‘ಕಿಂ ವಾವಶಿಷ್ಟಂ ಯುವಯೋಃ ಸುಕೃತ್ಯಮ್ (10.1.46.33 ಭಾಗವತ) - ಇದನ್ನು ಉದ್ಧವ, ನಂದ ಯಶೋದೆಯರಿಗೆ ಹೇಳುತ್ತಾನೆ. ನಿಮ್ಮದು ಎಂತಹ ದೊಡ್ಡ ಭಾಗ್ಯ ಎಂಬುದಾಗಿ. ಇದೇ ಮಾತು ದಾಸರಿಗೆ ಪ್ರೇರಣೆ ನೀಡಿದೆ ಎಂದು ಅನಿಸುತ್ತದೆ. ‘ಏನು ಸುಕೃತವ ಮಾಡಿದಳೋ ಯಶೋದೆ’ ಎಂದರು. ಅದು ಭಾಗವತದ ಶಬ್ದ. ಅದೇ ‘ಕಿಂ ವಾವಶಿಷ್ಟಂ ಯುವಯೋಃ ಸುಕೃತ್ಯಮ್ - ಏನು ಸುಕೃತ ನೀನು ಮಾಡಿದೆ ಯಶೋದೆ ಎಂದು ಉದ್ಧವ ಆಡಿದ ಮಾತು. ಅದನ್ನೇ ದಾಸರು ಹಾಡಿನ ರೂಪದಲ್ಲಿ ರಚಿಸಿ ಹಾಡಿದ್ದಾರೆ.
ಉದ್ಧವ ಹೇಳುತ್ತಾನೆ: ನೀನು ಅಥವಾ ನಂದ ಏನೆಲ್ಲ ಸುಕೃತವ ಮಾಡಿದಿರಿ, ಅನಂತ ವೇದಗಳಿಂದ ಪ್ರತಿಪಾದ್ಯನಾದ ಆ ಭಗವಂತನಿಗೆ ಜೋಗುಳ ಹಾಡಿ ತೂಗುತ್ತಿದ್ದೀರಿ, ಕೋಟಿ ಸೂರ್ಯ ಪ್ರಕಾಶನಾದ ಪರಮಾತ್ಮ ಅಂದರೆ ಯಾವ ಪರಮಾತ್ಮನ ಪ್ರಕಾಶದಿಂದ ಸೂರ್ಯ ಚಂದ್ರ ನಕ್ಷತ್ರಾದಿಗಳಿಗೆ ಪ್ರಕಾಶ ಇದೆಯೋ ಅಂತಹ ಪರಮಾತ್ಮನಿಗೆ ಆರತಿ ಮಾಡುತ್ತಿದ್ದೀರಿ. ಜಗನ್ನಿಯಾಮಕನಾದ ಪರಮಾತ್ಮನಿಗೆ -ಅಂದರೆ- ಜಗತ್ತಿಗೆ ನಿದ್ರೆ ಕೊಡತಕ್ಕಂತಹ ಪರಮಾತ್ಮನಿಗೆ ಜೋಗುಳ ಹಾಡುತ್ತಿದ್ದೀರಿ.
‘ಸ್ವಾಪಂ ಪ್ರಾಪಯತಿ ಶ್ರಮಾಪಹೃತಯೇ||
ಜಗತ್ತಿನ ಜನರ ಶ್ರಮವನ್ನು ಕಳೆಯುವುದಕ್ಕಾಗಿ ನಿದ್ರೆಯನ್ನು ಕೊಡುವ ಆ ಭಗವಂತನನ್ನೇ ನೀವು ಮಲಗಿಸುತ್ತೀರಿ ಎಂದು ಹೊಗಳುತ್ತಾನೆ.