ನವದೆಹಲಿ: 2016ರ ಮಿಸ್ ಇಂಡಿಯಾ ಫೈನಲಿಸ್ಟ್ ಐಶ್ವರ್ಯಾ ಶೆರನ್ ಯುಪಿಎಸ್ಸಿ ಪರೀಕ್ಷೆಯಲ್ಲಿ 93ನೇ ಶ್ರೇಣಿ ಗಳಿಸಿದ್ದಾರೆ. ಈ ಮೂಲಕ ಬ್ಯೂಟಿಯ ಜತೆಗೆ ಬ್ರೈನ್ ಕೂಡಾ ಚುರುಕಾಗಿದೆ ಎಂದು ನೆಟ್ಟಿಗರು ಪ್ರಶಂಸೆಯ ಮಳೆಯನ್ನೇ ಸುರಿಸುತ್ತಿದ್ದಾರೆ. ಐಶ್ವರ್ಯಾ ಶಿಯೋರಾನ್ ತನ್ನ ಮಾಡೆಲಿಂಗ್ ಕ್ಷೇತ್ರಕ್ಕೆ ಗುಡ್ಬೈ ಹೇಳಿ ಐಎಫ್ಎಸ್ ಅಧಿಕಾರಿಯಾಗಲು ಅವರು ವಹಿಸಿದ ಶ್ರಮ, ಶ್ರದ್ಧೆ ಎಲ್ಲರ ಗಮನ ಸೆಳೆದಿದೆ.
ಐಶ್ವರ್ಯಾ ಶೆರನ್ ತನ್ನ ಮಾಡಲ್ ವೃತ್ತಿಯನ್ನು ಬದಿಗಿರಿಸಿ, 2018ರಿಂದ ಯುಪಿಎಸ್ಸಿಯ ನಾಗರೀಕ ಸೇವೆಗಳ ಪರೀಕ್ಷೆಗೆ ಯಾವುದೇ ಕೋಚಿಂಗ್ ತರಗತಿಗೆ ತೆರಳದೇ ಕಷ್ಟಪಟ್ಟು ಓದಿದ್ದರು. ಇದಕ್ಕೆ ಪ್ರತಿಫಲವೆಂಬಂತೆ ಮೊದಲ ಪ್ರಯತ್ನದಲ್ಲಿಯೇ 93ನೇ ಶ್ರೇಣಿ ಪಡದು ಭಾರತೀಯ ವಿದೇಶಾಂಗ ಸೇವೆ(IFS) ಅಧಿಕಾರಿಯಾಗಿ ಆಯ್ಕೆಗೊಂಡಿದ್ದಾರೆ.
ಮೂಲತಃ ದೆಹಲಿಯವರಾದ ಐಶ್ವರ್ಯಾರವರು ಮಾಡಲಿಂಗ್ ಮಾಡುತ್ತಿದ್ದರು. 2014ರಲ್ಲಿ ಮಿಸ್ ಕ್ಲೀನ್ ಆ್ಯಂಡ್ ಫ್ರೆಶ್ ಫೇಸ್ ಮತ್ತು 2015ರಲ್ಲಿ ಮಿಸ್ ದೆಲ್ಲಿ ಕಿರೀಟ ಮುಡಿಗೇರಿಸಿಕೊಂಡಿದ್ದ ಈಕೆ 2016ರ ಮಿಸ್ ಇಂಡಿಯಾ ಸ್ಪರ್ಧೆಯಲ್ಲಿ ಅಂತಿಮ ಸುತ್ತಿಗೆ ಆಯ್ಕೆಯಾಗಿದ್ದರು.
ಬಾಲ್ಯದಿಂದಲೂ ಓದಿನ ಮೇಲೆ ಅತೀವ ಆಸಕ್ತಿ ಹೊಂದಿದ್ದ ಐಶ್ವರ್ಯಾ 12ನೇ ತರಗತಿಯಲ್ಲಿ ಶೇ. 97.5 ಅಂಕ ಗಳಿಸಿದ್ದರು. 2018ರಲ್ಲಿ ಇಂದೋರ್ನ ಐಐಎಂಗೆ ಪ್ರಾವೇಶಾತಿ ಸಿಕ್ಕಿದ್ದರೂ ತನ್ನ ಕನಸಾದ ಯುಪಿಎಸ್ಸಿ ಪರೀಕ್ಷೆಗೆ ತಯಾರಾಗುವ ಸಲುವಾಗಿ ತೆರಳಲಿಲ್ಲ ಎನ್ನಲಾಗುತ್ತಿದೆ.
UPSC ಅತ್ಯಂತ ಕಠಿಣ ಪರೀಕ್ಷೆಗಳಲ್ಲಿ ಒಂದಾಗಿದೆ. ಪರೀಕ್ಷೆಯಲ್ಲಿ ಉತ್ತೀರ್ಣರಾಗಲು, ಸತತ ಪ್ರಯತ್ನ ಜತೆಗೆ ಅದೊಂದು ದೇವರ ತಪಸ್ಸು. ಪ್ರತಿ ವರ್ಷ, ಸಾವಿರಾರು ಅಭ್ಯರ್ಥಿಗಳು IAS, IFS ಮತ್ತು IPS ಆಗಲು ಪರೀಕ್ಷೆಯನ್ನು ತೆಗೆದುಕೊಳ್ಳಲು ಬಯಸುತ್ತಾರೆ. ಪ್ರಾಥಮಿಕ ಪರೀಕ್ಷೆ, ಮುಖ್ಯ ಪರೀಕ್ಷೆ ಮತ್ತು ಸಂದರ್ಶನ ಎಂಬ ಮೂರು ಭಾಗಗಳನ್ನು ಒಳಗೊಂಡಿರುವ ಅತ್ಯಂತ ಸ್ಪರ್ಧಾತ್ಮಕ ಪರೀಕ್ಷೆಯಲ್ಲಿ ಅವರಲ್ಲಿ ಕೆಲವರು ಮಾತ್ರ ಯಶಸ್ವಿಯಾಗುತ್ತಾರೆ.