ಭೋಪಾಲ್: ಇಲ್ಲೊಬ್ಬ ಸರ್ಕಾರಿ ವೈದ್ಯ ಮಾಡಿಕೊಂಡ ಎಡವಟ್ಟು ಬಹುದೊಡ್ಡದು. ರಜೆ ಸಿಗದಿದ್ದರೂ ಮದುವೆ ಮನೆಗೆ ಹೋಗಿದ್ದಲ್ಲದೆ, ಸ್ವತಃ ವೈದ್ಯನಾಗಿದ್ದುಕೊಂಡು ವೈದ್ಯಕೀಯ ಸಿಬ್ಬಂದಿಯನ್ನೇ ಯಾಮಾರಿಸಿ, ಸಿಕ್ಕಿಬಿದ್ದಿದ್ದಾನೆ.
ಈ ವೈದ್ಯನ ಹೆಸರು ಅಭಯ್ ರಂಜನ್ ಸಿಂಗ್. ಸರ್ಕಾರಿ ಆಸ್ಪತ್ರೆಯಲ್ಲಿ ಕೆಲಸ ಮಾಡುತ್ತಿದ್ದಾನೆ. ಉತ್ತರ ಪ್ರದೇಶದ ಬಲ್ಲಿಯಾದಲ್ಲಿ ನಡೆದ ಸಂಬಂಧಿಯೋರ್ವರ ಮದುವೆಗೆಂದು ತನ್ನ ಪತ್ನಿಯೊಂದಿಗೆ ಜೂ.23ರಂದು ಹೋಗಿದ್ದ. ಹಾಗಂತ ಅವನಿಗೆ ರಜೆ ಸಿಕ್ಕಿರಲಿಲ್ಲ. ಆದರೂ ಅದು ಹೇಗೋ ಕದ್ದುಮುಚ್ಚಿ ಹೋಗಿದ್ದವನು ಅಲ್ಲಿಂದ ಜು.1ರಂದು ವಾಪಸ್ ಆಗಿದ್ದ.
ಮದುವೆಯಿಂದ ವಾಪಸ್ ಬಂದವನು ಕ್ವಾರಂಟೈನ್ ಆಗುವುದನ್ನು ಬಿಟ್ಟು ಕರ್ತವ್ಯಕ್ಕೆ ಹೋಗುತ್ತಿದ್ದ. ಆದರೆ ಒಂದೆರಡು ದಿನ ಬಿಟ್ಟು ವೈದ್ಯನ ಪತ್ನಿಯಲ್ಲಿ ಕೊವಿಡ್-19ನ ಲಕ್ಷಣಗಳು ಕಾಣಿಸಿಕೊಳ್ಳತೊಡಗಿದವು. ಆಗ ಡಾ. ಅಭಯ್ಗೆ ಭಯ ಶುರುವಾಯಿತು. ಬೇರೆ ದಾರಿ ಕಾಣದೆ ಪತ್ನಿಗೆ ಕೊವಿಡ್-19 ಟೆಸ್ಟ್ ಮಾಡಿಸಿದ. ಆದರೆ ಪತ್ನಿಯ ಹೆಸರಿನ ಬದಲಿಗೆ ತನ್ನ ಮನೆಯ ಕೆಲಸದವಳ ಹೆಸರನ್ನು ದಾಖಲೆಯಲ್ಲಿ ಬರೆಸಿದ್ದ. ಪತ್ನಿಯ ಗಂಟಲು ದ್ರವದ ಮಾದರಿಗೆ ಕೆಲಸದವಳ ಹೆಸರು, ವಿಳಾಸ ಕೊಟ್ಟಿದ್ದ.
ತಪಾಸಣಾ ವರದಿ ಕೊವಿಡ್-19 ಪಾಸಿಟಿವ್ ಎಂದು ಬರುತ್ತಿದ್ದಂತೆ ಆರೋಗ್ಯ ಸಿಬ್ಬಂದಿ ಸೀದಾ ವೈದ್ಯನ ಮನೆ ಕೆಲಸದವಳ ಮನೆ ವಿಳಾಸಕ್ಕೆ ಆಂಬುಲೆನ್ಸ್ ತೆಗೆದುಕೊಂಡು ಹೋದರು. ಆಗಲೇ ವೈದ್ಯನ ಕ್ರಿಮಿನಲ್ ಕೆಲಸ ಬೆಳಕಿಗೆ ಬಂತು. ಇದನ್ನೂ ಓದಿ: ಒಡಿಶಾ ಬ್ಯೂಟಿ ಬಗ್ಗೆ ಟ್ವೀಟ್ ಮಾಡಿದ್ದಕ್ಕೇ ಕಿಡಿಕಾರಿದ ನೆಟ್ಟಿಗರಿಗೆ ತಿರುಗೇಟು ನೀಡಿದ ಆರ್ಜಿವಿ!
ಇದೀಗ ಡಾ. ಅಭಯ್ ವಿರುದ್ಧ ಎಫ್ಐಆರ್ ದಾಖಲಾಗಿದೆ. ಆತನಿಗೂ ಕರೊನಾ ದೃಢಪಟ್ಟಿದ್ದಲ್ಲದೆ, ಅವರ ಮನೆಯ ಇನ್ನಿಬ್ಬರಿಗೂ ಸೋಂಕು ತಗುಲಿದೆ. ವೈದ್ಯ ಡ್ಯೂಟಿಗೆ ತೆರಳುತ್ತಿದ್ದುದರಿಂದ ಅವನ ಸಂಪರ್ಕಕ್ಕೆ ಬಂದ 33 ಜನರನ್ನು ಐಸೋಲೇಟ್ ಮಾಡಲಾಗಿದೆ.
ವೈದ್ಯನ ಫ್ಯಾಮಿಲಿ ಮದುವೆಗೆಂದು ಹೋಗಿದ್ದ ಸ್ಥಳ ಕೊವಿಡ್-19 ಕಂಟೇನ್ಮೆಂಟ್ ಝೋನ್ ಆಗಿತ್ತು. ಅಲ್ಲಿಂದ ಬಂದ ಮೇಲೆ ಅವರು ಕ್ವಾರಂಟೈನ್ ಆಗಬೇಕಿತ್ತು. ಆದರೆ ತನ್ನ ಪತ್ನಿಗೆ ಕೊವಿಡ್-19 ಬಂದರೆ ಮತ್ತೆ ತನ್ನ ಅನಧಿಕೃತ ರಜೆಯ ಗುಟ್ಟು ಬೆಳಕಿಗೆ ಬರುತ್ತದೆ ಎಂದು ಈ ಐಡಿಯಾ ಮಾಡಿದ್ದ ವೈದ್ಯ. ಈಗ ಆತನ ವಿರುದ್ಧ ಎಫ್ಐಆರ್ ದಾಖಲು ಮಾಡಲಾಗಿದೆ. ಕೊವಿಡ್-19ನಿಂದ ಅವರು ಚೇತರಿಸಿಕೊಂಡ ಬಳಿಕ ಕ್ರಮ ಕೈಗೊಳ್ಳಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.(ಏಜೆನ್ಸೀಸ್)