ನವದೆಹಲಿ: ಇತ್ತೀಚೆಗಷ್ಟೇ ನೀಟ್-ಯುಜಿ ಪರೀಕ್ಷೆಯಲ್ಲಿ 99.99 ಪರ್ಸಂಟೈಲ್ ಪಡೆದ ಪ್ರತಿಭಾವಂತನೊಬ್ಬ ಡಾಕ್ಟರ್ ಆಗಲು ಇಷ್ಟವಿಲ್ಲ ಎಂದು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಅನುರಾಗ್ ಅನಿಲ್ ಬೋರ್ಕರ್ (19) ಮೃತಪಟ್ಟ ದುರ್ದೈವಿ. ಮಹಾರಾಷ್ಟ್ರದ ಚಂದ್ರಾಪುರ ಜಿಲ್ಲೆಯಲ್ಲಿ ಈ ದುರ್ಘಟನೆ ನಡೆದಿದೆ.
ಸಿಂದೆವಹಿ ತಾಲೂಕಿನ ನವರ್ಗಾಂವ್ನ ನಿವಾಸಿಯಾಗಿದ್ದ ಈತ ತಂದೆ-ತಾಯಿ ಜತೆ ನೆಲೆಸಿದ್ದ. ಒಬಿಸಿ ಕೆಟಗರಿಯಲ್ಲಿ ದೇಶದಲ್ಲಿ 1475ನೇ ರ್ಯಾಂಕ್ ಗಳಿಸಿದ್ದ ಈತ ವೈದ್ಯಕೀಯ ಕಾಲೇಜಿಗೆ ಪ್ರವೇಶ ಪಡೆಯಬೇಕಾಗಿದ್ದ ದಿನವೇ ಸಾವಿಗೆ ಶರಣಾಗಿದ್ದಾನೆ. ಉತ್ತರಪ್ರದೇಶದ ಗೋರಖ್ಪುರದಲ್ಲಿ ಎಂಬಿಬಿಎಸ್ ಕೋರ್ಸ್ಗೆ ಸೇರಬೇಕಾಗಿದ್ದವ, ಅದಕ್ಕೂ ಮುನ್ನವೇ ಬದುಕಿಗೆ ಅಂತ್ಯ ಹೇಳಿದ್ದಾನೆ. ಸ್ಥಳದಲ್ಲಿ ಡೆತ್ನೋಟ್ ಪತ್ತೆಯಾಗಿದ್ದು, ‘ನನಗೆ ಡಾಕ್ಟರ್ ಆಗಲು ಇಷ್ಟವಿಲ್ಲ’ ಎಂಬುದಾಗಿ ಅದರಲ್ಲಿ ಬರೆದಿರುವುದು ಬಹಿರಂಗವಾಗಿದೆ. ‘ಗೋರಖ್ಪುರಕ್ಕೆ ತೆರಳುವುದಕ್ಕೂ ಮುನ್ನ ಅನುರಾಗ್ ತನ್ನ ಮನೆಯಲ್ಲಿ ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಸ್ಥಳದಲ್ಲಿ ಡೆತ್ನೋಟ್ ಪತ್ತೆಯಾಗಿದೆ’ ಎಂದು ಮಾಹಿತಿ ನೀಡಿರುವ ಪೊಲೀಸರು, ಡೆತ್ನೋಟ್ನಲ್ಲಿ ಬರೆದಿರುವುದನ್ನು ಬಹಿರಂಗಪಡಿಸಲು ನಿರಾಕರಿಸಿದ್ದಾರೆ. ಆದರೆ, ‘ಡಾಕ್ಟರ್ ಆಗಲು ಇಷ್ಟವಿಲ್ಲ’ ಎಂದು ಅನುರಾಗ್ ಆ ಡೆತ್ನೋಟ್ನಲ್ಲಿ ಬರೆದಿಟ್ಟಿದ್ದ ಎನ್ನುವುದು ಮೂಲಗಳಿಂದ ತಿಳಿದುಬಂದಿದೆ.