ಥಾಣೆ: ರೈಲಿನಲ್ಲಿ ಪ್ರಯಾಣಿಸುತ್ತಿದ್ದಾಗ ತನ್ನ ಹೆಂಡತಿ ಮತ್ತು ಮಗುವಿಗಾಗಿ ಸೀಟು ಕೇಳಿದ್ದಕ್ಕೇ ಸಹ ಪ್ರಯಾಣಿಕರಿಂದ ವ್ಯಕ್ತಿಯೊಬ್ಬ ಹೊಡೆತ ತಿಂದಿರುವ ಘಟನೆ ಥಾಣೆ ಜಿಲ್ಲೆಯ ಕಲ್ಯಾಣ್ ನಗರದಲ್ಲಿ ನಡೆದಿದೆ.
26 ವರ್ಷದ ಸಾಗರ್ ಮಾರ್ಕಂಡ್ ಹೆಸರಿನ ವ್ಯಕ್ತಿ ತನ್ನ ಹೆಂಡತಿ ಜ್ಯೋತಿ ಮತ್ತು ತನ್ನ ಎರಡು ವರ್ಷದ ಮಗುವಿನೊಂದಿಗೆ ಸಂಬಂಧಿಗಳ ಮನೆಯ ಕಾರ್ಯಕ್ರಮವೊಂದಕ್ಕೆ ಭೇಟಿ ನೀಡಲು ರೈಲು ಹತ್ತಿದ್ದ. ಮುಂಬೈನಿಂದ ಬೀದರ್ ತೆರಳುವ ಮುಂಬೈ-ಬೀದರ್ ಎಕ್ಸ್ಪ್ರೆಸ್ ರೈಲಿನ ಜನರಲ್ ಬೋಗಿ ಹತ್ತಿದ ಆತ ಅಲ್ಲಿ ಕುಳಿತಿದ್ದ ಮಹಿಳೆಯೊಬ್ಬರಲ್ಲಿ ತನ್ನ ಹೆಂಡತಿಗೆ ಸೀಟನ್ನು ಕೊಡುವಂತೆ ಕೇಳಿದ್ದಾನೆ. ಇದರಿಂದ ಸಿಟ್ಟಿಗೆದ್ದ ಮಹಿಳೆ ಆತನನ್ನು ಬೈಯಲಾರಂಭಿಸಿದ್ದಾಳೆ. ಮಾತಿಗೆ ಮಾತು ಬೆಳೆದು ಅಲ್ಲಿದ್ದ ಜನರೆಲ್ಲ ಸೇರಿಕೊಂಡು ಸಾಗರ್ಗೆ ಹೊಡೆಯಲಾರಂಭಿಸಿದ್ದಾರೆ. ತನ್ನ ಗಂಡನಿಗೆ ಹೊಡೆಯಬೇಡಿ ಎಂದು ಜ್ಯೋತಿ ಕೇಳಿಕೊಳ್ಳುತ್ತಿದ್ದರೂ ಸುಮ್ಮನಾಗದ ಜನರು ಒಂದು ಗಂಟೆಯ ಕಾಲ ಆತನಿಗೆ ಹೊಡೆದಿದ್ದಾರೆ.
ಈ ಕುರಿತಾಗಿ ಮಾತನಾಡಿರುವ ರೈಲ್ವೆ ನಿಲ್ದಾಣದ ಪೊಲೀಸ್ ವರಿಷ್ಠಾಧಿಕಾರಿ ದೀಪಕ್ ಸಾತೋರ್, "ರೈಲಿನ ಜನರಲ್ ಬೋಗಿಯಲ್ಲಿ ಯಾವುದೇ ಸೀಟು ಖಾಲಿ ಇಲ್ಲದ ಕಾರಣ ಸಾಗರ್ ಮಗುವನ್ನು ಎತ್ತಿಕೊಂಡಿರುವ ತನ್ನ ಹೆಂಡತಿಗಾಗಿ ಮಹಿಳೆಯಲ್ಲಿ ಸೀಟು ಕೇಳಿದ್ದಾನೆ. ಆದರೆ ಆಕೆ ಅದಕ್ಕೆ ಒಪ್ಪದೆ ಆತನನ್ನು ಬೈದು, ಹೊಡೆದಿದ್ದಾಳೆ. ಆರು ಜನ ಮಹಿಳೆಯರು ಸೇರಿದಂತೆ ಒಟ್ಟು 12 ಜನರು ಸಾಗರ್ಗೆ ಹೊಡೆದಿದ್ದಾರೆ." ಎಂದು ತಿಳಿಸಿದ್ದಾರೆ.
ಸದ್ಯ ಆರೋಪಿಗಳನ್ನು ಗುರುತಿಸಿ ವಶಕ್ಕೆ ತೆಗೆದುಕೊಳ್ಳಲಾಗಿದ್ದು, ವಿಚಾರಣೆ ನಡೆಸುತ್ತಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್)