ಬೆಂಗಳೂರು: ಎಲ್ಲವೂ ಅಂದುಕೊಂಡಂತೆಯೇ ನಡೆದಿದ್ದರೆ ಇಲ್ಲೊಂದಷ್ಟು ಜೋಡಿಗಳ ಮದುವೆ ಲಾಕ್ಡೌನ್ ಅವಧಿಯಲ್ಲಿಯೇ ಮುಗಿದುಹೋಗಿರಬೇಕಿತ್ತು. ಆದರೆ ಅಂದುಕೊಂಡ ಹಾಗಾಗದೆ ಈ ವಧು-ವರರು ನಿರಾಸೆಗೀಡಾಗಿದ್ದರು. ಆದರೆ ಇದೀಗ ಅವರ ಮುಖದಲ್ಲಿ ಖುಷಿ ಕಾಣಿಸಿದೆ.
ಏಕೆಂದರೆ ಸರ್ಕಾರದಿಂದಲೇ ಉಚಿತವಾಗಿ ಮದುವೆ ನಡೆಯಲಿದೆ ಎಂದು 'ಆಹಾ ನಮ್ ಮದ್ವೆಯಂತೆ' ಎಂಬ ಖುಷಿಯಲ್ಲಿದ್ದು ಬೇಸರಕ್ಕೂ ಒಳಗಾಗಿದ್ದ ಜೋಡಿಗಳಿಗೆ ಈಗ ಕೊನೆಗೂ 'ಸಪ್ತಪದಿ'ಗೆ ಮುಹೂರ್ತ ಕೂಡಿ ಬಂದಿದೆ.
ಹೌದು.. ಸರ್ಕಾರದ ಧಾರ್ಮಿಕ ದತ್ತಿ ಇಲಾಖೆ ವತಿಯಿಂದ ಆ ವ್ಯಾಪ್ತಿಯ 'ಎ' ದರ್ಜೆಯ ದೇಗುಲಗಳಲ್ಲಿ ನಡೆಸಲು ಉದ್ದೇಶಿಸಿರುವ ಉಚಿತ ಸಾಮೂಹಿಕ ವಿವಾಹ ಯೋಜನೆ 'ಸಪ್ತಪದಿ'ಗೆ ಕೊನೆಗೂ ಕಾಲ ಕೂಡಿ ಬಂದಿದೆ. ಡಿಸೆಂಬರ್ 2, 7 ಮತ್ತು 10ರಂದು ಮೂರು ಹಂತಗಳಲ್ಲಿ ಮಹೂರ್ತ ನಿಗದಿಯಾಗಿದೆ.
ಮೊದಲಿಗೆ ಕಳೆದ ಏಪ್ರಿಲ್-ಮೇನಲ್ಲಿ ಈ ಮದುವೆ ನಡೆಯಬೇಕಿತ್ತು. ಆದರೆ ಕರೊನಾ ಹಾವಳಿ ಹಿನ್ನೆಲೆಯಲ್ಲಿ ಜುಲೈ ಹಾಗೂ ಆಗಸ್ಟ್ ತಿಂಗಳಿಗೆ ಮುಂದೂಡಲಾಗಿತ್ತು. ಅದಾಗ್ಯೂ ಕರೊನಾ ಸೋಂಕು ನಿಯಂತ್ರಣಕ್ಕೆ ಬರದ್ದರಿಂದ ಮದುವೆ ಮತ್ತೆ ಮುಂದೂಡಲ್ಪಟ್ಟಿತ್ತು. ಇದೀಗ ಡಿಸೆಂಬರ್ನಲ್ಲಿ ಸಪ್ತಪದಿ ನಡೆಯಲಿದೆ.