲೇಖಿಸಿ ಸರಿಪಡಿಸಿಕೊಳ್ಳಲು ಕಾಲಾವಕಾಶ ನೀಡಲಾಗುತ್ತದೆ ಎಂದು ಗೃಹ ಇಲಾಖೆ ಮುಖ್ಯ ಕಾರ್ಯದರ್ಶಿ ತಿಳಿಸಿದ್ದಾರೆ.
ಮಾಹಿತಿ ಫಲಕ ಇರಬೇಕು: ಕೇಂದ್ರ ಸೆನ್ಸಾರ್ ಮಂಡಳಿಯಿಂದ ‘ಎ’ ಮತ್ತು ‘ಯು’ ಸರ್ಟಿಫಿಕೇಟ್ ಪಡೆದ ಸಿನಿಮಾ ಪ್ರಸಾರ ಮಾಡಬೇಕು. ತೆರೆ ಕಾಣುವ ಸಿನಿಮಾ ಯಾವ ಸರ್ಟಿಫಿಕೇಟ್ಗೆ ಸೇರಿದೆ. ಅದನ್ನು ಮಕ್ಕಳು ಮತ್ತು ವಯಸ್ಕರು ನೋಡಬಹುದಾ? ಯಾವ ಸಮಯಕ್ಕೆ ಶುರುವಾಗುತ್ತದೆ? ಎಂಬ ಮಾಹಿತಿ ಫಲಕವನ್ನು ಎಲ್ಲರಿಗೂ ಕಾಣುವಂತೆ ಪ್ರದರ್ಶನ ಮಾಡಬೇಕು ಎಂದು ಸರ್ಕಾರ ಷರತ್ತು ವಿಧಿಸಿದೆ. ಸರ್ಕಾರದಿಂದ ಪಡೆದ ಪರವಾನಗಿಗೆ 1 ವರ್ಷ ಆಯಸ್ಸು ಇರುತ್ತದೆ. ನವೀಕರಣಕ್ಕಾಗಿ ಮತ್ತೆ ಆನ್ಲೈನ್ನಲ್ಲಿ ಅರ್ಜಿ ಸಲ್ಲಿಸಬೇಕು. ಹೊಸದಾಗಿ ಪರಿಶೀಲನೆ ನಡೆಸಿ ಎನ್ಒಸಿ ನೀಡಿದ ಮೇಲೆ ಪರವಾನಗಿ ನವೀಕರಣ ಮಾಡಲಾಗುತ್ತದೆ.
ಹಳ್ಳಿಗೂ ಬರಲಿದೆ...
ಗ್ರಾಮೀಣ ಭಾಗದಲ್ಲೂ ಮಿನಿ ಥಿಯೇಟರ್ ತೆರೆಯಲು ಆಕ್ಷೇಪವಿಲ್ಲ. ಥಿಯೇಟರ್ ವಿಸ್ತೀರ್ಣದ ಶೇ.20 ಭಾಗ ವಾಹನ ನಿಲ್ಲಿಸಲು ಸ್ಥಳ ಬಿಡಬೇಕು. ಮಲ್ಟಿಪಲ್ ಸ್ಕ್ರೀನ್ ಚಿತ್ರಮಂದಿರದಿಂದ 2 ಕಿ.ಮೀ. ಅಂತರ ಕಾಯ್ದುಕೊಳ್ಳಬೇಕು. ಅಗ್ನಿಶಮನ ವ್ಯವಸ್ಥೆ, ನೀರಿನ ಟ್ಯಾಂಕ್ ಕಡ್ಡಾಯ. ಸಿಂಗಲ್ ಸ್ಕ್ರೀನ್ ಥಿಯೇಟರ್ ಅನ್ನು ಮಿನಿ ಡಿಜಿಟಲ್ ಥಿಯೇಟರ್ ಆಗಿ ಪರಿವರ್ತಿಸಿಕೊಳ್ಳಲು ಅವಕಾಶವಿದೆ. ಅಪಾರ್ಟ್ವೆುಂಟ್, ಲೇಔಟ್ನಲ್ಲಿ ತೆರೆಯಲು ಅನುಮತಿ ಇಲ್ಲ.
| ಗೋವಿಂದರಾಜು ಚಿನ್ನಕುರ್ಚಿ ಬೆಂಗಳೂರು